သျှမ်းပြည် မိုးမိတ်မြို့တွင်း တိုက်ပွဲကြောင့် ဒေသခံများ စစ်ရှောင်လာစဥ် စစ်ကောင်စီ တပ်သားများက ပစ္စည်းလုယက်မှု ပြုလုပ်ခဲ့ကြောင်း စုံစမ်းသိရသည်။

ပြီးခဲ့သည့် (ဇန်နဝါရီလ ၁၈ ရက် နှင့် ၁၉ ရက်) နှစ်ရက်အတွင်း မြို့တွင်းတိုက်ပွဲကြောင့် ဒေသခံများ ထွက်ပြေးတိမ်းရှောင်လာစဉ် မြို့ထဲရှိ စစ်ကောင်စီတပ်ဖွဲ့ တပ်မ (၉၉) မှ တပ်သားများမှ ခေါ်ယူစစ်ဆေးမေးမြန်းပြီး ပါလာသော ဒေသခံများ၏တန်းဖိုးကြီးပစ္စည်းများကို ယူဆောင်သွားခဲ့ကြောင်း ကိုယ်တိုင်ကြုံတွေ့ခဲ့သူနှင့် နီးစပ်သည့် ဆွေမျိုးတစ်ဦးက ပြောသည်။

“ပြီးခဲ့တဲ့ရက်ပိုင်းတုန်းက မြို့ထဲကရွှေဆိုင်ပိုင်ရှင်တစ်ဦး ရွှေတွေယူပြီး ထွက်ပြေးလာတာ။ မြို့ထဲမှာ စစ်ကောင်စီ တပ်သားတွေနဲ့ လာတိုးတာ။ သူပါလာသမျှရွှေတွေ အကုန်ယူသွားတယ်။ အဲ့အပြင် ပါလာတဲ့ ပိုက်ဆံတွေကော အကုန်ယူသွားတယ်။ ရွှေကတော့ ၃ ကျပ်သား ကျော်တယ်။ ငွေကတော့ ကျပ်သိန်း ၅၀၀ လောက် ပါသွားတယ်” ဟု ၎င်းကပြောသည်။

ထို့အပြင် ဒေသခံများ၏ နေအိမ်ကိုလည်း စစ်ကောင်စီတပ်သားများသည် ညအချိန်တွင် ဝင်ရောက်ပြီး ပစ္စည်းမွှေယူနေသကဲ့သို့ အိမ်စောင့်နေသူများတွေ့လျှင် သေနတ်ဖြင့်ခြိမ်းခြောက်၊ ရိုက်နှက်ကာ ရွှေ၊ ငွေများ တောင်းယူခြင်းခံခဲ့ရကြောင်း ဆိုသည်။

အလားတူ ပစ္စည်းလုယက်ခံရသည့် ဒေသခံအမျိုးသားတစ်ဦးက “နားကပ်တွေ၊ လည်ဆွဲတွေ ဝတ်ထားလို့ မရဘူး။ စစ်ကောင်စီ တပ်သားတွေ တွေ့ရင်ချွတ်တာ။ ပြီးတော့ အိတ်ထဲဘာပါလည်း နှိုက်တယ်။ ပါလာတာတွေ အကုန်ယူသွားတာ” ဟု ဆိုပြန်သည်။

မိုးမိတ်မြို့နယ်တွင် ခြေလျင်တပ်ရင်း ခလရ (၂၂၃)၊ ခလရ (၂၇၆) တပ်ရင်း၊ မြောက်ပိုင်းတိုင်း စစ်ဌာနချုပ် လက်အောက်ခံ ခြေမြန်တပ်ရင်း ခမရ (၃၄၈) နှင့် ဗန်းမော်အခြေစိုက် အမှတ် ၂၁ စစ်ဆင်ရေး ကွပ်ကွဲမှူဌာနချုပ် ဗျူဟာတစ်ခုရှိရာမှ တိုက်ပွဲဖြစ်ပွားလာပြီးနောက် စစ်ကောင်စီ တပ်မ (၉၉)သည် အင်အားဖြည်တင်းသည့်အနေဖြင့် ရောက်ရှိလာကြောင်း သိရသည်။

လက်ရှိ မိုးမိတ်မြို့ တောင်ရပ်ကွက်ရှိ စစ်ကောင်စီ၏ မြို့မရဲစခန်း၊ တပ်စခန်းအချို့ကို ကချင်လွတ်လပ်ရေး တပ်မတော် KIA၊ PDFပူးပေါင်းတပ်ဖွဲ့ တို့ သိမ်းပိုက်ထားပြီး စစ်ကောင်စီတပ်သားများက ထွက်ပြေးကာ မိုးမိတ်မြို့ ရွှေဂူကျောင်း၊ ရွှေကြာပင်ကျောင်း စသည့်ဖြင့် ဘုန်းကြီးကျောင်းနှင့် နေအိမ်များတွင် ဝင်ရောက်နေရာယူထားကြောင်း ဒေသခံများက ဆိုသည်။

ယင်းတိုက်ပွဲကြောင့် ထွက်ပြေးတိမ်းရှောင်ရသည့် စစ်ဘေးများလည်း လက်ရှိတွင် မန်အုံရွာ၊ မိုးဘုံရွာ၊ မန်ကျည်းပင်ရွာ၊ ကင်းချောင်းရွာ၊ သစ်ဆိမ့်ကုန်း စသည့်ကျေးရွာများရှိ ဘုန်းကြီးကျောင်းသို့ သွားရောက် ခိုလှုံနေရသည်။

“အခုစစ်ဘေးရှောင်တွေတော့ အထက်ပိုင်း၊ အောက်ပိုင်း ဘုန်းတော်ကြီးကျောင်းတွေမှာ ရှောင်နေရတယ်။ စစ်ဘေးရှောင်ဦးရေ အသိအကျမသိရသေးဘူး။ မိုးဘုံမှာဆိုရင်တော့ ပုဗ္ဗာရုံကျောင်း ကိုယ်ရင်လေးတွေ၊ လူတွေနဲ့ဆိုရင် ရာချီရှိလောက်တယ်။ အခုစားနပ်ရိက္ခာတွေ လိုအပ်နေတယ်”ဟု စစ်ဘေးရှောင် တစ်ဦးက ပြောသည်။

မိုးမိတ်မြို့တွင် စစ်ကောင်စီနှင့် ကချင်လွတ်လပ်ရေးတပ်မတော် KIA၊PDF ပူးပေါင်းတပ်ဖွဲ့တို့အကြား ရက်သတ္တပတ် ၁ ပတ်အကြာတိုက်ပွဲကြောင့် ပြည်သူ ၁၅ ဦး သေဆုံးသွားခဲ့ကြောင်း သိရသည်။