သျှမ်းပြည် လွိုင်လင်ခရိုင်၊ နမ့်စန်မြို့ရှိ စစ်ကောင်စီ၏ လေတပ်စခန်းမှ တိုက်လေယာဥ် အတက် အဆင်းသည် နေ့/ည အချိန်မရွှေးပျံသန်းမှု ရှိနေကြောင်း စုံစမ်းသိရသည်။
ယခုရက်ပိုင်းအတွင်း နမ့်စန်မြို့ရှိ စစ်ကောင်စီ လေတပ်စခန်းမှ တိုက်လေယာဥ်များသည် တစ်နေ့လျှင် ပျှမ်းအားဖြင့် ၅ ကြိမ် မှ ၆ ကြိမ် အထိ အတက်အဆင်းပြုလုပ် ပျံသန်း နေလျက်ရှိကြောင်း အသက် (၃၀) ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။
“တိုက်လေယာဥ်ဆိုတာ သိတဲ့ အတိုင်းလေ အသံတွေ အရမ်းကျယ်တာ။ နေ့ဘက် ပျံတဲ့ အချိန်မှာဆိုရင် နိမ့်နိမ့်လေးပဲ ပျံကြတာ။ မိုးကာ မိုးထားတဲ့ အမိုးတွေ၊ ထီးတွေဆို လွင့်ကုန်တာ။ ညဘက်ဆိုလည်း အဲ့ အသံ ကြားတာနဲ့ လူက လန့်နှိုးပြီး တော်တော်နဲ့ အိပ်မရပြန်ဘူး။ ဒီလိုဖြစ်တာ တစ်ပတ်ဆယ်ရက် ရှိပြီ” ဟု လုံခြုံရေး အရ အမည်မဖော်လိုသူ အသက် (၃၀) ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ နမ့်စန်တိုက်လေယာဥ် နေ့/ည အချိန်မရွှေး ပျံသန်းမှုကြောင့် ဒေသခံများအတွက် အနှောင့်အယှက် ဖြစ်ရသကဲ့သို့ သက်ကြီး ရွယ်အို နှင့် နှလုံးရောဂါရှိသူများ၊ ထိတ်လန့်လွယ်သူများအတွက် လည်း စိုးရိမ်ရကြောင်း ဒေသခံများက ဆက်ပြောသည်။
အာဏာသိမ်း စစ်ကောင်စီသည် နမ့်စန်မြို့မှ တိုက်လေယာဥ်များ၊ စစ်ရဟတ်ယာဥ်များဖြင့် သျှမ်းပြည် မြောက်ပိုင်း အတွင်းဖြစ်ပွားနေသည့် ၁၀၂၇ စစ်ဆင်ရေး ၊ တိုင်းရင်းသားလက်နက်ကိုင်တပ်ဖွဲ့များ နှင့် ထိုးစစ်ဆင် တိုက်ခိုက်ရေးတို့၌ အသုံးပြုနေကြောင်းလည်း နမ့်စန်မြို့မှ စစ်တပ် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
“ဒီက တိုက်လေယာဥ်တွေနဲ့ တိုက်ပွဲတွေ ဖြစ်တဲ့ နေရာတွေကို သွားတိုက်ကြတာလေ။ အခုဆို တပ်ထဲမှာ လည်း ဘယ်သူက ရှေ့တန်းထွက်ရမယ် အလှည့်ကျဖြစ်အောင် စီစဥ်ပေးသင့်တယ် ဆိုပြီး အငြင်းပွား နေတာတွေ လည်း ရှိနေကြပြီ။ မထွက်ချင်ကြဘူးလို့ ပြောကြတယ်။ ဒါပေမဲ့ နေ့တိုင်းတော့ လေယာဥ် အတက်အဆင်း ရှိနေတယ်” ဟု နမ့်စန်မြို့မှ စစ်တပ်နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဇန်နဝါရီလ ၁၆ ရက်နေ့ သျှမ်းပြည် ၊ ကွတ်ခိုင်မြို့နယ် ၊ နမ့်ဖတ်ကာ၌ ကချင်လွတ်လပ်ရေး တပ်မတော် (KIA) မှ ပစ်ချလိုက်သည့် စစ်ကောင်စီတပ်၏ လေတပ်မှ FTC 2000G တိုက်လေယာဉ်မှ လေယာဉ် မှူး ဗိုလ်မှူးကျော်သူရ နှင့် တွဲဘက်လေယာဉ်မှူး ဗိုလ်ကြီးကောင်း ထက်စံတို့သည် နမ့်စန်လေတပ်စခန်းမှ ဖြစ်ကြကြောင်းလည်း ခေတ်သစ် သတင်းဌာနက ရေးသား ဖော်ပြထားသည်။
Leave a Comments