သျှမ်းပြည် ကျောက်မဲမြို့နယ်တွင် အမည်မသိလက်နက်ကိုင်အဖွဲ့ကြောင့် အရပ်သားတစ်ဦး သေနတ်ပစ်ခတ်ခံရပြီး ပရဟိတအသင်းမှ ကူညီသူအချို့လည်း ဖမ်းဆီးခံရကြောင်း စုံစမ်းသိရသည်။
ယနေ့ (ဇန်နဝါရီလ ၁၇ ရက်) နံနက် ၇ နာရီခွဲအချိန်ခန့်က ကျောက်မဲမြို့ ရပ်ကွက်(၁)တွင် အသက် ၂၇ နှစ်အရွယ်ရှိ စိုင်းခွန်ချို ဆိုသူကို အမည်မသိ လက်နက်ကိုင်အဖွဲ့တစ်ခုက သေနတ်ဖြင့် ပစ်ခတ်ခဲ့ခြင်းကြောင့် ထိခိုက်ဒဏ်ရာရရှိခဲ့ကြောင်း ကျောက်မဲမြို့ဒေသခံများက ပြောသည်။
“မနက် ၇ နာရီခွဲ အချိန်လောက်က ဘယ်ကမှန်းမသိတဲ့ လက်နက်ကိုင်အဖွဲ့က လာပြီးတော့ ပြည်သူတစ်ယောက်ကို သေနတ်နဲ့ ပစ်သွားတယ်။ ကမ္ဘောဇသျှမ်းကျောင်း အနောက်ဘက်မှာ ပစ်ခံရတာ၊ တစ်ယောက်ထဲ တစ်နေ့လုပ်မှ တစ်နေ့စားရတဲ့လူကိုဗျာ။ ကျောကုန်းကနေ သေနတ်ပစ်ခံရတာ ကျည်က ဗိုက်ကနေ ပြန်ထွက်လာတော့ အူတွေကော ထွက်ကျလာတယ်”ဟု ကျောက်မဲမြို့မှ ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဇန်နဝါရီလ ဒုတိယပတ်တွင်လည်း ကျောက်မဲမြို့ရှိ “အိုမ်တမာဝ်း” လူမှုကူညီရေးအသင်းမှ ကူညီလှုပ်ရှားသူများကိုလည်း အမည်မသိ လက်နက်ကိုင်အဖွဲ့မှ အရပ်ဝတ်ဖြင့် ဖမ်းဆီးခေါ်ဆောင်သွားပြီး ယနေ့အထိ ပြန်လည်လွတ်မြောက်လာခြင်း မရှိသေးကြောင်း ကျောက်မဲဒေသခံများထံမှ သိရသည်။
“အရင်က အိုမ်တမာဝ်းအဖွဲ့ထဲမှာ လှုပ်ရှားတဲ့သူတချို့ အဖမ်းခံရတာ။ မသန်းနု အပါအဝင် လေးငါးယောက် အဖမ်းခံရတယ်လို့တော့ ကြားတယ်။ ဘာကြောင့် ဖမ်းခံရလဲဆိုတာတော့ သေချာမသိဘူး။ ဖမ်းခံရတာကတော့ ၈ ရက်လောက် ရှိတော့မယ်၊ စစ်ဝတ်စုံနဲ့မဟုတ်ဘဲ သေနတ်ကိုင်ပြီး အရပ်ဝတ်နဲ့ ဝင်ဖမ်းသွားတာ။ ဘယ်အဖွဲ့က ဖမ်းခေါ်သွားမှန်း သေချာမသိရဘူး”ဟု ကျောက်မဲမြို့မှ အမည်မဖော်လိုသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယခုကဲ့သို့ ကျောက်မဲမြို့တွင် အမည်မသိ လက်နက်ကိုင်အဖွဲ့များက သေနတ်ကိုင်ဆောင်ပြီး မြို့ပေါ်၌ ပေါ်ပေါ်ထင်ထင် သွားလာနေကြခြင်းကြောင့် ပြည်သူများမှာ လုံခြုံရေး စိုးရိမ်ထိတ်လန့်နေရကြောင်း ဒေသခံများက ပြောသည်။
“အခုက မြို့ထဲမှာဆိုရင် သူတို့သေနတ်ပဲတွေ့ရတယ်၊ အရပ်ဝတ်တွေနဲ့ဆိုတော့ ဘယ်အဖွဲ့ကမှန်း မသိဘူး။ အဲ့လိုပဲ လူတွေကို လာဖမ်းသွားရင်လည်း ဘယ်အဖွဲ့က လာခေါ်သွားတယ် ဖမ်းသွားတယ်ဆိုတာ သေချာမပြောနိုင်ဘူး။ အဲ့တာကြောင့် လူတွေက လွတ်လွတ်လပ်လပ် ရှာစားဖို့တောင်မှ ကျီးလန့်စာစား ဖြစ်နေကြတယ်”ဟု ကျောက်မဲမြို့မှ ဈေးသည်တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဇန်နဝါရီလ ၁၃ ရက်တွင်လည်း ကျောက်မဲမြို့နယ်မှ အသက်(၃၀)ဝန်းကျင် အမျိုးသားတစ်ဦးကို ညီနောင်မဟာမိတ်တပ်များအတွက် ရိက္ခာဝယ်ပေးသူဟု စွပ်စွဲကာ စစ်ကောင်စီတပ်မှ ဖမ်းဆီးခေါ်ဆောင်သွားကြောင်း ကျောက်မဲဒေသခံများမှ သိရသည်။
