သျှမ်းပြည် ကွတ်ခိုင်မြို့နယ် နမ့်ဖတ်ကာကျေးရွာတွင် စစ်ကောင်စီတပ်၏ ဂျက်ဖိုက်တာတစ်စီးကို ကချင်လွတ်မြောက်ရေးတပ်မတော် (KIA)က ပစ်ချနိုင်ခဲ့ကြောင်း စုံစမ်းသိရသည်။
ယနေ့ (ဇန်နဝါရီလ ၁၆ ရက်) နေ့လယ်အချိန်က ကွတ်ခိုင်မြို့နယ် နမ့်ဖတ်ကာကျေးရွာကို လာရောက်ဗုံးကြဲတိုက်ခိုက်သည့် စစ်ကောင်စီတပ်၏ ဂျက်ဖိုက်တာ လေယာဉ်တစ်စီးကို ကချင်လွတ်မြောက်ရေးတပ် (KIA)က ပစ်ချနိုင်ခဲ့ကြောင်း KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက သျှမ်းသံတော်ဆင့်ကို အတည်ပြုသည်။
“ကျနော်တို့လည်း စစ်ကောင်စီရဲ့ ဂျက်ဖိုက်တာ တစ်စင်းကို ပစ်ချလိုက်တယ်ဆိုတဲ့ သတင်းလောက်ပဲ ကြားပါတယ်။ မြေပြင်သတင်းတွေ၊ အချက်အလက် အသေးစိတ်ကတော့ ကျနော်တို့ ဘာမှမကြားရသေးဘူး။ အဲ့ဘက်ကတော့ ကျနော်တို့ ဖုန်းလိုင်းကလည်း အခက်အခဲ ရှိနေလို့ ကြိုးစားပြီးမှ စုံစမ်းနေဆဲ ဖြစ်ပါတယ်”ဟု KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက သျှမ်းသံတော်ဆင့်ကို အတည်ပြု ပြောဆိုသည်။
စစ်ကောင်စီတပ်၏ ဂျက်ဖိုက်တာသည် ယနေ့ (ဇန်နဝါရီ ၁၆ ရက်) နေ့လယ် ၁၂ နာရီခန့်တွင် နမ့်ဖတ်ကာအနီး မနော်ယန်ဘက်သို့ လာရောက်တိုက်ခိုက်စဉ် ကချင်လွတ်မြောက်ရေးတပ် KIA က ပစ်ချနိုင်ခဲ့သည်ဟု ဒေသခံများက ပြောဆိုသော်လည်း သျှမ်းသံတော်ဆင့်အနေဖြင့် အတည်ပြုနိုင်ရန် ဆက်လက်စုံစမ်းနေသည်။
ကွတ်ခိုင်မြို့နယ် နမ့်ဖတ်ကာကျေးရွာအခြေစိုက် စစ်ကောင်စီတပ် ခလရ-၁၂၃ ကို KIA တပ်ဖွဲ့က ထိုးစစ်ဆင်တိုက်ခိုက်နေပြီး ယမန်နေ့ (ဇန်နဝါရီလ ၁၅ ရက်) ကလည်း နှစ်ဘက်တိုက်ပွဲ ပြင်းထန်ခဲ့ကြောင်း နမ့်ဖတ်ကာမှ ထွက်ပြေးတိမ်းရှောင်နေသူများက ပြောသည်။
“နမ့်ဖတ်ကာလည်း အကုန်လုံး ကြေမွကုန်ပြီ၊ တိုက်ပွဲဖြစ်တာ ရက် ၂၀ ကျော်ပြီလေ။ အဲ့ရက် ၂၀ လုံးလုံးမှာ လေယာဉ်က လာပြီး ချချသွားတော့ ရွာထဲလည်း နာကုန်ပြီ။ စခန်းကတော့ အကုန်မသိမ်းနိုင်သေးဘူး။ အခုက နမ့်ဖတ်ကာမှာ ရှင်းရှင်းပြောရရင် စစ်ကောင်စီတပ်က အလံဖြူမထောင် မညှိတော့ ဆုတ်သွားပြီဆိုလည်း လိုက်ပြီးတော့ ပိတ်ဆို့ပြီးတိုက်မှာပဲ”ဟု နမ့်ဖတ်ကာရွာမှ ထွက်ပြေးတိမ်းရှောင်နေသည့် အသက်(၅၀)အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဇန်နဝါရီ လဆန်းပိုင်းကလည်း ကချင်ပြည်နယ်၊ ဝိုင်းမော်မြို့နယ်တွင် လာရောက်တိုက်ခိုက်သော စစ်ကောင်စီ၏ တိုက်လေယာဉ်တစ်စီးကို KIA က ပစ်ချနိုင်ခဲ့ပြီး လေယာဉ်ပေါ်လိုက်ပါလာသည့် စစ်ကောင်စီတပ်သားအားလုံး သေဆုံးခဲ့ကြောင်း သိရသည်။
