သျှမ်း-ကရင်နီ နယ်စပ်တကြောတွင် တိုက်ပွဲများ စစ်ကောင်စီမှ လက်နက်ကြီးပစ်ခက်မှုကြောင့် သံဃာတော်များ နှင့် ဒေသခံများ စစ်ဘေး‌ရှောင်နေရပြီး စားဝတ်နေရေးအခက်အခဲများ ကြုံတွေ့နေရကြောင်း စုံစမ်းသိရသည်။

သျှမ်း-ကရင်နီ နယ်စပ်တကြော တိုက်ပွဲများ စစ်ကောင်စီမှ လက်နက်ကြီးပစ်ခက်မှုကြောင့် လွိုင်လင်လေးမြို့နှင့် အနီးတဝိုက် ကျေးရွာမှ သံဃာတော်များနှင့် ဒေသခံများပါ ဇန်နဝါရီလ လစမှစ၍ စစ်ဘေး‌ရှောင်နေရပြီး စားဝတ်နေရေး အခက်အခဲများ ကြုံတွေ့ နေရကြောင်း စစ်ရှောင်များက သျှမ်းသံတော်ဆင့်ကို‌ ပြောသည်။

“ပြောရရင်တော့ ၃ရွာ၊ ၄ရွာလောက်ရှိတယ်ပြေးနေရတာ။တစ်ရွာတစ်ရွာဆိုရင် စစ်ဘေးရှောင် လူဦးရေ ၁၅၀ ကနေ ၃၀၀ ကျော်လောက်ရှိတာပေါ့။လက်နက်ကြီး ပစ်တာကို စိတ်ပူရတယ်။ ဘယ်ချိန် ဘယ်နေရာပစ်မှာ လဲဆိုတာ သိမှမသိရတာ။တချို့လဲ ပြောင်းဖူးခြံတွေမှာအိပ်တာရှိတယ် လက်နက်ကြီး တွေလည်း ခြံထဲထိ လိုက်ကျနေတော့ ပြည်သူတွေလည်း ပြေးနေရတာပေါ့။”ဟု စစ်ဘေးရှောင် အမျိုးသားတစ်ဦး က ပြောသည်။

မြို့ထဲရွာထဲကို လက်နက်ကြီးကျရောက်ပေါက်ကွဲမှုကြောင့် ထွက်ပြေးနေရပြီး နေအိမ်ပျက်စီးမှုများ၊ လက်နက်ကြီး ထိခိုက်မှု နှင့် သေဆုံးမှုများရှိကြောင်းကိုလည်း စစ်ဘေးရှောင်အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ဇန်နဝါရီ ၁၄ ရက်ကလည်း လက်နက်ကြီးတွေပစ်လို့ အိမ်တွေ၊လူတွေထိလို့ ထွက်ပြေးတာရှိတယ်။ ၂ ယောက်ထိတယ် ကျည်စမှန်တာပေါ့။မထွက်ပြေးခင်တုန်းကတော့ ၁၀ နှစ် မိန်းကလေးတစ်ယောက်ထိပြီး သေတယ်။ပြန်တာတော့ မပြန်ရဲသေးဘူး။ပြောင်းတွေလဲ မပြီးသေဘူး။တချို့ပြောင်းဖူးပြန် ယူတဲ့ဟာတွေလည်း ပြန်ပြေးနေရတယ်။”ဟု ‌စစ်ဘေးရှောင်အမျိုးသမီးတစ်ဦး ကပြောသည်။

ထိုစစ်ဘေးရှောင်လာသူများက သျှမ်း-ကရင်နီ နယ်စပ် ဆီဆိုင်မြို့နယ်နှင့် မိုးဗြဲမြို့နယ် တို့တွင် စစ်ဘေးရှောင် လာကြပြီး စားနပ်ရိက္ခာ နှင့် နေရာထိုင်ခင်းအခက်အခဲများ လိုအပ်နေကြောင်း ဒေသခံများက ပြောသည်။ လက်ရှိတွင် စစ်ကောင်စီမှ လက်နက်ကြီးပစ်ချမှုကြောင်း လူနေအိမ်အချို့လည်းပျက်စီးခဲ့ပြီး နေရပ်ပြန်ရန်လဲ စိုးရိမ်မှုများရှိနေကြောင်းသိရသည်။

ထို့ပြင် သျှမ်းပြည် ဖယ်ခုံမြို့ရှိ ရပ်ကွက်အချို့နှင့်ရဲစခန်းအပါအဝင် အစိုးရဌာနများကို ကရင်နီတော်လှန်ရေးတပ်ဖွဲ့များမှ ထိန်းချုပ်နိုင်ခဲ့ပြီးနောက် စစ်ကောင်စီမှ လေကြောင်းဖြင့် လက်နက်ကြီးပစ်ခတ်မှုရှိနေကြောင်းသိရသည်။