သျှမ်းပြည် သိန္နီမြို့သိမ်းတိုက်ပွဲတွင် ပါဝင်တိုက်ခိုက်ခဲ့သော ပြည့်သူ့လွတ်မြောက်ရေးတပ်မတော် (PLA) မှ ရဲဘော် ၁၂ ဦး ကျဆုံးခဲ့ကြောင်း သတင်းသိရသည်။

အောက်တိုဘာလ ၂၇ ရက်နေ့က စတင်ခဲ့သည့် “၁၀၂၇ စစ်ဆင်ရေး”အတွင်း ညီနောင်မဟာမိတ်တပ်များနှင့်အတူ ပါဝင်ဆင်နွှဲခဲ့သည့် ပြည်သူ့လွတ်မြောက်ရေးတပ်မတော် PLA မှ ရဲဘော် ၁၂ ဦးသည် သိန္နီမြို့သိမ်းတိုက်ပွဲအတွင်း အသက်စွန့်ခဲ့ကြကြောင်း ယမန်နေ့ (ဇန်နဝါရီလ ၁၅ ရက်)က သတင်းထုတ်ပြန်လာသည်။

သိန္နီမြို့သိမ်းတိုက်ပွဲ အောင်မြင်မှုသည် PLA ရဲဘော်များက ရဲရင့်စွာ တိုက်ပွဲဝင်ခဲ့သည့်အတွက် ရရှိခဲ့ခြင်းဖြစ်ပြီး ပြည်သူ့ဒီမိုကရေစီ လက်နက်ကိုင်တော်လှန်ရေးကို ဆုံးခန်းတိုင် ဆင်နွှဲသွားမည်ဖြစ်ကြောင်း PLA တပ်ဖွဲ့၏ ထုတ်ပြန်ချက်တွင် ဆိုထားသည်။

ထို့အပြင် ကျဆုံးခဲ့သည့် ရဲဘော်များကို “သိန္နီတိုက်ပွဲ အာဇာနည်”များအဖြစ် မှတ်တမ်းတင်ဂုဏ်ပြုပြီး မိသားစုများနှင့် ထပ်တူဝမ်းနည်းကြောင်း ပြည်သူ့လွတ်မြောက်ရေးတပ်မတော်၏ ဗဟိုနိုင်ငံရေးဌာနက ထုတ်ပြန်ကြေညာသည်။

သိန္နီမြို့သိမ်းတိုက်ပွဲအတွင်း ထိခိုက်ဒဏ်ရာရရှိခဲ့သည့် PLA တပ်ဖွဲ့၏ ရဲဘော်အရေအတွက်နှင့် ဖမ်းဆီးရမိသည့် စစ်သုံ့ပန်းတို့ကို သျှမ်းသံတော်ဆင့်မှ PLA ထံသို့ ဆက်သွယ်မေးမြန်းထားသော်လည်း လက်ရှိအချိန်ထိ ပြန်လည်ဖြေကြားခြင်း မရှိသေးပါ။

ပြည်သူ့လွတ်မြောက်ရေးတပ်မတော် (PLA) အနေဖြင့် “၁၀၂၇ စစ်ဆင်ရေး” စတင်စဉ်က သိန္နီမြို့သိမ်းတိုက်ပွဲတွင် ကိုးကန့်တပ်ဖွဲ့ MNDAA နှင့်အတူ ပါဝင်တိုက်ခိုက်ခဲ့ပြီး လားရှိုး-သိန္နီအကြားရှိ အကောက်ခွန်ဦးစီးဌာန လက်အောက်ခံ ရေပူအမြဲတမ်း စစ်ဆေးရေးဂိတ်ကိုလည်း တိုက်ခိုက်သိမ်းပိုက်နိုင်ခဲ့သည်။

ထို့အပြင် ဇန်နဝါရီလ ၇ ရက်နေ့က သိန္နီမြို့အခြေစိုက် စစ်ဆင်ရေးကွပ်ကဲမှုဌာနချုပ် စကခ-၁၆ ကို ညီနောင်မဟာမိတ်တပ်များနှင့်အတူ ပြည်သူ့လွတ်မြောက်ရေးတပ်မတော် (PLA) ပါဝင်သော ပူးပေါင်းတပ်ဖွဲ့တို့က “၇၂”ရက်ကြာ တိုက်ခိုက်ပြီးနောက် အပြီးသတ် သိမ်းပိုက်နိုင်ခဲ့ကြောင်း PLA ပြည်သူ့လွတ်မြောက်ရေးတပ်မတော် အထွေထွေအတွင်းရေးမှူး ရဲဘော်နီနီကျော်က သျှမ်းသံတော်ဆင့်ကို ဖြေကြားထားသည်။