သျှမ်းပြည် ကွတ်ခိုင်မြို့နယ်ရှိ နမ့်ဖက်ကာမှ စစ်ကောင်စီ၏ တပ်စခန်းနေရာများကို ကချင်လွတ်လပ်ရေး တပ်မတော် (KIA) နှင့် ပူးပေါင်း တပ်ဖွဲ့များက ဝင်ရောက်တိုက်ခိုက် သိမ်းပိုက်နိုင်ခဲ့ကြောင်း မြေပြင် သတင်းပေးပို့ချက်အရသိရသည်။
ယမန်နေ့ (ဇန်နဝါရီလ ၁၄) ရက်နေ့ ညပိုင်းအချိန်မှ စတင်ပြီး ယနေ့ (ဇန်နဝါရီလ ၁၅ )ရက် နံနက်ပိုင်း အချိန်အထိ နမ့်ဖက်ကာ နှင့် အနီးတစ်ဝိုက်၌ အာဏာသိမ်းစစ်ကောင်စီ တပ်နှင့် KIA ပူးပေါင်းတပ်တို့၏ တိုက်ပွဲ ပြင်းထန်ခဲ့ပြီး စစ်ကောင်စီ၏ တပ်စခန်းဖြစ်သည့် ခြေလျင်တပ်ရင်း (ခလရ-၁၂၃)ကို KIA တို့ သိမ်းပိုက်နိုင်ခဲ့ကြောင်း ခိုင်လုံသည့် သတင်းရင်းမြစ် တစ်ဦးက သျှမ်းသံတော်ဆင့်ကိုပြောသည်။
“စစ်ကောင်စီ ခလရ (၁၂၃) ကိုတိုက်ကြတာပေါ့။ မနေ့ညကတည်းက တိုက်ပွဲတွေ ပြင်းထန်ခဲ့တာ ဒီနေ့မနက်ပိုင်းရောက်တော့ အသံငြိမ်သွားတယ်။ စခန်းလည်း ကျသွားပြီတဲ့။ မနေ့ညကတည်း စခန်းကို စကစအဖွဲ့က လက်လွတ်လိုက်တယ်လို့လည်း သတင်းကြားတယ်” ဟု ၎င်းကဆိုသည်။
ထိုသိမ်းပိုက်ရရှိသည့် စစ်ကောင်စီ တပ်၏ ခလရ -၁၂၃ တပ်တွင်းမှ လက်နက်ခဲယမ်း အမြောက်အမြားကိုလည်း KIA နှင့် ပူးပေါင်းတပ်ဖွဲ့တို့ သိမ်းဆည်းရမိကြောင်း သတင်းများ ထွက်ပေါ်နေသည်။
“လက်နက်ခဲယမ်းတွေလည်း အများကြီး သိမ်းဆည်းရမိတယ်။ ဒါပေမဲ့ KIA ရဲ့ ဗျူဟာအရတော့ သိမ်းမိတဲ့ လက်နက်ပုံတွေ ထုတ်ပြမယ်မထင်ဘူး။ “ ဟု အထက်ပါ သတင်းရင်းမြစ်က ဆက်ဆိုသည်။
အဆိုပါ တိုက်ပွဲအတွင်း၌ အရပ်သားနေအိမ် ထိခိုက်ပျက်စီးခြင်း၊ အရပ်သားများ ထိခိုက်ဒဏ်ရာရခြင်းတို့လည်း ရှိနေကြောင်း သတင်းများထွက်ပေါ်နေသော်လည်း သျှမ်းသံတော်ဆင့် အနေဖြင့် သီးခြား အတည်ပြုချက် မရရှိသေးပေ။
ယင်းကဲ့သို့ စစ်ကောင်စီ တပ်စခန်း သိမ်းတိုက်ပွဲနှင့် ပတ်သက်ပြီး အသေးစိတ် မေးမြန်း သိရှိနိုင်ရန် အတွက် ကချင် လွတ်လပ်ရေး တပ်မတော် (KIA) ၏ ပြောရေးဆိုခွင့်ထံသို့ ဖုန်းဖြင့် ဆက်သွယ်ခဲ့သော်လည်း အဆက်အသွယ် မရရှိခဲ့ပေ။
၁၀၂၇ စစ်ဆင်ရေးကာလအတွင်း တိုက်ပွဲပြင်းထန်လာသည့် ကွတ်ခိုင်မြို့ နှင့် နမ့်ဖက်ကာတို့တွင် ဖုန်းလိုင်း၊ အင်တာနက်လိုင်း ဖြက်တောက်ခံထားရကြောင်းလည်း သိရသည်။
