ပြင်ဦးလွင်မြို့နယ် ကျေးရွာများမှ ဒေသခံများကို ရပ်ရွာလုံခြုံရေးအတွက်ဆိုပြီး စစ်ကောင်စီနှင့် အုပ်ချုပ်ရေးမှူးက ခေါ်ယူကာ စစ်သင်တန်းပေးနေကြောင်း စုံစမ်းသိရသည်။
ယမန်နေ့ (ဇန်နဝါရီလ ၁၄ ရက်)တွင် ပြင်ဦးလွင်မြို့နယ် အင်းပုတ်ကျေးရွာနေ ဒေသခံများကို မဖြစ်မနေ ရပ်ရွာလုံခြုံရေး စစ်သင်တန်းတက်ရမည်ဟုဆိုပြီး စစ်ကောင်စီနှင့် အုပ်ချုပ်ရေးမှူးက ဖိအားပေးခေါ် ယူခဲ့ကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“ရပ်ရွာလုံခြုံရေးဆိုပြီး ခေါ်နေတာ။ ရွာကလူတွေ မသွားချင်လည်း အတင်းခေါ်နေတယ်။ ရွာတိုင်းကို လူခေါ်ပြီး စစ်သင်တန်းပေးမယ်လို့လည်း ပြောတယ်။ မနေ့ကတော့ အင်းပုတ်ရွာက ၃ ယောက် သွားရတယ်” ဟု ၎င်းက ပြောသည်။
ရပ်ရွာလုံခြုံရေးစစ်သင်တန်းတက်ရောက်ရန် အသက် ၅၀ နှစ်အောက် အမျိုးသားတွေကို တစ်ရွာလျှင် အနည်းဆုံး ၃ ဦးမှ ၁၀ ဦးအထိ တက်ရောက်ရမည်ဖြစ်ကြောင်း သိရသည်။
အဆိုပါ စစ်သင်တန်းကို ယမန်နေ့ (ဇန်နဝါရီ ၁၄)ရက်တွင် မြို့နယ်စုပေါင်းရုံး အစည်းဝေးခန်းမသို့ သွားတက်ရပြီး တက်ရောက်ဦးရေ စုစုပေါင်း နှစ်ရာကျော်ရှိကြောင်း ကိုယ်တိုင်သွားရောက်သူနှင့် နီးစပ်သူထံမှ သိရသည်။
“ပြည်သူ့အတွက် ကာကွယ်စောင့်ရှောက်ရမယ်။ ကိုယ့်ကျေးရွာအတွက် ကာကွယ်ရမယ်။ တခြားလက်နက်ကိုင်တွေ ရွာထဲလာ ဆိုရှိရင်လည်း အကြောင်းကြားပေးဖို့၊ ဘယ်လိုကာကွယ်ဖို့ ဘယ်လိုပြန်တိုက်ခိုက်ဖို့ နည်းလေးတွေလည်း ပြောပြတယ်။ လောလောဆယ်တော့ သူတို့လက်နက်ပေးမကိုင်ဘူး။ လိုအပ်ခဲ့မယ်ဆိုရင်တော့ ပေးကိုင်မယ်” ဟု ပြောသည်။
ယင်းကဲ့သို့ စစ်ကောင်စီမှ ရပ်ရွာလုံခြုံရေးအကြောင်းပြပြီး စစ်သင်တန်းပေးနေသောကြောင့် သင်တန်းပြီးစီးလျှင် စစ်သားလုပ်ရမည်ကို စိုးရိမ်နေရသလို တိုက်ပွဲဖြစ်ပွားလာပါက စစ်တိုက်ရမည်ကို စိုးရိမ်နေလျက်ရှိကြောင်း ဒေသခံအမျိုးသမီးတစ်ဦးက ဆက်ပြောသည်။
“အခုကသူတို့အင်အားမရှိတော့ဘူးလေ။ တကယ်လို့ သူများကသူတို့ကိုလာတိုက်ရင် အခုစစ်သင်တန်း တက်ထားရသူတွေ အတင်းအဓ္ဓမ စစ်သားလုပ်ခိုင်းပြီး တိုက်ခိုင်းမှာပဲကြောက်တယ်။ စစ်သင်တန်း တက်ပြီးပြီးဆိုရင်တော့ လွယ်လွယ်နဲ့ သူတို့တပ်သားအဖြစ် ခေါ်ယူလို့ရပြီလေ။ နောက်ပြီး သတင်းတွေ ပို့ပေးဖို့အတွက်လားပေါ့။ ကျမတို့ စိတ်ပူရတာတော့ စစ်သင်တန်းတက်ပြီးရင် စစ်သားလုပ်ရမှာပဲ ကြောက်တယ်” ဟု ကျေးရွာဒေသခံ အမျိုးသမီးတစ်ဦးက ထပ်လောင်းပြောသည်။
စစ်တပ်အာဏာသိမ်းပြီးနောက်ပိုင်း စစ်ကောင်စီသည် တိုင်းရင်းသားလက်နက်ကိုင်များ၊ ပြည်သူ့ကာကွယ်ရေး PDF များတို့နှင့် နေ့စဉ်ထိတွေ့တိုက်ပွဲ ဖြစ်ပွားနေလျက်ရှိသဖြင့် အင်အား အလုံအလောက် မရှိတော့ပေ။
လက်ရှိ သျှမ်းမြောက် “၁၀၂၇ စစ်ဆင်ရေး” ရက် ၇၀ ကျော် တိုက်ပွဲများအတွင်း စစ်ကောင်စီတပ် အင်အား ၁,၀၀၀ ကျော် ပြုန်းတီးခဲ့သည်ဟု တပ်တွင်းသတင်းရင်းမြစ်က ဆိုသည်။
Leave a Comments