သျှမ်းပြည်နယ် မြောက်ပိုင်းတွင် ပြီးခဲ့သည့် နို၀င်ဘာလ ၂၇ ရက်နေ့က စတင်ခဲ့သည့် ညီနောင်မဟာမိတ်တပ်များ၏ ‘၁၀၂၇ စစ်ဆင်ရေး’ ရက်ပေါင်း ၇၀ ကျော် တိုက်ပွဲများ အတွင်း စစ်ကောင်စီ တပ်အင်အား ၁,၀၀၀ ကျော် ပြုန်းတီးခဲ့သည်ဟု တပ်တွင်းသတင်းရင်းမြစ်က ယနေ့ (ဇန်နဝါရီ ၁၄ ရက်နေ့) တွင် ပြောသည်။
ပြီးခဲ့သည့်နှစ် နို၀င်ဘာလ ၂၇ ရက်မှ အပစ်ရပ် လက်မှတ်ရေးထိုးသည့် ယခုနှစ် ဇန်နဝါရီလ ၁၁ ရက်နေ့ အထိ ကောက်ယူထားသည့် စာရင်းများအရ ပြင်ဦးလွင်နှင့် မန္တလေး စစ်ဆေးရုံ အပါအ၀င် စစ်ဆေးရုံများ၌ တက်ရောက်ကုသနေသည့် ဒဏ်ရာရ စစ်သားများ အနက် အနည်းဆုံး ၃၀၀ ကျော် သေဆုံးခဲ့ကြောင်း တပ်တွင်း သတင်းရင်းမြစ်က ဆိုသည်။
“စစ်ဆေးရုံတွေ၊ သျှမ်းမြောက် တပ်ရင်းတပ်ဖွဲ့တွေဆီက ရသမျှ စာရင်းပြုစုနေပါတယ်။ ရှေ့တန်းမှာ သေဆုံး၊ ပျောက်ဆုံးတာ၊ ဒဏ်ရာရပြီး ဆေးရုံမှာ သေဆုံးတာ၊ အတိုအပြတ် ကိုယ်လက်အင်္ဂါ ချွတ်ယွင်းသွားတာနဲ့ဆို စုစုပေါင်း အင်အား ပြုန်းတီးမှုက ၁,၀၀၀ ကျော်ရှိပါတယ်။ ဒါကျနော်တို့ ပြုစုထားတဲ့ စာရင်းပါ။ ဒီထက်လည်း များနိုင်ပါတယ်” ဟု ၄င်းကရှင်းပြသည်။
၄င်းတို့ ပြုစုထားသည့် စာရင်းများအရ ရှေ့တန်းတွင် သေဆုံး၊ ပျေက်ဆုံးသူ အနည်းဆုံး စစ်သား ၅၀၀ ကျော်ရှိပြီး ကိုယ်လက်အင်္ဂါ ချွတ်ယွင်းသွားသည့် စစ်သား အနည်းဆုံး ၂၀၀ ကျော် ရှိသည်ဟု သိရသည်။
သျှမ်းမြောက်တွင် ဖြစ်ပွားခဲ့သည့် ပြင်းထန်သည့် တိုက်ပွဲများ အတွင်း ကျဆုံး ဒဏ်ရာရရှိသည့် စာရင်းများကို ညီနောင်မဟာမိတ်တပ်များနှင့် စစ်ကောင်စီတပ် နှစ်ဖက် စလုံးက ထုတ်ပြန်ခြင်း မရှိသည်ကို တွေ့ရသည်။
လက်ရှိ နိုင်ငံတဝှမ်း စစ်ကောင်စီတပ်များမှ ထွက်ပြေးနေသည့် စစ်သား အများအပြား ရှိနေသော်လည်း စာရင်းကောက်ယူရန် အခက်အခဲ များစွာ ရှိနေသည်ဟု တပ်တွင်း သတင်းရင်းမြစ်များက ဆိုသည်။
သျှမ်းသံတော်ဆင့်က သီးခြားကောက်ယူထားသည့် စာရင်းများအရ “၁၀၂၇ စစ်ဆင်ရေး” ရက် ၇၀ ကျော် ကာလအတွင်း စစ်ကောင်စီ လေကြောင်း တိုက်ခိုက်မှု၊ လက်နက်ကြီးနှင့် မြေမြုပ်မိုင်းများကြောင့် အနည်းဆုံး အရပ်သား ပြည်သူ ၁၅၈ ဦး သေဆုံးခဲ့ပြီး ရာပေါင်းများစွာသော ပြည်သူပိုင် အိုးအိမ်များ ပျက်စီးခဲ့သည်။
တရုတ်နိုင်ငံ၊ ကူမင်းမြို့တွင် ပြီးခဲ့သည့် ဇန်နဝါရီလ ၁၀ ရက်နှင့် ၁၁ ရက်၌ ကျင်းပခဲ့သည့် ကူမင်း ဆွေးနွေးပွဲ သဘောတူညီချက်အရ ဇန်န၀ါရီ ၁၁ ရက်၊ ည ၉ နာရီမှစ၍ သျှမ်းမြောက်တွင် ညီနောင်မဟာမိတ်တပ်များနှင့် စစ်ကောင်စီတပ် ယာယီ အပစ်အခတ် ရပ်စဲသည်ဟု ကြေညာထားသော်လည်း ယမန်နေ့က ကျောက်မဲမြို့တွင် တိုက်ပွဲ ပြင်းထန်စွာ ဖြစ်ပွားခဲ့သည်။
