တောင်ကြီးမြို့ပေါ်တွင် စစ်တပ်နှင့် ပအိုဝ်း အမျိုးသားအဖွဲ့ချုပ်ပါတီ (PNO) တို့မှ ပူးပေါင်းပြီး ပြည်သူများကို နေ့စားခပေးကာ ဆန္ဒပြပွဲ ပြုလုပ်ခဲ့ကြောင်း ဒေသခံများ ပြောပြချက်အရ သိရသည်။
ယနေ့( ဇန်နဝါရီလ ၁၂) ရက် တွင် တောင်ကြီးမြို့ပေါ်တွင် စစ်တပ်နှင့် PNOတို့ ပူးပေါင်းပြီး ညီနောင် မဟာမိတ် သုံးဖွဲ့ဖြစ်သည့် ပလောင်တပ် TNLA၊ ကိုးကန့်တပ် MNDAA နှင့် ရက္ခိုင်တပ်တော် (AA) တို့ အလိုမရှိကြောင်း ဆန္ဒဖော်ထုတ်ခဲ့ကြပြီး ဆန္ဒပြပွဲတွင် ပါဝင်သည့် သူများကို နေ့စားခ ၁ သောင်းခွဲ ပေးပြီး ခေါ်ထားကြောင်း စုံစမ်းသိရှိရပါသည်။
ထိုကဲ့သို့ ဆန္ဒပြပွဲ ပြုလုပ်ရာတွင် လမ်းတလျှောက်တွင် လုံခြုံရေးများ သေချာစွာ ချထားကြောင်းကို ဒေသခံတစ်ဦးက ယခုလို ပြောသည်။
” မနက်က သူတို့ ရွာကလူတွေ ကားနဲ့ တက်လာတာ တွေ့တယ်။ တောင်ကြီး ဘောလုံးကွင်းမှာ လူစုကြတာ။ အဲနားတစ်ဝိုက်ကလည်း မော်တော်ပီကယ်တွေ ရဲတွေ လုံခြုံရေးယူနေတာ အများကြီး ရှိတယ်”လို့ ဆိုပါတယ်။
အဆိုပါ ဆန္ဒပြ ပွဲတွင် စစ်တပ်နှင့် PNO အဖွဲ့ အပြင် ပြည်ခိုင်ဖြိုးပါတီထောက်ခံသူ၊ ပျူစောထီး နှင့် ပအိုဝ်း တိုင်းရင်းသားတွေပါဝင်ခဲ့ကြတယ်လို့ စုံစမ်းသိရှိရပါသည်။
ထို့အပြင် ဆန္ဒပြပွဲတွင် ပါဝင်နေသူများမှာ ပအိုဝ်းလူမျိုးများ အများဆုံးပါဝင်တာကြောင့် လူမျိုးစုအချင်းချင်း အထင်မြင်လွဲမှားမည်ကိုစိုးရိမ်ကြောင်းယခုလိုဆိုသည်။
” မနက်ကကြည့်တာ ပအိုဝ်း လူမျိုးတွေပဲ များတယ်။ အများစုက ရွာကနေတက်လာကြတာ။ဘာမှသိဟန် မတူဘူး။ နေ့စားခရလို့ လိုက်လာတာတင်တယ်။ ဒီလိုတွေလုပ်တော့ ဒီလူမျိုးစု တိုင်းရင်းသားတွေကြားမှာ အထင်မြင် လွဲမှား မှုတွေဖြစ်လာမာကို စိုးရိမ်တယ်။”လို ဒေသခံအမျိုးသားတစ်ဦးက သျှမ်းသံတော်ဆင့်ကိုပြောပါသည်။
လူအင်အား ၁ ထောင်နီးပါးခန့် ပါဝင်သည့်ဆန္ဒပြသူများသည် အနောက်မြို့ပတ်လမ်း၊ ရတနာသီရိ အုပ်ချုပ်ရေးမှူးရုံးမှ စတင်ခဲ့ပြီး ဗိုလ်ချုပ်အောင်ဆန်း လမ်းမကြီးတစ်လျှောက် ချီတက်ဆန္ဒပြကာ ပြီးဆုံးခဲ့ကြောင်းစုံစမ်းသိရှိရပါသည်။
