သျှမ်းပြည် မိုးမိတ်မြို့နယ် စစ်ကောင်စီတပ်နှင့် တအာင်း(ပလောင်)တပ်ဖွဲ့ TNLA တို့၏ နှစ်ဘက်တိုက်ပွဲအကြား ကလေးတစ်ဦး ထိခိုက်ဒဏ်ရာရရှိပြီး နေအိမ် ၁၀ လုံးကျော် ထိခိုက်ပျက်စီးခဲ့ကြောင်း စုံစမ်းသိရသည်။
ယမန်နေ့ (ဇန်နဝါရီလ ၁၁ ရက်) နေ့လယ် ၁၂ နာရီခန့်တွင် မိုးမိတ်စစ်ကောင်စီတပ်နှင့် TNLA တပ်ဖွဲ့တို့၏ နှစ်ဘက်တိုက်ပွဲအကြား စစ်ကောင်စီတပ်မှ လက်နက်ကြီးဖြင့် ရမ်းသမ်းပစ်ခတ်ခဲ့ခြင်းကြောင့် အုန်းကြောရွာမကြီးမှ အသက် ၉ နှစ်အရွယ်ရှိ ကလေးတစ်ဦး ထိခိုက်ဒဏ်ရာရရှိပြီး နေအိမ် ၁၀ လုံးထက်မနည်း ထိခိုက်ပျက်စီးခဲ့ကြောင်း မိုးမိတ်ဒေသခံများက ပြောသည်။
“အရင်ရက် (ဇန်နဝါရီ ၁၀ ရက်)ကတည်းက အုန်းကြောရွာသစ်ဘက်မှာ တိုက်ပွဲဖြစ်နေတာ။ မနေ့ (ဇန်နဝါရီ ၁၁ ရက်)က နေ့လယ် ၁၂ နာရီခွဲလောက်မှာ စစ်ကောင်စီတပ်က အုန်းကြောဘက်ကို လက်နက်ကြီးနဲ့ အဆက်မပြတ် ပစ်တော့ ရွာမကြီးဘက်က ကလေးတစ်ယောက်ကို ထိတယ်။ ဘုန်းကြီးကျောင်းနဲ့ လူနေအိမ်တွေလည်း ပျက်စီးကုန်တယ်”ဟု မိုးမိတ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
မိုးမိတ်စစ်ကောင်စီတပ်၏ လက်နက်ကြီးကြောင့် အသက် ၉ နှစ်အရွယ်ရှိ စိုင်းမိုးဒီ ဆိုသူ ကလေးတစ်ဦးမှာ နားနှင့် မျက်နှာတို့တွင် ထိခိုက်ဒဏ်ရာရရှိခဲ့ပြီး အုန်းကြောရွာမ ဘုန်းကြီးကျောင်းနှင့် ပြည်သူနေအိမ် ၁၀ လုံးထက်မနည်း ပျက်စီးဆုံးရှုံးခဲ့ရသည်ဟု မိုးမိတ်မြို့နယ် ဒေသခံများမှ သိရသည်။
ဇန်နဝါရီ ၁၀ ရက် ညနေ ၅ နာရီခွဲခန့်မှ စတင်၍ မိုးမိတ်မြို့နယ် အုန်းကြောရွာမကြီးနှင့် ရွာသစ်ကျေးရွာတို့တွင် စစ်ကောင်စီလက်အောက်ခံ ခမရ-၃၄၈၊ ခလရ-၂၂၃/၂၇၆ တို့အပြင် မန္တလေးမှ ထပ်မံအင်အားဖြည့်တင်းလာသော တပ်ရင်းတို့နှင့် TNLA တပ်ဖွဲ့၊ KIA နှင့် PDF ပူးပေါင်းတပ်ဖွဲ့တို့ ထိတွေ့တိုက်ပွဲဖြစ်ပွားခဲ့သည်ဟု မိုးမိတ်မြို့နယ်မှ ၎င်းဒေသခံအမျိုးသားက ဆက်ပြောသည်။
ပြီးခဲ့သည့် ဇန်နဝါရီလ ၃ ရက်နေ့ကလည်း မိုးမိတ်မြို့နယ် မြို့သစ်ကျေးရွာရှိ အုတ်ဖိုဟောင်းတစ်ခုအနီးသို့ စစ်ကောင်စီလက်နက်ကြီး ကျရောက်ပေါက်ကွဲခဲ့ရာ အရပ်သား ၂ ဦး ထိခိုက်ဒဏ်ရာရပြီး အမျိုးသမီးတစ်ဦးမှာ မန္တလေးမြို့ရှိ ဆေးရုံတွင် ဆေးကုသနေစဉ် သေဆုံးသွားခဲ့ကြောင်း မိုးမိတ်ဒေသခံများထံမှ သိရသည်။
ဇန်နဝါရီ လဆန်းပိုင်းမှစ၍ မိုးမိတ်မြို့နယ်အတွင်းရှိ စစ်ကောင်စီတပ်စခန်း ၃ ခုကို TNLA တပ်ဖွဲ့၊ KIA နှင့် PDF ပူးပေါင်းတပ်ဖွဲ့တို့က တိုက်ခိုက်သိမ်းပိုက်ထားပြီး မိုးမိတ်ဒေသခံများမှာ လုံခြုံရေး စိုးရိမ်မှုကြောင့် မန္တလေး၊ ပြင်ဦးလွင်မြို့များသို့ တိမ်းရှောင်ထွက်ပြေးနေကြကြောင်း ဒေသခံများက ပြောသည်
