ကရင်နီပြည်တွင် နိုဝင်ဘာလ ၁၁ ရက်နေ့မှ စတင်ခဲ့သည့် “၁၁.၁၁ စစ်ဆင်ရေး” ၃ လ အတွင်းတွင် ပြည်သူ သေဆုံးမှု ၄၈၀ ခန့် ရှိကြောင်း ကရင်နီ လူ့အခွင့်အရေး အဖွဲ့မှ စုံစမ်းသိရသည်။
ကရင်နီပြည် “၁၁.၁၁ စစ်ဆင်ရေး” တိုက်ပွဲကြောင့် စစ်ကောင်စီမှ လက်နက်ကြီး၊ လေယာဉ်ဖြင့် ဗုံးကြဲ တိုက်ခိုက်မှုများကြောင့် ကလေးအပါအဝင်လူဦးရေ ၄၈၀ နီးပါး ရှိနေကြောင်း ကရင်နီပြည်နယ် ကြားကာလအုပ်ချုပ်ရေး (IEC) အတွင်းရေးမှူး ၂ ဗညားခွန်အောင် က သျှမ်းသံတော်ဆင့်ကိုပြောသည်။
“သေဆုံးတဲ့လူဦးရေက ၄၈၀ ဝန်းကျင်ကပ်သွားပြီဗျ။တိုက်ပွဲတွေမှာကျည်ဆံထိမှန်လို့၊ မဟုတ်ရင်လည်း စစ်ရှောင်တွေ ရှိတဲ့ စခန်းတွေကို စစ်ကောင်စီတွေက လက်နက်ကြီးတွေ၊လေယာဉ်တွေနဲ့ ပစ်လို့ သေဆုံးတဲ့ လူဦးရေစာရင်းပါ။ ပြောမယ်ဆိုရင်တော့ ကလေးနဲ့ အမျိုးသမီးက ပိုများပါတယ်။”ဟု ၎င်းကပြောသည်။
တိုက်ပွဲများ တွင် စစ်ကောင်စီဘက်မှ လက်နက်ကြီး၊ လေယာဉ်နှင့် ဗုံးကြဲ တိုက်ခိုက်မှုများကြောင့် ထိခိုက်ဒဏ်ရာရသူ လူဦးရေး စုစုပေါင်း ၈၀၀ ဝန်းကျင်ထိရှိနေကြောင်းသိရသည်။
“ထိခိုက်တန်ရာရတာတွေကလည်း ၈၀၀ ဝန်းကျင်ရှိပါတယ်။သူတို့တွေကိုတော့ အခြေခံအားဖြင့် နီးစပ်ရာ ကိုယ်ထူကိုယ်ထ ဆေးခန်းတွေမှာပဲ ကုသပေးနေတာတွေရှိပါတယ်။”ဟု ဗညားခွန်အောင်က ပြောသည်။
လွိုင်ကော်မြို့ထဲနှင့်အချို့နေရာ ရပ်ကွက်များတွင် ပြည်သူလူထုများကျန်ရှိနေပြီး ကူညီရန်ခက်ခဲနေသည့် အတွက်ကြောင့် မြို့မှ ထွက်ခွာရန် တိုက်တွန်းရခြင်းဖြစ်ကြောင်း စစ်ရှောင်ကူညီသူများကပြောသည်။
“မြို့ထဲမှာ ကျန်နေတာတွေရှိပါတယ်။ ကျနော်တို့ကတော့ မြို့ကို စွန့်ခွာခိုင်းစေချင်တာပေါ့။ မြို့ကနေ ထွက်သွားဖို့လည်း တိုက်တွန်းတာရှိပါတယ်။ အကြောင်းအရင်းက နှစ်ခုပါ လုံခြုံရေးအတွက်လည်း အန္တရာယ်ရှိတယ်။နောက်တခုက စားဝတ်နေရေး အတွက်က မြို့ထဲမှာသွားပြီးတော့မှ ကူညီပေးရတာ အရမ်းခက်ခဲတယ်’ဟု ကရင်နီလူ့အခွင့်အရေး အဖွဲ့ဒါရိုက်တာ ဦးဗညား က ပြောသည်။
ကရင်နီပြည်တွင် ဖြစ်ပွားသော တိုက်ပွဲများနှင့် စစ်ကောင်စီ၏ လေကြောင်းတိုက်ခိုက် မှုများကြောင့် ကရင်နီပြည်သူများမှာ နီးစပ်ရာ ဒေသသို့ထွက်ပြေးသိမ်းရှောင် ခဲ့ရပြီး ကရင်နီပြည်၏ စစ်ဘေးရှောင်စုစုပေါင်း လူဦးရေမှာ ၄ သိန်း ၂သောင်းကျော် ထိရှိနေကြောင်း သိရသည်။
Leave a Comments