သျှမ်းပြည် သီပေါမြို့နယ်တွင် စစ်ကောင်စီတပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့ ထိတွေ့တိုက်ပွဲ ဖြစ်ပွားနေကြောင်း စုံစမ်းသိရသည်။

ယနေ့ (ဇန်နဝါရီလ ၁၀ ရက်) နံနက် ၈ နာရီခွဲခန့်မှ စတင်၍ သီပေါမြို့နှင့် မိုင် ၂၀ ခန့်အကွာအဝေးရှိ မိုးတေကျေးရွာအနီးတွင် စစ်ကောင်စီတပ်နှင့် TNLA တို့ ထိတွေ့တိုက်ပွဲ ဖြစ်ပွားခဲ့ပြီး သီပေါမြို့အခြေစိုက် ခြေလျင်တပ်ရင်း (ခလရ-၂၃) မှ လက်နက်ကြီးဖြင့် ရမ်းသမ်းပစ်ခတ်နေကြောင်း သီပေါဒေသခံများက ပြောသည်။

“သီပေါမှာ တစ်မနက်ခင်းလုံး လက်နက်ကြီးသံ ကြားနေရတာ။ အခု မန်ဟဲ နဲ့ နားခဲ(နားခိုင်း)ရွာတွေဘက်ကို မပေးသွားတော့ဘူးလို့ ပြောတယ်။ မိုးတေဘက်တော့ မနက် ၈ နာရီခွဲလောက်က စပစ်ပြီး တံတားတစ်ဘက်စီကနေ TNLA တပ်နဲ့ စစ်ကောင်စီတွေ နေရာယူထားပြီး အပြန်အလှန် ပစ်နေကြတယ်။ ခလရ-၂၃ တပ်ကနေလည်း အဲ့ဘက်တွေကို လက်နက်ကြီး ရမ်းပစ်နေတယ်”ဟု သီပေါမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ယမန်နေ့ (ဇန်နဝါရီလ ၉ ရက်) ညအချိန်မှစ၍ သီပေါအခြေစိုက် စစ်ကောင်စီတပ် ခလရ-၂၃ မှ လက်နက်ကြီးဖြင့် တဖက်သက် ရမ်းသမ်းပစ်ခတ်နေခြင်းကြောင့် စံဖိတ်ကျေးရွာမှ ပြည်သူများမှာ စိုးရိမ်ထိတ်လန့်ပြီး သီပေါမြို့ဟောင်းရှိ သျှမ်းစာပေနှင့်ယဉ်ကျေးမှုခန်းမသို့ ထွက်ပြေးတိမ်းရှောင်နေရကြောင်း သီပေါမြို့မှ ၎င်းဒေသခံအမျိုးသားက ဆက်ပြောသည်။

သီပေါနှင့်နမ္မတူမြို့ကြားရှိ မိုးတေတံတားကိုလည်း ပြီးခဲ့သည့် ဒီဇင်ဘာလ ၂၈ ရက်က စစ်ကောင်စီလက်အောက်ခံ ခမရ-၅၀၃/၅၀၄ တပ်ရင်းမှ ဗုံးခွဲဖျက်စီးခဲ့ပြီး တံတားအနီး မိုင်းထောင်ထားခဲ့ခြင်းကြောင့် ဇန်နဝါရီလ ပထမပတ်အတွင်းက မိုးတေရွာသား ၁ ဦးနှင့်SSPP တပ်သား ၁ ဦးတို့ မြေမြှုပ်မိုင်းနင်းမိပြီး ခြေထောက်ပြတ်ဒဏ်ရာရရှိကာ လားရှိုးဆေးရုံကြီးတွင် ဆေးကုသမှုခံယူနေကြောင်း သီပေါဒေသခံများထံမှ သိရသည်။

ညီနောင်မဟာမိတ် ၃ ဖွဲ့နှင့် စစ်ကောင်စီတို့သည် တရုတ်၏ ကြားဝင်စေ့စပ်မှုဖြင့် ဇန်နဝါရီလ ဒုတိယပတ်အတွင်းက တရုတ်နိုင်ငံ ကူမင်းမြို့တွင် တတိယအကြိမ် တွေ့ဆုံဆွေးနွေးခဲ့သည်ဟု စုံစမ်းသိရသော်လည်း ဆွေးနွေးမှုရလဒ် တစုံတရာကို နှစ်ဘက်စလုံးမှ ထုတ်ဖော်ပြောကြားခြင်း မရှိသေးပေ။

အခြားတစ်ဘက်တွင် ညီနောင်မဟာမိတ်များဘက်မှ “၁၀၂၇ စစ်ဆင်ရေး”ကို ဆက်လက်ဆင်နွှဲလျက်ရှိပြီး ရှမ်းမြောက်တွင် သတ်မှတ်ထားသော စစ်ဆင်ရေးပစ်မှတ်များ၊ သိမ်းပိုက်ရယူရမည့်စခန်းများနှင့် မြိုကြီးအချို့ ကျန်ရှိနေသေးကြောင်းလည်း TNLA တပ်ဖွဲ့၏ သတင်းနှင့် ပြန်ကြားရေးဌာနမှ ယနေ့ (ဇန်နဝါရီလ ၁၀ ရက်)တွင် ထုတ်ပြန်ထားသည်။