သျှမ်းပြည် နမ္မတူမြို့နယ် စစ်ရှောင်များ သတ်မှတ်ရက် နေရက်မပြန်ပါက နေအိမ်ချိတ်ပိတ်မည်ဆိုသည့်သတင်းကြောင့် စိုးရိမ်စိတ်ဖြင့် နေရပ်ပြန်နေရကြောင်း စုံစမ်းသိရသည်။
ယခုရက်ပိုင်း နမ္မတူမြို့နယ်စစ်ရှောင်များ သတ်မှတ်ထားသည့်ရက် နေရပ်သို့မပြန်ပါက နေအိမ်ချိတ်ပိတ်မည်ဆိုသည့် တအာင်း အမျိုးသားလွတ်မြောက်ရေးတပ်မတော် (TNLA) ပြောဆိုနေသည်ဆိုသော သတင်းကြောင့် တိုက်ပွဲကြား နေရပ်ပြန်နေရကြောင်း နမ္မတူမြို့ အမည်မဖော်လိုသည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
“တဆင့်စကားအားဖြင့် အိမ်ချိပ်ပိတိမယ်လို့ကြားတယ်။ ဒါကြောင့် ဇန်နဝါရီ ၈ရက်နဲ့ မနေ့က ၉ ရက်နေ့ စစ်ဘေးရှောင်များ အလုံးအရင်းပြန်ကြတာတွေ့ရတယ်” ဟု နမ္မတူမြို့ ဒေသခံ အမျိုးသားက ဆိုသည်။
ဆက်လက်ပြီး TNLA တပ်သားများက ဒေသခံများကို ပြောဆိုခဲ့သည့် အကြောင်း ဖြစ်စဥ်ကို သိရှိသူ အမည်မဖော်လိုသူ အမျိုးးသား တစ်ဦးက “နမ္မတူမြို့ကို သူတို့ တိုက်ယူပြီးကတည်းက ရွာလူကြီးတွေ၊ ဥက္ကဌတွေကို ခေါပြီး လူဦးရေ စာရင်းမေးတယ်။ အဲ့ဒီမှာ စစ်ရှောင်သွားတဲ့ သူတွေ အကုန် ပြန်ခေါ်လာခဲ့တော့တဲ့၊ ခေါ်တဲ့ အချိန်မလာရင် လူမရှိတဲ့ အိမ်ကို သူတို့ ဝင်နေမယ်ဆိုပြီး ပြောတာ။ တချို့ကလည်း စစ်ရေးတင်းမာနေသေးတယ်ဆိုပြီး မပြန်ရဲကြသေးဘူးလေ” ဟု ထပ်လောင်းပြောသည်။
ထို့ပြင် ဒီဇင်ဘာ ၂၈ရက်တွင် နမ္မတူမြို့ အခြေစိုက် စစ်ကောင်စီ၏ ခြေမြန်တပ်ရင်း (ခမရ-၃၂၄)တပ်ရင်းကို TNLA က တိုက်ခိုက်သိမ်းပိုက်နိုင်ခဲ့ကြောင်း TNLA တပ်ဖွဲ့၏ သတင်းနှင့် ပြန်ကြားရေးဌာန ထုတ်ပြန်ထားသည်။
လက်ရှိမှာ TNLA တပ်သားများသည် မြို့ရွာအတွင်း ဝင်ရောက်စစ်ဆေးမှုများ ပြုလုပ်နေပြီး၊ စစ်ကောင်စီလက်အောက်ခံ ဝန်ထမ်းများကို CDM ပြုလုပ်ရန် ဖိအားပေးသကဲ့သို့ ပညာရေး၊ ကျန်းမာရေးဝန်ထမ်းများကိုလည်း သတ်မှတ်ရက်အတွင်း နမ္မတူမြို့မှ ထွက်ခွာရန်လည်း TNLA ကဖိအားပေးနေကြောင်း သိရသည်။
“ အခုက ဝန်ထမ်းတွေကို CDM လုပ်ရန်ဖိအားပေးတယ်။ ပညာရေး ကျန်းမာရေး ဝန်ထမ်းများကိုသတ်မှတ်ရက်အတွင်း ထွက်ခွာစေပြီး သူတို့လူအစားထိုးမယ်လို့ဆိုတယ်” ဟု နမ္မတူဒေသခံ အမျိုးသားတစ်ဦးက ထပ်လောက်ပြောသည်။
ပြီးခဲ့သည့် ၂၀၂၃ ခုနှစ်၊ ဒီဇင်ဘာလ ၂၉ ရက် ညနေ ၄ နာရီခန့်တွင် စစ်ကောင်စီတပ်က ဂျက်လေယာဉ်ဖြင့် ဗုံးကြဲ တိုက်ခိုက်မှုကြောင့် မန်လီကျေးရွာရှိ ဘုန်းကြီးကျောင်းသို့ ကျရောက်ပေါက်ကွဲခဲ့ပြီး ကျောင်းဆရာမ တစ်ဦး ထိမှန်သေဆုံးခဲ့သည်။
ထို့ကြောင့် နမ္မတူမြို့ အသက် ၄၀ အရွယ်ရှိ အမျိုးသားတစ်ဦးက “လက်ရှိ အခြေအနေက ဘယ်လိုလဲဆိုရင် စစ်သားတွေက ပြည်သူနဲ့ရောနောနေပြီးတော့ စစ်ကောင်စီကလည်း လေယာဥ်နဲ့ ဗုံးလာကြဲပြီဆိုရင်လည်း ပြည်သူလား စစ်သားလား မခွဲတော့ဘဲနဲ့ ဒီအတိုင်းကြဲချတာလေ” ဟု အသက် (၄၀) ဝန်းကျင် အမျိုးသား တစ်ဦးက သျှမ်းသံဝောာ်ဆင့်ကို ပြောသည်။
လက်ရှိမှာ TNLA တပ်ဖွဲ့မှ မသင်္ကာသည့် ပြည်သူများ၊ စစ်ကောင်စီ၏ လက်အောက်ခံ ဝန်ထမ်းများကို ခေါ်ယူစစ်ဆေးမှုများပြုလုပ်နေကြောင်း၊ နမ္မတူမြို့တွင်းရှိ ပရဟိတအသင်းအဖွဲ့ဝင်များကိုလည်း ခေါ်ယူစစ်ဆေးမှု ရှိကြောင်း သိရသည်။
နမ္မတူမြို့ စစ်ရှောင်များနေရပ်မပြန်ပါက နေအိမ်ချိတ်ပိတ်မည်ဆိုသည့် သတင်းကိစ္စနှင့်ပတ်သက်ပြီး သျှမ်းသံတော်ဆင့် မှ TNLA ကို အကြိမ်ကြိမ် မေးမြန်းခဲ့ရာ ပြန်လည်ဖြေကြားခြင်းမရှိပေ။
