သျှမ်းပြည် သိန္နီမြို့အတွင်း လက်နက်ကြီးကျရောက်ပေါက်ကွဲမှုကြောင့် ကလေးနှစ်ဦး၏ ခြေထောက်ကို ကျည်စထိမှန်ပြီး ထိုထဲမှတစ်ဦး၏ ခြေထောက်ကို ဖြတ်လိုက်ရကြောင်း မိခင်ဖြစ်သူက ပြောသည်။
ဖြစ်စဉ်မှာ ပြီးခဲ့သည့် ဒီဇင်ဘာလ ၂၃ ရက် မွန်းလွဲပိုင်းအချိန်တွင် သိန္နီမြို့ ရပ်ကွက် ၃ ရှိ နေအိမ်တစ်လုံး ခြံဝန်းအတွင်းသို့ လက်နက်ကြီးကျရောက်ပေါက်ကွဲမှုကြောင့် ညီအစ်ကိုဖြစ်ကြသည့် အသက် ၄ နှစ်အရွယ် စိုင်းဆိုင်နော်ဖနှင့် အသက် ၇ နှစ်အရွယ် စိုင်းဆိုင်နော်မိန်းတို့မှာ ညာဘက်ခြေထောက်များ၌ ကျည်စထိမှန်ဒဏ်ရာရရှိခဲ့ကြောင်း ဆိုသည်။
ထို့နောက်၎င်းတို့ကို ကွတ်ခိုင်မြို့ရှိ ပြည်သူ့ဆေးရုံကြီးသို့ ပို့ဆောင်ကုသခဲ့ရာ အစ်ကိုဖြစ်သူ စိုင်းဆိုင်နော်မိန်းသည် ပြီးခဲ့သည့် ဒီဇင်ဘာလ ၂၇ ရက်တွင် ညာဘက်ခြေထောက်တစ်ဖက် ဖြတ်လိုက် ရကြောင်း မိခင်ဖြစ်သူက သျှမ်းသံတော်ဆင့်ကို ပြောသည်။
“အမေဖြစ်သူတစ်ယောက်ရဲ့ ရင်ထဲမှာ စိတ်ထိခိုက်ရတာပေါ့။ စိတ်လည်းမကောင်းဘူး။ သူတို့လည်း ငယ်သေးတယ်။ ဖြစ်နိုင်ရင်တော့ ကျမသူတို့အစား ခံပေးချင်လိုက်တယ်” ဟု ၎င်းမိခင်က ပြောသည်။
ထို့အပြင် ခြေထောက်ဖြတ်ခံရသည့်ကလေး၏ အမေနှင့် အသက် ၃၀အရွယ်ရှိ အမျိုးသမီးတစ်ဦးလည်း လက်နက်ကြီးကျည်ထိ ဒဏ်ရာအနည်းငယ်ရရှိထားကြောင်း၊ လက်ရှိမှာ ရုပ်ပိုင်းဆိုင်ရာ၊ စိတ်ပိုင်းဆိုင်ရာ ခံစားနေရကြောင်း သိရသည်။
အလားတူ လက်နက်ကြီးကြောင့် အသက် ၁၆ နှစ်အရွယ် အမျိုးသား ၁ ဦးနှင့် အသက် ၂၇ နှစ်အရွယ်ရှိ အမျိုးသမီး ၁ ဦးတို့ ထို့နေတွင် ပွဲချင်းပြီးသေဆုံးသွားခဲ့သည်။
“၁၀၂၇ စစ်ဆင်ရေး” တိုက်ပွဲနှစ်လကျော်အတွင်း အမျိုးသမီးအပါအဝင် ပြည်သူ ၂၀ နီးပါး သေဆုံးသွားခဲ့ပြီး ၂၂ ဦးထိခိုက်ဒဏ်ရာရရှိခဲ့ကြောင်း သျှမ်းသံတောင်ဆင့်၏ သီးခြားမှတ်တမ်းများအရ သိရသည်။
