သျှမ်းပြည် မြောက်ပိုင်း၊ ကွတ်ခိုင်မြို့ရှိ စစ်ကောင်စီ အခြေချ စစ်ဗျူဟာတပ် (စဗခ) ယနေ့ (ဇန်နဝါရီ ၆ ရက်) နံနက်ပိုင်းတွင် ညီနောင်မဟာမိတ်တပ်ဖွဲ့ထံ လက်နက်ချခဲ့ကြောင်း သိရသည်။
“ကွတ်ခိုင် စဗခ လက်နက်ချတယ်။ ကျန်တဲ့ အချက်အလက်တွေကတော့ မသိရသေးပါဘူး” ဟု စစ်ရေးသတင်းရင်းမြစ်က ပြောသည်။
ပြီးခဲ့သည် ဒီဇင်ဘာ ၃၁ ရက်မှ စတင်၍ အဆိုပါ စစ်ကောင်စီတပ်ကို ညီနောင်မဟာမိတ်တပ်များ ထိုးစစ်ဆင် တိုက်ခိုက်နေခြင်း ဖြစ်ပြီး စစ်ကောင်စီ လေကြောင်း အသုံးပြု အင်အားဖြည်တင်းကာ ဗုံးကြဲ တိုက်ခိုက်မှုများ ပြုလုပ်ပြီးနောက် ယနေ့ လက်နက်ချလိုက်ခြင်း ဖြစ်သည်။
လက်နက်ချ စစ်အင်အားနှင့် တကွ လက်နက်ခဲယမ်းရရှိမှု၊ ကွတ်ခိုင် ဒေသတွင်း အခြေအနေများကိုမူ ထပ်မံ မေးမြန်းနေဆဲ ဖြစ်သည်။
ကွတ်ခိုင်မြို့ အနောက်ဘက်၊ အမှတ် (၁) ရပ်ကွက်၊ မူဆယ်ဘက် အထွက်လမ်းတွင် တည်ရှိသည့် စဗခ တပ်ကို တိုက်ခိုက်စဥ် စစ်ကောင်စီက မြို့ကို မကြာခဏ ဗုံးကြဲသဖြင့် မြို့ခံအများစု တိမ်းရှောင်နေရသည်ဟု ဒေသခံများက ဆိုသည်။
အဆိုပါတပ်တွင် စစ်ကောင်စီ ဗျူဟာမှူး အထိုင်ချပြီး နမ့်ဖက်ကာ၊ တာမိုးညဲ၊ မုံးစီးဒေသရှိ တပ်စခန်းများကို ကွပ်ကဲနေကာ ရဟတ်ယာဉ်ကွင်းရှိသည့် တပ်စခန်းကြီး ဖြစ်ကြောင်း စစ်ရေးသတင်းရင်းမြစ်က ပြောသည်။
ပြီးခဲ့သည် ဇန်နဝါရီ ၄ ရက်တွင်လည်း လောက်ကိုင် အခြေစိုက် စစ်ကောင်စီ ဒကစ တပ် လက်နက်ချခဲ့ရာ စစ်သားနှင့် မိသားစု၀င် စုစုပေါင်း လူ ၄၀၀၀ နီးပါးကို ကိုးကန့်တပ် MNDAA က လားရှိုးနှင့် ကျိုင်းတုံ ပြန်ပို့ပေးခဲ့ရသည်။
Leave a Comments