သျှမ်းပြည် နောင်ချိုမြို့နယ် သံဘိုကျေးရွာရှိ စစ်ကောင်စီအခြေစိုက်စခန်းအား ပြည်သူ့ကာကွယ်ရေး တပ်မတော် (မန္တလေး) MDY-PDF နှင့် တအာင်း(ပလောင်) အမျိုးသားလွတ်မြောက်ရေး TNLA တို့ ပူးပေါင်းတိုက်ခိုက်၍ သိမ်းပိုက်နိုင်ခဲ့ကြောင်း MDY-PDF က ယနေ့ (ဇန်နဝါရီလ ၄) ရက်တွင် ထုတ်ပြန်ထားသည်။

ပြီးခဲ့သည့် ဇန်နဝါရီလ ၂ ရက်မှစ၍ နောင်ချိုမြို့နယ် သံဘိုကျေးရွာရှိ စစ်ကောင်စီအခြေစိုက် စခန်းအား ဝင်ရောက်စီးနင်းတိုက်ခဲ့ရာ ယမန်နေ့ ဇန်နဝါရီ ၃ ရက် နံနက်ပိုင်း ၇ နာရီခွဲအချိန်တွင် အဆိုပါစခန်းအား အပြီးသတ်သိမ်းပိုက်နိုင်ခဲ့ကြောင်း ဆိုသည်။

ထိုတိုက်ပွဲအတွင်း စစ်ကောင်စီ၏ စစ်ကြောင်းမှုး ဒုဗိုလ်မှူးကြီး သက်အောင်အား အရှင်ဖမ်းဆီးရမိထား သလို စစ်ကောင်စီဘက်မှ ထိခိုက်သေဆုံးမှုများပြားခဲ့ကြောင်း ရေးသားဖော်ပြထားသည်။

အလားတူ ပြည်သူ့ကာကွယ်ရေးတပ်မတော် (မန္တလေး) MDY-PDF ဘက်လည်း ထိခိုက်မှုရှိကြောင်း ရေးသားဖော်ပြထားသော်လည်း အသေးစိတ်ကိုမသိရှိရပေ။

ထို့အပြင် သံဘိုကျေးရွာရှိ စစ်ကောင်စီအခြေစိုက် စခန်းသိမ်းပိုက်အပြီး ယမန်နေ့တွင် ပြင်ဦးလွင်မြို့နယ် ကျောက်မဲလေးရွာဘက်မှ စစ်ကူအဖြစ် ဖြည့်တင်းလာသော စစ်ကောင်စီ၏ ကား ၃ စီးကိုလည်း MDY-PDF နှင့် TNLA တို့ပူးပေါင်းတိုက်ခိုက်ခဲ့ရာ လက်နက်ခဲယမ်းများ ထပ်မံသိမ်းဆည်းရမိ ကြောင်း သိရသည်။

ပြည်သူ့ကာကွယ်ရေးတပ်မတော် (မန္တလေး) MDY-PDF သည် လက်ရှိသျှမ်းမြောက်ဒေသတွင် ဖော်ဆောင်နေသော “၁၀၂၇ စစ်ဆင်ရေး”အတွင်း ညီနောင်မဟာမိတ်သုံးဖွဲ့တို့နှင့်အတူ ပူးပေါင်းတိုက်ခိုက်နေလျက်ရှိသည်။