သျှမ်းပြည် လားရှိုးနှင့် သိန္နီမြို့များမှ စစ်ဘေးရှောင်များသည် လားရှိုး-မိုင်းရယ် ကားလမ်းမှတဆင့် ဘေးလွတ်ကင်းရာသို့ ထပ်မံရွှေ့ပြောင်းနေကြကြောင်း စုံစမ်းသိရသည်။

ပြီးခဲ့သည့် ဒီဇင်ဘာလ ၃၁ ရက်တွင် လားရှိုးမြို့နယ်ရှိ အီနိုင်းတံတား ဗုံးဖောက်ခွဲ ဖျက်ဆီးခံရပြီးနောက် လားရှိုးမြို့ပေါ်ရှိ ဒေသခံများနှင့် စစ်ဘေးရှောင်များသည် လားရှိုး-မိုင်းရယ် ကားလမ်းမှတဆင့် ဘေးလွတ်ကင်းရာသို့ ထပ်မံရွှေ့ပြောင်းနေကြကြောင်း လားရှိုးဒေသခံများက ပြောသည်။

“လားရှိုးမှာ တကယ်လို့ ရုတ်တရက် စစ်ဖြစ်လာရင်တောင် လူကြီးနဲ့ကလေးတွေကို ခေတ္တရှောင်ထားခိုင်းတဲ့သဘောပေါ့။ တပ်နဲ့နီးတဲ့လူတွေကတော့ ကြိုရှောင်နေတာပေါ့။ သိန္နီကနေ လာတာကတော့ နီးစပ်ရာ ဆွေမျိုးတွေဆီပဲ သွားကြတာများပါတယ်။ လားရှိုးမှာက ၁၀ ပုံ ၂ ပုံလောက်က ထွက်သွားကြပြီ။ အခုလည်း မိုင်းရယ်ဘက် တစ်လမ်းပဲရှိတော့ တောင်ကြီး၊ မန္တလေးဘက်ကို သွားချင်ရင်လည်း ဒီဘက်ပဲသွားကြရတာ”ဟု လားရှိုးမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ယမန်နေ့ (ဇန်နဝါရီ ၂ ရက်)တွင်လည်း လားရှိုးမြို့ ကောင်းခါးရွာအနီးရှိ ဝမ်နားနှင့် ဖိုင်တောင်းကျေးရွာတို့တွင် စစ်ကောင်စီတပ်နှင့် ညီနောင်မဟာမိတ်တပ်တို့ နှစ်ဘက်ထိတွေ့တိုက်ပွဲ ဖြစ်ပွားခဲ့ရာ ဒေသခံများမှာ စိုးရိမ်ထိတ်လန့်ပြီး အနီးအနားရှိ မိုင်းရယ်မြို့သို့လည်းကောင်း၊ လားရှိုး-မိုင်းရယ်လမ်းမှတဆင့် တောင်ကြီး၊ မန္တလေးမြို့များသို့ ထပ်မံရွှေ့ပြောင်းနေကြကြောင်း လားရှိုးဒေသခံများထံမှ သိရသည်။

“တချို့လည်း မိုင်းရယ်ဘက်မှာ အိမ်ငှားနေဖို့ လာရှာကြတာတွေ ရှိတယ်။ အရေအတွက်ကတော့ ဘယ်လောက်ရှိလဲ မသိဘူး။ အလံဖြူထောင်ပြီးတော့ အထုပ်အပိုးတွေ အများကြီးနဲ့ လာကြတာ ရှိတယ်။ အိမ်စီးကား ကိုယ်ပိုင်ကားအများစုပေါ့၊ တခါလာရင် ၇ စီး ၈ စီး အဲ့လိုအုပ်စုနဲ့လာတယ်။ လားရှိုးက အီနိုင်းတံတား ကျိုးပြီးနောက်တော့ တခြားလမ်းသွားလို့မရတာနဲ့ ဒီဘက်လမ်းကတော့ ပုံမှန်ထက် အသွားအလာ ပိုများလာတယ်”ဟု ကားဖြင့် ထပ်မံတိမ်းရှောင်လာသည့် စစ်ဘေးရှောင်အခြေအနေကို မိုင်းရယ်မြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် လားရှိုးမြို့မှ အခြားမြို့များသို့ ဆက်သွယ်သွားလာနိုင်ရန် လားရှိုး-နမ့်ပေါင်-မိုင်းရယ် ကားလမ်းတစ်လမ်းတည်းသာ ကျန်ရှိတော့ပြီး လားရှိုး-သီပေါကြားရှိ စဉ့်အင်တံတားနှင့် လားရှိုး-နမ္မတူအကြား ဆက်သွယ်ထားသည့် အီနိုင်းတံတားတို့မှာ ပြီးခဲ့သည့် ဒီဇင်ဘာလအတွင်းက ဖျက်ဆီးခဲ့ရသည်။

“နမ့်ပေါင်တံတား ကျိုးရင်တောင်မှ တံတားတွေ ထပ်ရှိသေးတယ်။ ကျောက်မီးသွေးကားတွေ ကြံကားတွေသွားတဲ့လမ်းမှာ နမ့်မချောင်းကော နမ့်ပေါင်ချောင်းကော အောက်ဘက်မှာ တံတားတွေ ထပ်ရှိသေးတယ်။ စိတ်ပူစရာတော့ မရှိဘူး၊ လမ်းတွေပေါက်ပါတယ်။ မိုင်းရယ်ဘက်မှာတော့ ပုံမှန်အတိုင်းပဲ၊ ဘာမှမထူးခြားသေးဘူး”ဟု မိုင်းရယ်မြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။

ဒီဇင်ဘာလ ဒုတိယပတ်အတွင်းက စစ်အာဏာသိမ်းခေါင်းဆောင် မင်းအောင်လှိုင်သည် လားရှိုးမြို့သို့ လာရောက်ပြီးနောက် လားရှိုးမြို့နယ်အတွင်းရှိ စစ်ဘေးရှောင်များကို ဘုန်းကြီးကျောင်း ၁ ကျောင်းနှင့် ခရစ်ယာန်ဘုရား‌ကျောင်း ၁ ကျောင်းတို့တွင်သာ စုစည်းထားရှိရန် ညွှန်ကြားလာသည်။

ထို့ပြင် စစ်ဘေးရှောင်အများစုတွင် တိုက်ပွဲကြား နေရပ်ပြန်သူနှင့် အခြားဒေသသို့ ဆက်လက်တိမ်းရှောင်သွားသူများလည်း ရှိနေကြောင်း လားရှိုးမြို့ရှိ စစ်ဘေးရှောင်ကူညီသူများထံမှ သိရသည်။