သျှမ်းပြည် ကွတ်ခိုင်မြို့နယ်တွင် စစ်ကောင်စီတပ်နှင့် ညီနောင်မဟာမိတ်တပ်ဖွဲ့များတို့အကြား တိုက်ပွဲကြောင့် အရပ်သားတစ်ဦးသေဆုံးပြီး၊ ထိခိုက်ဒဏ်ရာရသူများရှိနေကြောင်း စုံစမ်းသိရသည်။
ယမန်နေ့ (ဇန်နဝါရီလ ၂ ရက်) နံနက်ပိုင်း ၁၀ နာရီဝန်းကျင်တွင် ကွတ်ခိုင်မြို့ ရပ်ကွက် ၅ အတွင်းရှိ နေအိမ်ခြံဝန်းတစ်ခုထဲသို့ လက်နက်ကြီးကျရောက်ပေါက်ကွဲမှုကြောင့် အမျိုးသား ၁ ဦး ပွဲချင်းပြီး သေဆုံးသွားခဲ့ကြောင်း သေဆုံးသွားသူ၏ ဆွေမျိုးတော်စပ်သူတစ်ဦးက သျှမ်းသံတော်ဆင့်ကို ပြောသည်။
“အိမ်ရှေ့က ဆိုင်ကိုပိတ်ပြီးအပြန် အိမ်ရှေ့မှာပဲ လက်နက်ကြီးထိပြီး ပွဲချင်းပြီးဆုံးသွားတာ။ အဲ့ချိန်မှာ ကျနော်တို့လည်း တိုက်ပွဲကြောင့် ပြေးနေရတော့ သွားမကယ်နိုင်ဘူး။ တိုက်ပွဲဖြစ် နေတုန်းမှာပဲ သူတို့လိုက်ရှာတာ ဘယ်မှလည်းမတွေ့၊ ဖုန်းဆက်တော့လည်း မကိုင်ဘူးဆိုတော့ အိမ်ကိုပြန်လာလိုက်တာ။ အိမ်ရှေ့မှာသူတို့တွေ့လိုက်တာ” ဟု ၎င်းက ပြောသည်။
သေဆုံးသူ အမျိုးသားတစ်ဦးမှာ အသက် ၅၀ နှစ်ကျော် စိုင်းခမ်းခေးဖြစ်ကြောင်း ဆွေမျိုးတော်စပ်သူက ထပ်လောင်းပြောသည်။
အလားတူ ထိုနေ့ နံနက်ပိုင်းတွင်လည်း ကွတ်ခိုင်မြို့ရှိ ကားဂိတ်အနီးသို့ လက်နက်ကြီးထပ်မံ ကျရောက်ပေါက်ကွဲကာ ပြည်သူ ၁ ဦး သေဆုံးသွားကြောင်း သိရသော်လည်း သီခြားအတည်ပြု၍ မရသေးပေ။
လက်ရှိ ပစ်ခတ်လိုက်သော လက်နက်ကြီးများသည် မည်သည့်အဖွဲ့အစည်းဘက်မှ ပစ်ခတ်ကြောင်း သည်းသည်းကွဲကွဲမသိရှိရဘဲ ပြည်သူနေအိမ်ခြံဝန်းထဲသို့ မကြာခဏ ဆိုသလို ကျရောက်ပေါက်ကွဲ နေကြောင်း၊ ဒရုန်းများပါ တိုက်ခိုက်နေသောကြောင့် ထိခိုက်ဒဏ်ရာရသူ နေစဉ်ရှိနေကြောင်း ဆိုသည်။
“လက်နက်ကြီးကတော့ ဘယ်ဘက်ကပစ်မှန်း မသိတော့ပါဘူးဗျာ။ အပြန်အလှန် ပစ်နေကြတာပဲ။ နားတွေလည်း ငြီးနေတာပဲ” ဟု ကွတ်ခိုင်မြို့ဒေသခံ အမျိုးသားတစ်ဦးက ထပ်လောင်းပြောသည်။
ထို့အပြင် ကွတ်ခိုင်မြို့တွင်းအပြင် တုံဆင်လေးကျေးရွာ၊ ရပ်ကွက် (၈)နှင့် ရဲစခန်းအနီးကို စစ်ကောင်စီမှ လေကြောင်းဖြင့် ၅ ကြိမ်တိုင်တိုင် အလေးချိန်ပေါင် (၅၀၀) ဗုံးနှစ်လုံးအပါအဝင် ဗုံးအများအပြား လာရောက်ကြဲချသွားကြောင်း ယမန်နေ့ ဇန်နဝါရီလ ၂ ရက် ညပိုင်းက TNLAမှ ထုတ်ပြန်ထားသည်။
ယင်းကဲ့သို့ တိုက်ပွဲပြင်းထန်စွာ ဖြစ်ပွားနေခြင်းကြောင့် သေဆုံးသွားသည့် အလောင်းတချို့ မှာ ကောက်ယူနိုင်ခြင်း မရှိသေးသကဲ့သို့ မြို့တွင်းရှိ ပြည်သူများသည်လည်း တားမိုးညဲ၊ မန်ပိန်း နှင့် လားရှိုးမြို့သို့ ထွက်ပြေး တိမ်းရှောင်နေရကြောင်း သိရသည်။
