သျှမ်းပြည် သီပေါမြို့တွင် စစ်ကောင်စီတပ်က လက်နက်ကြီးဖြင့် ရမ်းသမ်းပစ်ခတ်မှုကြောင့် ဒေသခံများက လုံခြုံရေးစိုးရိမ်နေကြောင်း စုံစမ်းသိရသည်။
ယမန်နေ့ (ဇန်နဝါရီလ ၁ ရက်) ည ၆ နာရီခွဲဝန်းကျင်မှစပြီး သီပေါမြို့အခြေစိုက် စစ်ကောင်စီတပ် ခမရ-၅၀၃/၅၀၄ တပ်ရင်းများမှ သီပေါမြို့နယ်အတွင်းရှိ ဘော်ကြို၊ နားခဲနှင့် မိုးတေကျေးရွာများဘက်သို့ လက်နက်ကြီးဖြင့် ရမ်းသမ်းပစ်ခတ်ခဲ့ကြောင်း သီပေါဒေသခံများက ပြောသည်။
“ဘော်ကြို၊ နားခဲရွာတွေ အဲ့ဘက်ကို လက်နက်ကြီးနဲ့ ရမ်းပစ်နေတာ။ မနေ့ည ၆ နာရီခွဲလောက်က စပစ်တာ။ စစ်ကောင်စီတပ်က စံဖိတ်တံတားကနေရယ် သီပေါထောင်ကြီးနားကနေရယ် လက်နက်ကြီးနဲ့ လှမ်းပစ်တာပဲ။ မနေ့ညက မိုးတေဘက်ကိုလဲ လက်နက်ကြီး ၃ လုံး ပစ်သွားတယ်။ နေအိမ်ထိခိုက်ပျက်စီးမှုကတော့ မကြားသိရဘူး”ဟု သီပေါမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် သီပေါမြို့၌ တိုက်ပွဲတစုံတရာ ဖြစ်ပွားခြင်းမရှိသော်လည်း စစ်ကောင်စီတပ်က လက်နက်ကြီးဖြင့် ညစဉ်နီးပါး ရမ်းသမ်းပစ်ခတ်နေခြင်းအပြင် လေကြောင်းဖြင့်ပါ ကင်းထောက်ပျံသန်းနေခြင်းကြောင့် သီပေါမြို့နယ်အတွင်းရှိ ဒေသခံများမှာ လုံခြုံရေးစိုးရိမ်ပြီး အခြားဒေသများသို့ ထွက်ပြေးတိမ်းရှောင်နေကြောင်း သိရသည်။
“မနေ့ညက လက်နက်ကြီးနဲ့ လှမ်းပစ်တဲ့ ဘော်ကြို၊ နားခဲဘက်ကို လေယာဉ်နဲ့လည်း လာဝဲနေတာ။ လေယာဉ်ပေါ်ကနေတော့ ဗုံးမကြဲသွားဘူး။ ခဏနေပြီးရင် လက်နက်ကြီးနဲ့ ပြန်ပြီးတော့ လှမ်းပစ်လိုက်တာ။ နားလိုက် ပစ်လိုက် အဲ့လိုပစ်နေတာပဲ။ မြို့ထဲမှာတော့ တိတ်ဆိတ်နေတယ်၊ တချို့လဲ ကြောက်ကြလို့ အများစု ထွက်ပြေးကြပြီ”ဟု သီပေါမြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
သီပေါမြို့နယ်အတွင်း မန္တလေး-လားရှိုး ပြည်ထောင်စုလမ်းမကြီးပေါ်ရှိ ကျင်သီတံတားနှင့် စဉ့်အင်တံတားတို့သည် ပြီးခဲ့သည့် နိုဝင်ဘာလအတွင်းက ဖျက်ဆီးခံခဲ့ရပြီး သီပေါနှင့် နမ္မတူမြို့ကို အဓိကဆက်သွယ်ထားသည့် မိုးတေချောင်းတံတားမှာလည်း ဒီဇင်ဘာလ ၂၈ ရက်နေ့က သီပေါစစ်ကောင်စီတပ် ခမရ-၅၀၃/၅၀၄ မှ မိုင်းခွဲဖျက်ဆီးခဲ့ကြောင်း TNLA တပ်ဖွဲ့၏ သတင်းနှင့်ပြန်ကြားရေးဌာနက ထုတ်ပြန်ထားသည်။
သီပေါမြို့တွင် ၂၀၂၃ နိုဝင်ဘာလ တတိယပတ်မှစတင်၍ စစ်ဘေးရှောင် ၃၀၀၀ ခန့်သည် သီပေါမြို့ပေါ် ဘုန်းကြီးကျောင်းများနှင့် ဘော်ကြိုဘုရားကြီးကျောင်းတိုက်တို့တွင် ထွက်ပြေးတိမ်းရှောင်နေရပြီး စားနပ်ရိက္ခာနှင့် ဆေးဝါးအကူအညီများ လိုအပ်နေကြောင်း သီပေါဒေသခံများထံမှ သိရသည်။
