သျှမ်းပြည် ကျောက်မဲမြို့နယ် မိုင်းငေါ့မြို့တွင် စစ်ကောင်စီတပ်နှင့် တအာင်း(ပလောင်)တပ်ဖွဲ့ TNLA တို့ နှစ်ဘက်တိုက်ပွဲအကြား ပြည်သူနေအိမ် ၅ လုံးထက်မနည်း မီးလောင်ပျက်စီးသွားကြောင်း စုံစမ်းသိရသည်။

ယနေ့ (ဒီဇင်ဘာလ ၃၁ ရက်) နံနက်ပိုင်းအချိန်တွင် ကျောက်မဲမြို့နယ် မိုင်းငေါ့မြို့အခြေစိုက် စစ်ကောင်စီတပ်က လက်နက်ကြီးနှင့် လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် ဈေးတန်းရပ်ရှိ ပြည်သူနေအိမ် ၅ လုံးထက်မနည်း မီးလောင်ပျက်စီးခဲ့ကြောင်း မိုင်းငေါ့မြို့ ဒေသခံများက ပြောသည်။

“ဒီမနက် လက်နက်ကြီးကျပြီး မီးလောင်တာ။ ဈေးရပ်ကွက်က စားသောက်ဆိုင်တွေရှိတဲ့နား ကျပြီးတော့ အကုန်မီးလောင်ကုန်တယ်။ ဈေးရပ်ကွက်ရုံး၊ စည်ပင်ရုံးနဲ့ မီးသတ်ရုံးတွေလဲ မီး‌လောင်တဲ့အထဲ ပါတယ်လို့ပြောတယ်။ မီးလောင်သွားတာ ၅ အိမ်ထက် မကဘူး၊ တိုင်တွေပဲ ကျန်တယ်”ဟု မိုင်းငေါ့မြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

ယမန်နေ့ (ဒီဇင်ဘာလ ၃၁ ရက်)က မိုင်းငေါ့မြို့ရှိ စစ်ကောင်စီတပ်မှ နမ့်တွေနှင့် ကွင်းစလန်းကျေးရွာများသို့ လက်နက်ကြီးဖြင့် ရမ်းသမ်းပစ်ခတ်ခဲ့ပြီး ဂျက်ဖိုက်တာဖြင့်လည်း မာမိုကျေးရွာနှင့် နမ့်တွေကျေးရွာများသို့ ဗုံးကြဲတိုက်ခိုက်ခဲ့သည်ဟု TNLA တပ်ဖွဲ့၏ သတင်းနှင့် ပြန်ကြားရေးဌာနက သတင်းထုတ်ပြန်ထားသည်။

ပြီးခဲ့သည့် ဒီဇင်ဘာလ ၂၆ ရက်တွင်လည်း မိုင်းငေါ့မြို့ရှိ စစ်ကောင်စီတပ်စခန်းမှ ရမ်းသမ်းပစ်ခတ်လိုက်သည့် လက်နက်ကြီးသည် မန်ခေါက်ကျေးရွာအတွင်း ကျရောက်ပေါက်ကွဲခဲ့ရာ အရပ်သား ၁ ဦး သေဆုံးခဲ့ပြီး ၁ ဦး ထိခိုက်ဒဏ်ရာရရှိခဲ့ကြောင်း မိုင်းငေါ့မြို့ ဒေသခံများထံမှ သိရသည်။

တအာင်း(ပလောင်)တပ်ဖွဲ့ TNLA အနေဖြင့် နမ္မတူ၊ နမ့်ဆန်၊ မန်တုံနှင့် နမ့်ခမ်းမြို့နယ်တို့ကို အလုံးစုံ သိမ်းပိုက်ထားနိုင်ပြီး ကျောက်မဲမြို့နယ်အတွင်းရှိ မိုင်းလုံမြို့ကိုလည်း ဒီဇင်ဘာလ ပထမပတ်အတွင်းက ထိန်းချုပ်နိုင်ခဲ့ရာ ယခုအခါ မိုင်းငေါ့မြို့ကို ဆက်လက်ထိုးစစ်ဆင် တိုက်ခိုက်နေသည်။

ဒီဇင်ဘာလအတွင်း တရုတ်နိုင်ငံ၏ ကြားဝင်စေ့စပ်မှုဖြင့် ညီနောင်မဟာမိတ် ၃ ဖွဲ့နှင့် စစ်ကောင်စီတို့သည် တရုတ်နိုင်ငံ ကူမင်းမြို့၌ နှစ်ကြိမ်တိုင်တိုင် တွေ့ဆုံဆွေးနွေးခဲ့သော်လည်း သဘောတူညီမှု တစုံတရာ မရရှိဘဲ နှစ်ဘက်တိုက်ပွဲ ပိုမိုပြင်းထန်လျက်ရှိပြီး သီပေါ၊ လားရှိုး၊ ကွတ်ခိုင်၊ မူဆယ်နှင့် လောက်ကိုင်မြို့တို့သည် ညီနောင်မဟာမိတ်တပ်တို့၏ ဝိုင်းရံပိတ်ဆို့ထားခြင်းကို ခံနေရသည်။