သျှမ်းပြည် နမ္မတူမြို့နယ်ကို တအာင်း(ပလောင်)တပ်ဖွဲ့ TNLA က အလုံးစုံထိန်းချုပ်နိုင်ပြီးနောက် စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ရာ ကျောင်းဆရာမတစ်ဦး သေဆုံးပြီး ၄ ဦး ဒဏ်ရာရရှိကြောင်း စုံစမ်းသိရသည်။
ဒီဇင်ဘာလ ၂၈ ရက်တွင် နမ္မတူမြို့အခြေစိုက် စစ်ကောင်စီတပ် ခမရ-၃၂၄ တပ်ရင်းကို တအာင်း(ပလောင်)တပ်ဖွဲ့ TNLA က တိုက်ခိုက်သိမ်းပိုက်နိုင်ခဲ့ပြီးနောက် ဒီဇင်ဘာလ ၂၉ ရက် ညနေ ၄ နာရီခန့်တွင် စစ်ကောင်စီတပ်က ဂျက်လေယာဉ်ဖြင့် ဗုံးကြဲတိုက်ခိုက်လာရာ မန်လီကျေးရွာရှိ ဘုန်းကြီးကျောင်းသို့ ကျရောက်ပေါက်ကွဲခဲ့ပြီး ကျောင်းဆရာမတစ်ဦး ထိမှန်သေဆုံးသွားကြောင်း TNLA တပ်ဖွဲ့၏ သတင်းနှင့်ပြန်ကြားရေးဌာနက ထုတ်ပြန်ထားသည်။
စစ်ကောင်စီတပ်မှ နမ္မတူမြို့နယ် မန်လီကျေးရွာသို့ လေကြောင်းဖြင့် ၂ ကြိမ် လာရောက်ဗုံးကြဲမှုကြောင့် သေဆုံးသွားခဲ့ရသူမှာ တအာင်းအမျိုးသား ပညာရေးကော်မတီ (TNEC)တွင် တာဝန်ထမ်းဆောင်နေသည့် အသက် ၂၀ နှစ်အရွယ်ရှိ လွေးမေဖြိုးအိ ဆိုသူ ကျောင်းဆရာမတစ်ဦးဖြစ်ပြီး မန်လီဘုန်းကြီးကျောင်းမှ သံဃာတော်များမှာ တိုက်ပွဲစတင်ဖြစ်ပွားစဉ်က ထွက်ပြေးတိမ်းရှောင်နေသောကြောင့် ထိခိုက်မှုမရှိကြောင်း သိရသည်။
အလားတူ ဒီဇင်ဘာလ ၂၉ ရက် တစ်ရက်တည်းတွင် နမ္မတူမြို့တွင်းတံတားအနီးသို့ စစ်ကောင်စီတပ်က ဂျက်ဖိုက်တာဖြင့် ထပ်မံဗုံးကြဲခဲ့ရာ အရပ်သား ၄ ဦး ဗုံးစထိမှန်ပြီး ဒဏ်ရာပြင်းထန်ကြောင်းလည်း ထုတ်ပြန်ချက်တွင် ဖော်ပြထားသည်။
ထို့အပြင် ဒီဇင်ဘာလ ၂၈ ရက် ည ၆ နာရီခန့်က သီပေါနှင့် နမ္မတူမြို့အကြား အဓိကဆက်သွယ်ထားသည့် မိုးတေချောင်းတံတားအား သီပေါမြို့အခြေစိုက် စစ်ကောင်စီတပ် ခလရ-၅၀၃/၅၀၄ တပ်ရင်းမှ မိုင်းခွဲဖျက်စီးခဲ့ကြောင်း TNLA တပ်ဖွဲ့က သတင်းထုတ်ပြန်သည်။
နမ္မတူမြို့နယ်အတွင်းရှိ စစ်ကောင်စီလက်အောက်ခံ မန်တပ်စခန်း၊ ပန်သပြေတပ်စခန်း၊ မြို့မရဲစခန်းနှင့် ဌာနဆိုင်ရာရုံးအားလုံးကိုလည်း TNLA တပ်ဖွဲ့က ဒီဇင်ဘာလ ၂၅ ရက်တွင် စတင်ထိုးစစ်ဆင် တိုက်ခိုက်ပြီးနောက် ၄ ရက်အကြာ ဒီဇင်ဘာလ ၂၉ ရက်တွင် အပြီးသတ်ချေမှုန်းနိုင်ခဲ့ကြောင်း သိရသည်။
နမ္မတူမြို့သည် နမ့်ဆန်၊ မန်တုံ၊ မိုင်းလုံနှင့် နမ့်ခမ်းမြို့များကဲ့သို့ TNLA တပ်ဖွဲ့က အလုံးစုံ သိမ်းပိုက်ထိန်းချုပ်ထားနိုင်သည့် ပဉ္စမမြောက် မြို့ကြီးဖြစ်လာပြီး သျှမ်းမြောက်ရှိ စစ်ကောင်စီတပ်စခန်း ၇၀ ကျော်ကိုလည်း TNLA တပ်ဖွဲ့က တိုက်ခိုက်သိမ်းပိုက်ထားသည်။
“၁၀၂၇ စစ်ဆင်ရေး” နှစ်လကျော်အတွင်း နမ္မတူမြို့နယ်တွင် စစ်ကောင်စီ၏ လက်နက်ကြီး နှင့် လေကြောင်းဗုံးကြဲမှုကြောင့် အမျိုးသမီး ၁ ဦး အပါအဝင် စုစုပေါင်း ၃ ဦး သေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိ၍ ဘုန်းကြီးကျောင်း၊ ဗလီကျောင်းနှင့် ပြည်သူနေအိမ် ၃၀ နီးပါး ထိခိုက်ပျက်စီးခဲ့ကြောင်း နမ္မတူမြို့နယ်ဒေသခံများထံမှ သိရသည်။
