သျှမ်းပြည် တောင်ပိုင်း ရွာငံဒေသဖက်တွင် သူခိုးများ သောင်းကြမ်းနေပြီး ဒေသထွက်သီးနှံများကိုပါ ခိုးယူမှုရှိနေကြောင်း ဒေသခံများပြောပြချက်အရ သိရသည်။
ရွာငံမြို့နယ် သိမ်ကုန်းကျေးရွာဖက်တွင် သူခိုးများသောင်းကြမ်းနေပြီး ဒေသထွက်သီးနှံဖြစ်သည့် လိမ္မော်သီးတွေကိုခိုးယူမှုထိရှိနေကြောင်း ဒေသခံများက သျှမ်းသံတော်ဆင့်ကိုပြောသည်။
“လိမ္မော်သီးကလဲစျေးကမကောင်းဘူး၊ ခုတလောမိုးကလဲအုံ့တော့ အသီးတွေကလည်း ပျက်တယ်။ ကြားထဲ သူခိုးကလည်း သောင်းကြမ်းနေတော့ ပိုဆိုးတာပေါ့။ စားဖို့တောင် အနိုင်နိုင်နဲ့ အဆင်မပြေဘူး”ဟု ဒေသခံအမျိုးသမီး တစ်ဦးက ပြောထားသည်။
သူခိုးများ သောင်းကြမ်းနေမှုကြောင့် လိမ္မော်ခြံထဲတွင် အစောင့်များငှားပြီး စောင့်ကြည့်ခိုင်းထားသည့်အဆင့်ထိရောက်နေကြောင်းသိရသည်။
“သူခိုးကလဲ အုပ်စုဖွဲ့ခိုးကြတာ၊ ကိုယ်တိုင်ကလဲ ခြံကိုသွားမကြည့်နိုင်ဘူးလေ။ လူငှားပြီး ကြည့်ခိုင်းထားရတာ၊ ခြံစောင့်ထားလဲ ပျောက်သေးတာပဲ၊ ခုတလောက လိမ္မော်သီး မှည့်ချိန်ဆိုတော့ သူခိုးတွေလဲများနေကြတာ”ဟု အသက်၃၀ ကျော်အရွယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အာဏာသိမ်းပြီးနောက်ပိုင်း စီးပွားရေးမတည်ငြိမ်မှုကြောင့် အလုပ်ကိုင်များရှားပါးလာကာ စားဝတ်နေရေးခက်ခဲမှုကြောင့် သူခိုးများ ပိုမိုများပြားလာခြင်းဖြစ်ကြောင်း ၄င်းအမျိုးသားက ဆက်လက်ပြောထားသည်။
စစ်တပ်အာဏာသိမ်းပြီးနောက်ပိုင်း တရားဥပဒေ စိုးမိုးမှုလည်း မရှိတာကြောင့် တိုင်တန်းမှု ပြုလုပ်သည်လည်း သက်ဆိုင်ရာက ဖြေရှင်းပေးတာမျိုးလည်း မရှိတာကြောင့် ဒေသခံများ မလုံခြုံမှုကို ခံစားနေကြရပါသည်။ လက်ရှိမှာလည်း ရွာငံမြို့နယ် ကျေးရွာအများစုတွင် အိမ်တွင်းဖောက်ပစ္စည်းခိုးယူခြင်း၊ ရာသီပေါ်သီးနှံခိုးယူခြင်း ပိုမိုများပြားလာခဲ့ကြောင်း ဒေသခံများထံသိရသည်။
