ထိုင်းနိုင်ငံရောက် မြန်မာရွှေ့ပြောင်း အလုပ်သမားများ အနေဖြင့် လစဥ် ၀င်ငွေခွန် ၏ ၂%ကို သုံးလတစ်ကြိမ် ပေးဆောင်ရန် မြန်မာသံရုံး (ဘန်ကောက်) မှ ဒီဇင်ဘာလ (၁၃)ရက်တွင် ထုတ်ပြန်ချက်နှင့် ပတ်သက်ပြီး အဆင်မပြေဖြစ်ရကြောင်း ထိုင်းနိုင်ငံရောက် ရွှေ့ပြောင်းအလုပ်သမားများက ပြောသည်။

ထိုင်းနိုင်ငံတွင် တရား၀င် ရောက်ရှိနေသော မြန်မာနိုင်ငံမှ အထွေအထွေ လုပ်သား (၂)သန်းထဲတွင် နေ့စားအလုပ်သမားများနှင့် လခစားအလုပ်သမားများ ပါ၀င်ကြပြီး လက်ရှိအချိန်တွင် အလုပ်မရှိသေးသော အလုပ်လက်မဲ့များလည်း ရှိနေကာ အလုပ်သမားအများစုမှာ အိမ်သို့ ပြန်လည်ထောက်ပံ့နေရသူများလည်း ဖြစ်ကြသည်။

“ကျမတို့က နေ့စားလုပ်တော့ အလုပ်ပေါ်မှ၊ ခေါ်တဲ့သူရှိမှ လုပ်ရတာဆိုတော့ လစဥ်ပုံမှန်၀င်ငွေ မရဘူး။ အဲ့အလုပ်ပြီးသွားလို နောက်အလုပ်ရှာမရမချင်း အလုပ်လည်းမရှိဘူး။ တချို့ဆို ထိုင်းမှာသာ ရောက်နေတာ၊ အလုပ်ရှာမရတဲ့သူတွေလည်း အများကြီးပဲ။ သူများနိုင်ငံမှာ အလုပ်လာလုပ်နေရတာ အဆင်မပြေတာ ၊ခေါင်းပုံဖြတ်ခံရတာတွေမှ အများကြီးကို ကူညီဖြေရှင်းပေးမယ့်အစား ပြည်သူတွေရဲ့ လုပ်အားခကို အလကားဖဲ့ယူနေတာလို့ပဲ မြင်တယ်” ဟု အဆိုပါ အမျိုးသမီးမှ ပြောသည်။

စစ်အာဏာသိမ်းပြီးနောက်ပိုင်း မြန်မာနိုင်ငံတွင် အုပ်ချုပ်ရေး၊ တရားဥပဒေစိုးမိုးရေး၊ စီးပွားရေး စသဖြင့် အဖက်ဖက်မှ ဆုတ်ယုတ်လာကာ ငွေကြေးဖောင်းပွမှုနှင့် ကုန်စျေးနှုန်းများလည်း အဆမတန် တက်လာ၍ ပြည်သူများအတွက် ၀င်ငွေ၊ ထွက်ငွေ မမျှတတာကြောင့် မြန်မာနိုင်ငံမှ လူငယ်နှင့် လူလတ်ပိုင်း အများစုမှာ အရင်းအနှီးကြီးကြီးဖြင့် ပိုမို ပြည်ပထွက် အလုပ်လုပ်ကိုင်လာကြသည်။

ပြည်ပရောက် မြန်မာနိုင်ငံသားများအနေဖြင့် အလုပ်ရှာဖွေရတာ မလွယ်ကူသလို မိသားစုကို ပြန်လည်ထောက်ပံ့ရမှုတွင်လည်း ၀င်ငွေခွန်ကြောင့် အထိအခိုက်ဖြစ်ရပြီး ထိုင်းရောက် မြန်မာလုပ်သားများ၏ ၀င်ငွေခွန် ပေးဆောင်မှုအတွက် စစ်ကောင်စီဘက်မှ မြန်မာနိုင်ငံတွင် ပြန်လည်ရရှိခွင့်ပေးမည့် အကျိုးခံစားခွင့်များကိုလည်း လုပ်သားအများစုမှာ ယုံကြည်မှုမရှိကြကြောင်း သိရှိရသည်။

“စစ်ကောင်စီ အာဏာသိမ်းမှုရဲ့ နောက်ဆက်တွဲဆိုးကျိုးတွေကြောင့် မြန်မာနိုင်ငံမှာ အလုပ်လုပ်ကိုင်ဖို့ ပိုခက်ခဲလာလို့ ပြည်ပထွက် အလုပ်လုပ်ရတာ။ အဲ့ဒါကြောင့် သူတို့ကို ၀င်ငွေခွန် ပြန်ပေးဆောင်ရမယ်ဆိုရင် မပေးချင်ဘူး။ အိမ်လခ၊ ရေမီးခတွေနဲ့ အိမ်ကိုပြန်ပို့နိုင်ဖို သူများနိုင်ငံမှာ ခေါက်ဆွဲပြုတ် စားပြီး အလုပ်လုပ်နေရတာကို အခွန်ပေးရမယ်ဆိုရင် ပိုပြီး ခက်ခဲဖို့ပဲ ရှိတော့တယ်” ဟု ၄င်းမှ ထပ်လောင်းပြောသည်။

ထို၀င်ငွေခွန် ပေးဆောင်မှုအတွက် အခွန်ပေးသွင်းမှုအထောက်အထားလက်မှတ်ကို မြန်မာသံရုံးမှ ပြန်လည် ထုတ်ပေးမည်ဖြစ်ပြီး ထိုင်းနိုင်ငံရောက် မြန်မာအလုပ်သမားများအနေဖြင့် နိုင်ငံကူးလက်မှတ်သက်တမ်းတိုးခြင်း၊ အလုပ်သမားသက်သေခံကတ်ပြား၊ ထောက်ခံစာ စသဖြင့် အထောက်အထား စာရွက်စာတမ်းကိစ္စများ လုပ်ဆောင်ရာတွင် ထိုအခွန်ပေးသွင်းမှုစာရွက် ပြသ၍ လုပ်ဆောင်ရမည်ကြောင်း ဘန်ကောက်ရှိ မြန်မာသံရုံးမှ ဒီဇင်ဘာ(၁၄) ရက်နေ့တွင် ထပ်မံထုတ်ပြန်ထားသည်။

အဆိုပါ ၀င်ငွေခွန်ပေးသွင်းရမည့် ထုတ်ပြန်ချက်ကြောင့် ထိုင်းနိုင်ငံ ဘန်ကောက်မြို့ရှိ ကုလသမ္မဂရုံးအရှေ့တွင် မြန်မာအလုပ်သမားများ စုဝေးပြီး ဒီဇင်ဘာ (၁၇)ရက်နေ့တွင် ဆန္ဒပြထုတ်ဖော်ခြင်း ပြုလုပ်ခဲ့ကြောင်းလည်း သိရှိရသည်။

ထို့အပြင် ထိုင်းအစိုးရ အနေဖြင့် မြန်မာစစ်ကောင်စီနှင့် ပူးပေါင်းလုပ်ဆောင်မှုများအား ရပ်တန့်ရန် တောင်းဆိုခဲ့ကြပြီး မြန်မာအလုပ်သမားများမှ စစ်ကောင်စီ၏ ၀င်ငွေခွန် ကောက်ခံမှုကို ကန့်ကွက်ကြောင်း လက်မှတ်များနှင့် သ၀ဏ်လွှာကို ထိုင်းနိုင်ငံ အစိုးရနှင့် လွှတ်တော်သို့ ပေးပို့ရန် ဆောင်ရွက်နေမည်ဟု သိရသည်။