သျှမ်းပြည် သီပေါမြို့နှင့် နမ္မတူမြို့ကြားရှိ မိုးတေတံတား တစ်စင်းထပ်မံ ဖျက်စီးခံလိုက်ရပြီး ယာဉ်ကြီးများဖြတ်သန်းသွားလာ၍ မရတော့ကြောင်း စုံစမ်းသိရသည်။
ယမန်နေ့ (ဒီဇင်ဘာလ ၂၈ ရက်) ညနေပိုင်းအချိန်တွင် သီပေါမြို့နှင့် နမ္မတူမြို့ကြားရှိ မိုးတေတံတား တစ်စင်းမှာ ထပ်မံဖျက်ဆီးခံရပြီး ဆိုင်ကယ်မှလွဲ၍ အခြားယာဉ်ကြီးများ ဖြတ်သန်းသွားလာ၍ မရတော့ကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“တံကားကတစ်စင်းလုံးတော့ မကျိုးကျသေးဘူး။ ဆိုင်ကယ်တွေတော့ သွားလို့ရသေးတယ်။ ယာဉ်ကြီးတွေဖြစ်တဲ့ ကားတွေ၊ ကုန်တင်ကားတွေတော့ ဖြတ်လို့မရတော့ဘူး။ မနေ့ကကျနော်တို့ သီပေါကနေ နမ္မတူလာဖို့ လုပ်သေးတယ်။ ဒါပေမယ့် စစ်တပ်က ပေးမဖြတ်ဘူး ” ဟု ၎င်းဒေသခံတစ်ဦးက ပြောသည်။
အဆိုပါ မိုးတေတံတားသည် သီပေါမြို့နယ်နှင့် နမ္မတူမြို့ကို အဓိကဆက်သွယ်ထားသော တံတားတစ်စင်းဖြစ်သည့် အလျှောက် လက်ရှိတိုက်ပွဲကြောင့် ထွက်ပြေးတိမ်းရှောင်နေရသည့် ဒေသခံနှင့်စစ်ဘေးရှောင်များ အားထားရာ တံတားတစ်စင်းလည်း ဖြစ်သည်။
တအာင်း (ပလာင်) အမျိုးသားလွတ်မြောက်ရေး တပ်မတော် TNLA ဘက်က သီပေါ-နမ္မတူအကြား အဓိကဆက်သွယ်ထားသည့် မိုးတေချောင်းတံတားကို စစ်ကောင်စီ၏ ၅၀၃/၅၀၄ တပ်မှ လာရောက်ပြီး မိုင်းခွဲဖျက်ဆီးခဲ့ကြောင်း ထုတ်ပြန်ထားသည်။
ယင်းကဲ့သို့ တံတားပျက်စီးသွားပြီးနောက် ဒေသခံနှင့်စစ်ဘေးရှောင်များအနေဖြင့် ဖြတ်သန်းသွားလာရန် ခက်ခဲသွားကြောင်း သီပေါမြို့စစ်ဘေးရှောင် ကူညီသူအမျိုးသမီးတစ်ဦးက ထပ်လောင်းပြောသည်။
“အခုတံတားပျက်သွားတော့ သွားလာဖို့ ခက်သွားတာတော့ အသေအချာပဲ။ မူဆယ်၊ နမ့်ခမ်းကနေ လာတဲ့သူတွေလည်း ဒီတံတားကို ဖြတ်လို့မရတော့သလို မန္တလေး၊ နောင်ချို၊ ကျောက်မဲမြို့ကနေ လားရှိုးကိုသွားချင်ရင်လည်း သွားလို့မရတော့ဘူး။ ကျမတို့လည်း စစ်ဘေးရှောင်အတွက် စားနပ်ရိက္ခာ သယ်ချင်ရင် ဒီလမ်းကိုသုံးလို့မရတော့ဘူး။ တခြားလမ်းတွေအသုံးပြုရမယ်၊ အဲ့လမ်းကဝေး လည်းဝေးတယ်”ဟု ၎င်းအမျိုးသမီးတစ်ဦးက ပြောသည်။
သျှမ်းမြောက်ဒေသရှိ ကုန်သွယ်ရေးအတွက် အရေးပါသည့်တံတားများသည် “၁၀၂၇ စစ်ဆင်ရေး” ဖော်ဆောင်သည့် နှစ်လကျော်ကာလအတွင်း သီပေါ-နမ္မတူကြား မိုးတေတံတားအပါအဝင် ၅ စင်းပျက်စီးသွားခဲ့ပြီ ဖြစ်ကြောင်း သိရသည်။
လက်ရှိ သျှမ်းမြောက်ဒေသ နမ့်ဆန်မြို့၊ နမ့်ခမ်းမြို့၊ မန်တုံမြို့၊ မိုင်းလုံမြို့ နှင့် နမ္မတူမြို့ကို တအာင်း တပ်ဖွဲ့ (TNLA) ဘက်မှ အလုံးစုံထိန်းချုပ်နိုင်ခဲ့ပြီဖြစ်သကဲ့သို့ သီပေါမြို့နှင့် ကျောက်မဲမြို့ စသည့်မြို့နယ်များတွင် တိုက်ပွဲဖြစ်ပွားနေလျက်ရှိသည်။
Leave a Comments