သျှမ်းပြည် မူဆယ်မြို့ ကောင်းမူးတုံရပ်ကွက်နေ အမျိုးသမီးတစ်ဦးသည် ယနေ့ (ဒီဇင်ဘာ ၂၈)ရက် နေ့လည် ၁နာရီတွင် ကျည်ထိမှန် ဒဏ်ရာရရှိခဲ့ကြောင်း စုံစမ်းသိရသည်။
ဖြစ်စဥ်မှာ ယနေ့ (ဒီဇင်ဘာ ၂၈)ရက် နေ့လည် ၁နာရီဝန်းကျင်တွင် စစ်ကောင်စီ မှရဟတ်ယာဥ်ဖြင့် မူဆယ်မြို့ပေါ် လှည့်နေချိန် ညီနောင်မဟာမိတ်တပ်ဖွဲ့ မှ မြေပြင်မှ လက်နက်ကြီးဖြင့် လှမ်းပစ်ခတ်ခဲ့ကြောင်း၊ ထိုကျည်ကြောင့် ကောင်းမူးတုံရပ်ကွက် ကောင်းမူးလွယ်နယ်မြေတွင်နေထိုင်သည့် အမျိုးသမီးတစ်ဦး ကျည်ထိမှန်သွားကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
” စစ်ကောင်စီက ရဟတ်ယာဥ်နဲ့ လှည့်နေချိန်မှာ မြေပြင်ကနေ လှမ်းပစ်တာ ရဟတ်ယာဥ်ကို မထိဘဲ လူကိုလာထိတာ။ အဲ့ချိန်တုန်းက အမျိုးသမီး ဝက်တွေကို အစာကျွေးနေချိန်ပါ။ အမျိုးသမီးရဲ့ပေါင်ထိသွားတာ” ဟု အသက် ၃၀ အရွယ်ရှိ အမျိုးသားတစ်ဦး က ဆိုသည်။
ထို့ပြင် မူဆယ်မြို့ နေ့လည် ၁နာရီခွဲကျော်ခန့်တွင်လည်း စစ်ကောင်စီတို့၏ ရဟတ်ယာဉ် အတက်အဆင်း လုပ်နေသည့်အချိန် ညီနောင်မဟာမိတ်တို့ ပစ်ခတ်လိုက်သောကျည်များသည် ရွှေသမင်ကျောင်းနှင့် ဟိုနားရပ်ကွက်ရှိ နေအိမ်များကိုလည်း ထိခိုက်ခဲ့ ကြောင်းဒေသခံများက ထပ်လောင်းပြောသည်။
မူဆယ်မြို့တွင် ယခုရက်ပိုင်း စစ်ကောင်စီမှ ရဟတ်ယာဥ်လာရောက်ပျံ့ဝဲပြီး အတက်အဆင်း ပြုလုပ်နေသဖြင့် မူဆယ်ဒေသခံများသည် တိုက်ပွဲ ပြင်းထန်လာမည်ကို စိုးရိမ်သဖြင့် တရုတ်ပြည် ကျယ်ဂေါင်ဘက်သို့ ဒေသခံ အချို့ သွားရောက် ရွှေ့ပြောင်းနေကြပြီး၊ အချို့သည် မန္တလေးမြို့ဘက်သို့ တိမ်းရှောင်နေကြရသည်။
” မူဆယ်ဒေသခံတွေ ပိုက်ဆံရှိတဲ့သူတွေကတော့ မန္တလေး ဆင်းပြီးသွားနေကြတာရှိသလိုတရုတ်ပြည် ကျယ်ဂေါင်ဘက်ကို တိမ်းရှောင်နေကြတယ်။ ကျနော်ဆိုရင် ညနေ တရုတ်ပြည်ဘက်သွားနေတယ်။ နေ့လည်ဆိုရင် မူဆယ်ဘက်ပြန်လာတယ်။ ညညဆိုရင် စစ်တပ်က လေကြောင်းဗုံးကြဲတက်လို့လေ” ဟု အသက် ၅၀ အရွယ်ရှိ အမျိုးသားတစ်ဦးက သျှမ်းသံတော်ဆင့်ကိုပြောသည်။
အလားတူ ပြီးခဲ့သည့် ယမနေ့ ဒီဇင်ဘာလ ၂၇ ရက်နေ့ တွင်လည်း ဟိုနားရပ်ကွက်ရှိ ဘုန်းကြီးကျောင်း ကျည်ထိမှန်ခဲ့ကြောင်း သိရသည်။
“၁၀၂၇ စစ်ဆင်ရေး” နှစ်လကျော်အကြာ သျှမ်းမြောက်ရှိ ရွှေလီ(ထုန့်မောဝ်း) ဒေသတွင် ထွက်ပြေးတိမ်းရှောင်နေရသည့် စစ်ဘေးရှောင် ၉ ထောင်ကျော်အထိ ရှိလာပြီဖြစ်ကြောင်း သိရသည်။
