သျှမ်းပြည်တောင်ပိုင်း ရွာငံမြို့နယ်အတွင်း လိမ္မော်သီးစျေးကွက် ကျဆင်းလာသည့်အတွက် လိမ္မော်စိုက်တောင်သူများ စားဝတ်နေရေးအတွက် အခက်ခဲဖြစ်နေကြောင်း ဒေသခံများထံမှ သိရသည်။

ရွာငံမြို့နယ်အတွင်းရှိ လိမ္မော်စိုက်ပျိုးမှု လုပ်ကိုင်ကြသည့် တောင်သူများသည် ယမန်နှစ်က လိမ္မော်သီးဈေးကွက် တစ်ပိဿ ခြောက်ထောင်နှုန်းအထိ ရောင်းခဲ့ကြရပြီး ယခုနှစ်တွင် သုံးထောင်ကျော်မျှသာ ရောင်းရသောကြောင့် တောင်သူများ စားဝတ်နေရေးပါ အခက်ခဲဖြစ်နေကြောင်း စုံစမ်း သိရှိရပါသည်။

ထိုကဲ့သို့ လိမ္မော်စျေးကွက် ကျဆင်းနေသည့်အတွက်ကြောင့် ဆန်ဝယ်စားရန်အတွက် လုံလောက်မှု မရှိတော့ကြောင်း ဒေသခံ အမျိုးသား တစ်ဦး ကပြောသည်။

“အရင်ကဆိုရင် လိမ္မော်တစ်ခြင်း ရောင်းရင် ဆန်အိတ်တစ်လုံးရတယ်၊ ခုက လိမ္မော်ငါး ခြင်း လောက်ရောင်းရင်တောင် ဆန်တစ်အိတ် မရနေဘူး ၊ စားဖိုတောင် အနိုင်နိုင်နဲ့ အဆင်ပြေမနေဘူး” ဟု ဒေသခံ အသက် ၃၀ ကျော် အမျိုးသားတစ်ဦးမှ ပြောသည်။

လိမ္မော်သီး ဈေးကွက်ကောင်း မရောင်းရခြင်းသည် နိုင်ငံရေးမတည်ငြိမ်မှု နှင့် စီးပွားရေး ကျဆင်းကာ ကုန်စျေးနူန်းများ အဆမတန် တိုးတက်လာမှုကြောင့် စျေးကောင်း မရောင်းရခြင်း ဖြစ်သည်။

ထို့အပြင် ရာသီဉတု ဖောက်ပြန်မှုကြောင့် လိမ္မော်သီးတွင် အနာတရဖြစ်ပြီး အသီးမလှသောကြောင့် စျေးကောင်းမရခြင်းဖြစ်ကြောင်း ၄င်းအမျိုးသားက ထပ်လောင်းပြောသည်။

ယခင်နှစ်ထက် ယခုနှစ်တွင် လိမ္မော်အထွက်နှုန်းလျော့နည်းလာကြောင်းကိုလည်း ” လိမ္မော် စိုက်ပျိုးမှု လုပ်ငန်းကို စိုက်တဲ့လူလဲ နည်းလာသလို အထွက်နှုန်းလည်း လျော့နည်းလာတယ်၊ ဘာလို့ဆိုတော့ ကုန်စျေးနူန်းကလဲ တက်လာတယ် မြေသြဇာတွေလည်း ဝယ်မထည့်နိုင်ဘူးလေ၊ စိုက်ပျိုးရေးကလည်း အဆင်မပြေကြတော့ဘူး” ဟု လိမ္မော်ခြံ စိုက်ပျိုးရေးလုပ်ကိုင်နေသူ အမျိုးသမီးတစ်ဦးမှ သျှမ်းသံတော်ဆင့်ကို ပြောသည်။

မြန်မာနိုင်ငံမှာ စစ်ကောင်စီက အာဏာသိမ်းပြီးနောက်ပိုင်း တရား ဉပဒေ စိုးမိုးမှု မရှိသောကြောင့် လုယက်မှု ၊ ဒေသထွက်သီးနှံများကို ခိုးယူခံရမှုများ ဆက်တိုက် ကြုံနေရပြီး မလုံခြုံမှုများကိုပါ ခံစားနေရသည်။

ထို့အပြင် တောင်သူများသည် စိုက်ပျိုးရေးလုပ်ငန်းကို လုပ်ကိုင်သူ နည်းပါးလာပြီး လူလတ်ပိုင်း နှင့် လူငယ်များသည်လည်း ပြည်ပထွက်အလုပ်လုပ်ကိုင်နေကြသောကြောင့် ရပ်ရွာထဲတွင် ကလေး နှင့် သက်ကြီးရွယ်အိုများသာ ကျန်ရှိတော့ကြောင်း ထပ်လောင်းပြောကြားသည်။