သျှမ်းပြည် နမ္မတူမြို့နယ်အတွင်း တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) နှင့် အာဏာသိမ်း စစ်ကောင်စီ တို့၏ တိုက်ပွဲ ပြင်းထန်နေပြီး လက်နက်ကြီးကြောင့် အရပ်သား ၂ ဦး သေဆုံးရကြောင်း စုံစမ်းသိရသည်။
ယနေ့ (ဒီဇင်ဘာလ ၂၆) ရက် နံနက်ပိုင်း ၇ နာရီခွဲဝန်းကျင်မှ စတင်ကာ နမ္မတူမြို့ အခြေစိုက် စစ်ကောင်စီ ခြေမြန်တပ်ရင်း (ခမရ) တပ်အမှတ် (၃၂၄) ကို TNLA တပ်ဖွဲ့က ထိုးစစ်ဆင် တိုက်ခိုက်နေပြီး လက်နက်ကြီး/ ငယ်ဖြင့် အပြန်အလှန် ပစ်ခတ်မှု ရှိခဲ့ကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“မနက်ကတည်းက တိုက်ပွဲတွေ ဖြစ်နေတာပါ။ လက်နက်ကြီး/ငယ် သုံးကျတယ်။ ရပ်ကွက်ထဲကိုလည်း လက်နက်ကြီးကျကွဲတယ်။ ဒါပေမဲ့ ထိခိုက်ကျဆုံးမှုကိုတော့ မသိရသေးဘူး၊ မနေ့ကလည်း ရွာထဲ လက်နက်ကြီး ကျလို့ အိမ်တွေ ပျက်စီးတယ်၊ ပြီးတော့ လူကိုလည်း ထိသေးတယ်လေ” ဟု နမ္မတူမြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယမန်နေ့ (ဒီဇင်ဘာလ ၂၅ )ရက်တွင်လည်း အာဏာသိမ်း စစ်ကောင်စီ နှင့် TNLA တပ်တို့ တိုက်ပွဲဖြစ်ပွားရာ စစ်ကောင်စီလေကြောင်းလိုင်းမှ ပစ်လိုက်သည့် လက်နက်ကြီးကြောင့် အရပ်သား ထိခိုက်သေဆုံးမှု ရှိသည့် အပြင် နေအိမ်များလည်း ထိခိုက်ပျက်စီးရကကောင်း သိရသည်။
ယင်းလေကြောင်းလိုင်းပစ်ခတ်မှုကြောင့် နမ္မတူမြို့နယ်၊ ဆိုင်းခေါင်ကျေးရွာအုပ်စု၊ ကောင်းဆာကျေးရွာတွင် ၁ လုံး၊ ပိန်းလောင်းကျေးရွာအတွင်း ၁ လုံး နှင့် တုန်ဟုန်းခမ်းကျေးရွာဘုန်းကြီးကျောင်းဝင်း အတွင်း (၄) လုံး ကျရောက်ပေါက်ကွဲပြီး အရပ်သား ၂ ဦးလည်း ပွဲချင်းပြီး သေဆုံးသွားရကြောင်း အထက်ပါ အမျိုးသားက သျှမ်းသံတော်ဆင့်ကို ပြောသည်။
“မနေ့ကလည်း လက်နက်ကြီးနဲ့ တစ်နေကုန် ပစ်ခတ်နေကြတာပဲ။ မနက် ၁၁ နာရီကနေ ညနေအထိ နားလိုက် ပစ်လိုက်နဲ့ တစ်နေကုန် တိုက်ပွဲဖြစ်တယ်။ ညနေ ၄း၄၅ ဝန်းကျင်မှာ ရွာထဲကို လက်နက်ကြီးကျလို့ နေအိမ်ထဲ ရှိတဲ့ အမျိုးသား ၂ ဦးလည်း ပွဲချင်းပြီး သေဆုံးသွားရတယ်၊ နေအိမ်တွေလည်း ခေါင်မိုးတွေ ပျက်စီးကုန်တယ်” ဟု အထက်ပါ အမျိုးသားက သျှမ်းသံတော်ဆင့်ကို ဆက်ဆိုသည်။
စစ်ကောင်စီ လေကြောင်းလိုင်း လက်နက်ကြီးကြောင့် သေဆုံးသွားရသည့် အရပ်သား ၂ ဦးသည် အသက် (၄၀) ဝန်းကျင်ရှိ နမ္မတူမြို့၊ ရပ်ကွက် (၃) နေ သက်လင်းထွန်း (ခေါ်) အငဲ နှင့် အသက် (၂၀) ဝန်းကျင်ရှိ နမ္မတူမြို့၊ ရပ်ကွက် (၁၀) နေ အောင်ထက်မိုးတို့ ဖြစ်ကြကြောင်းသိရသည်။
နမ္မတူမြို့နယ်အတွင်း စစ်ကောင်စီ နှင့် TNLA တပ်တို့မှ စစ်ရေးပြင်းထန်နေခြင်း ၊ လက်နက်ကြီးဖြင့် အပြန်အလှန်ပစ်ခတ်ခြင်း၊ လေကြောင်းလိုင်းဖြင့် ပစ်ခတ်ခြင်းတို့ကြောင့် အရပ်သား ထိခိုက်သေဆုံးပြီး နေအိမ်များ ထိခိုက်ပျက်စီးရသည့် အပြင် ဒေသခံ အရပ်သား (၂၀၀၀) ဝန်းကျင်ကလည်း အိုးအိမ်စွန့်ခွာ ထွက်ပြေး နေရကြောင်း သိရသည်။
