Sunday, July 21, 2024

ထီရီးရွာတွင် လက်နက်ကြီးများ ကျရောက်၊ ဒေသခံများနှင့်အတူ စစ်ရှောင်များပါ ထပ်မံ တိမ်းရှောင်နေရ

Must read

သျှမ်းပြည် ညောင်ရွှေမြို့နယ် ထီရီး ကျေးရွာတွင် စစ်ကောင်စီဘက်မှ ပစ်ခတ်သောလက်နက်ကြီးများ ကျရောက်မှုနှင့် သေနတ်သံများကြောင့် ကျေးရွာ ဒေသခံများအပြင် ကရင်နီပြည်မှ စစ်ရှောင်လာသူများပါ ထပ်မံ ထွက်ပြေးတိမ်းရှောင်နေရကြောင်း စုံစမ်းသိရသည်။

သျှမ်း-ကရင်နီ (ကယား) နယ်စပ်ဒေသဖြစ်သော ထီရီး နှင့် ဆောင်နန်းခဲ ကျေးရွာများတွင် ပြီးခဲ့သည့် ဒီဇင်ဘာလ (၁၁) ရက်မှ (၁၄)ရက်နေ့အထိ တိုက်ပွဲများ ပြင်းထန်စွာ ဖြစ်ပွားပြီးနောက်ပိုင်း စစ်တပ်ဘက်မှ လက်နက်ငယ်၊ လက်နက်ကြီးများဖြင့် ဆက်တိုက် ပစ်ခတ်နေသဖြင့် ကျေးရွာနေ ပြည်သူများ ထိတ်လန့်ကြောက်ရွံကာ ထွက်ပြေးခဲ့ရကြောင်း သိရှိရသည်။

“တိုက်ပွဲထပ်ဖြစ်မှာ ကြောက်တာရော၊ လက်နက်ကြီးထိမှာရော ကြောက်ရတာပေါ့။ အမှန်က ကျတော်တိုက ကရင်နီကနေ စစ်ရှောင်လာရတာပါ။ ရှောင်တဲ့နေရာမှာ ဒီလိုဖြစ်တော့ ထပ်ရှောင်နေရတာပေါ့။ စစ်ရှောင်ရတာလည်း သုံး၊လေးခါလောက် ရှိနေပါပြီ။ ရွာခံတွေလည်း သီးနှံရိတ်သိမ်းချိန်မှာ ထွက်ပြေးနေရတော့ ခက်ခဲကြတာပေါ့။ ဒါပေမယ့်လည်း လက််နက်ကြီး ထိမှာတော့စိုးရိမ်ကြတာပေါ့။ တိုက်ပွဲလည်း အချိန်မရွေး ဖြစ်ပွားနိုင်တယ်။ ကျနော်တို့က အခု လောလောဆယ် ညောင်ရွှေက စစ်ရှောင်စခန်းမှာပဲ သွားနေပါတယ်” ဟု စစ်ရှောင်အမျိုးသား တစ်ဦးမှ ပြောကြားသည်။

ရွာထဲထိ လက်နက်ကြီးများ ကျရောက်မှူကြောင့် ရွာခံများမှာ နီးစပ်ရာ ရွာများနှင့် ခိုလှုံနိုင်သော ဒေသများတွင် တိမ်းရှောင်နေကြရပြီး တိုက်ပွဲ အခြေအနေကို သေချာမသိရှိသေးတာကြောင့် အိမ်မပြန်သေးဘဲ အခြေအနေ စောင့်ကြည့်နေကြောင်းလည်း ထပ်မံ သိရှိရသည်။

၁၁.၁၁ စစ်ဆင်ရေး စတင်ချိန်မှ စတင်၍ ကရင်နီပြည်နှင့် သျှမ်းကယား နယ်စပ်ဒေသများတွင် မြို့သိမ်း တိုက်ပွဲများ တောက်လျှောက် ဖြစ်ပွားလျက်ရှိရာ ပြီးခဲ့သည့် ဒီဇင်ဘာလ (၁၁) ရက်နေ့တွင်လည်း ဖယ်ခုံအင်း အရှေ့ဘက်ကမ်းရှိ ဆောင်နန်းခဲ ကျေးရွာ တောင်ပေါ်မှ စစ်ကောင်စီ တပ်စခန်းပွိင့်ကုန်းကို တော်လှန်ရေးတပ်ပေါင်းစုများမှ တိုက်ခိုက် သိမ်းယူနိုင်ခဲ့သည်။

လက်ရှိအချိန်တွင် တိုက်ပွဲများနှင့် စစ်ကောင်စီဘက်မှ လေကြောင်းတိုက်ခိုက်မှု၊ လက်နက်ကြီး ပစ်ခတ်မှုများကြောင့် ကရင်နီပြည် နှင့် သျှမ်း-ကရင်နီ နယ်စပ်မှ စစ်ရှောင် အမြောက်အမြား ထွက်ပြေးတိမ်းရှောင်နေရပြီး တိုးမြှင့်လာသည့် တိုက်ပွဲ အခြေအနေကြောင့် အကြိမ်ကြိမ် တိမ်းရှောင်ရသူများလည်း ရှိနေပြီး ခက်ခဲစွာဖြင့် စစ်ရှောင်ကာလကို ကျော်ဖြတ်နေကြကြောင်းလည်း သိရှိရသည်။

Leave a Comments

- Advertisement -spot_img

Latest article