နမ့်ခမ်းမြို့တွင် TNLA ထိန်းချုပ်ပြီးနောက်ပိုင်း ပြည်သူနေအိမ်များ နေ့စဉ်နီးပါး ဖောက်ထွင်းခံနေရကြောင်း စုံစမ်းသိရသည်။
သျှမ်းပြည် နမ့်ခမ်းမြို့တွင် “၁၀၂၇ စစ်ဆင်ရေး” စစ်ကောင်စီနှင့် ညီနောင်မဟာမိတ်(၃)ဖွဲ့တို တိုက်ပွဲဖြစ်ပွားမှုကြောင့် ဒေသခံများ နေရပ်စွန့်ခွာ စစ်ဘေးရှောင်ခဲ့ကြသည်။
ထို့နောက် နမ့်ခမ်းမြို့ကို TNLA တပ်ဖွဲ့မှ ဒီဇင်ဘာ ၁၉ရက် နံနက် ၁နာရီကျော်တွင် အလုံးစုံထိန်းချုပ်နိုင်ခဲ့ပြီး လက်ရှိမှာ နမ့်ခမ်းမြို့ဒေသခံ နေအိမ်များ နေစဥ် ဖောက်ထွင်းခံနေရပြီး၊ နေအိမ်အတွင်းရှိ ပစ္စည်းအကောင်းများ၊ တန်ဖိုးကြီးပစ္စည်းများ သယ်ဆောင်သွားကြောင်း နမ့်ခမ်းမြို့ ဒေသခံများက သျှမ်းသံတော်ဆင့်ကို ပြောသည်။
” ကျမတို့ နေအိမ်ပြန်ကြည့်တော့ အိမ်ထဲက တန်ဖိုးရှိတဲ့ပစ္စည်းတွေဘာတစ်ခုမှ မကျန်ခဲ့ဘူး။ အိမ်တွေလည်း ရစရာမရှိပျက်စီးကုန်ပြီ” ဟု နမ့်ခမ်းမြို့ ဒေသခံ အမျိုးသမီး ကဆိုသည်။
လက်ရှိ နမ့်ခမ်းမြို့အတွင်း TNLA တပ်သားများ နေရာယူထားသော်လည်း စစ်ရှောင်ပြည်သူများ၏နေအိမ်ကို နေ့စဥ် ဖောက်ထွင်းခံရပြီး နေအိမ်ထဲရှိ ပစ္စည်းများခိုးယူခံနေရခြင်း ဆက်ရှိနေသေးကြောင်း၊အိမ်များသည် လက်နက်ကြီးကြောင့်ပျက်စီးမှုရှိသကဲ့သို့ အချို့နေအိမ်များမှာ တမြင်လာရောက်ဖျက်ဆီးသွားကြောင်း တိုက်ပွဲငြိမ်သက်ပြီးနောက် နေအိမ်ပြန်သွားကြည့်သူများက ပြောသည်။
“တချို့အိမ်တွေက လူမရှိလို့ အခန်းတွေဝင်ရှာသွားတာပေါ့။ ဘယ်သူ နေရဲမလဲ။အိမ်ကလူတွေ ပစ္စည်း သယ်ချင် တောင် ပေးမသယ်ဘူး။ ဆေးရုံမှာလည်း သူတို့ပဲ နေနေတာလေ။ ကိုယ့်ပစ္စည်းကိုယ်ဝင်ယူတာ တောင်မရဘူး။ နောက်အိပ်ခန်းတွေ သော့ဖျက်ထားတာ၊ သူတို့သတင်းတွေကို ဖွရင် အိမ်မီးရှို့ပစ်မယ်လို့လည်း ခြိမ်းခြောက်တယ်” ဟု နမ့်ခမ်းမြို့ အသက် ၄၀အရွယ်ရှိ အမျိုးသား တစ်ဦးက သျှမ်းသံတော်ဆင့်ကိုပြောသည်။
ပြီးခဲ့သည့် ဒီဇင်ဘာလ ၂၁ ရက်တွင် နမ့်ခမ်းမြို့ SMILE လက်ဖက်ရည်ဆိုင်ရှေ့ရှိ အာဇာနည်ကျောင်တိုင်ကို လည်း TNLA က မြေကော်ကားဖြင့် လာရောက်ဖျက်ဆီးသွားကြောင်း နမ့်ခမ်းပြည်သူဒေသခံများက ပြောသည်။
သျှမ်းပြည် မူဆယ်ခရိုင် နမ့်ခမ်းမြို့နယ် စစ်ကောင်စီ၏ စခန်းသစ်ကုန်း သိမ်းပိုက်နိုင်ရန် TNLA မှ တစ် လကျော်ကြာ ထိုးစစ်ဆင် တိုက်ခိုက် လာစဉ်အတွင်း တပ်သား ၅၀ နီးပါးကျဆုံးပြီး အများအပြားထိခိုက်ဒဏ်ရရှိကြောင်း ထုတ်ပြန်ခဲ့ပြီး တစ်ပတ်အကြာ တပ်စခန်းများ၊ ရဲစခန်းများနှင့် ဌာနဆိုင်ရာရုံးများအား အလုံးစုံသိမ်းပိုက်ရရှိခဲ့ကြောင်း ရေးသားဖော်ပြထားသည်။
သို့နမ့်ခမ်းမြို့နယ် စစ်ကောင်စီ၏ စခန်းသစ်ကုန်းကို မသိမ်းပိုက်နိုင်ခင် ရက်ပိုင်းအလိုမှာလည်း စစ်ကောင်စီတပ်ဖွဲ့နှင့် ညီနောင်မဟာမိတ် (၃)ဖွဲ့တို့သည် တရုတ်နိုင်ငံကူမင်းမြို့တွင် တွေ့ဆုံခဲ့ကြောင်း သိရသည်။
