သျှမ်းပြည် သိန္နီမြို့နယ် ကွန်ကောက်ကျေးရွာအုပ်စုရှိ ပိန်းဟုန်းရွာကို စစ်ကောင်စီမှ လေယာဉ်ဖြင့် ဗုံးကြဲတိုက်ခိုက်ခဲ့သဖြင့် အမျိုးသမီး ၁ ဦးသေဆုံးသွားခဲ့ကြောင်း စုံစမ်းသိရသည်။
ယမန်နေ့ (ဒီဇင်ဘာလ ၂၂ ရက်) ညနေပိုင်း ၅ နာရီဝန်းကျင်တွင် သိန္နီမြို့နယ် ကွန်ကောက်ကျေးရွာအုပ်စုရှိ ပိန်းဟုန်းရွာကို စစ်ကောင်စီမှ လေယာဉ်ဖြင့် လာရောက်ဗုံးကြဲချသွားပြီး ကျောင်းဇရပ်ကျောင်းပေါ်သို့ ကျရောက်ပေါက်ကွဲကာ အမျိုးသမီး ၁ ဦးသေဆုံးသွားခဲ့ကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“မနေ့ ညနေ သူတို့လေယာဉ်နဲ့ ဗုံးလာကြဲသွားတာ။ ကျောင်းဇရပ်ပေါ်ကို ကျပြီးကွဲသွားတာ။ အမျိုးသမီး ၁ ယောက် ကျည်စထိမှန်ပြီး ဆုံးသွားတယ်။ အဲ့ကျောင်းဇရပ်က အခု ကိုးကန့်စစ်သားတွေ နေတဲ့နေရာ နဲ့နီးတယ်” ဟု ၎င်း ဒေသခံတစ်ဦးက ပြောသည်။
လက်ရှိ ပိန်းဟုန်းရွာရှိ ကျောင်းဇရပ်အနီးတဝိုက်တွင် ကိုးကန့်တပ်ဖွဲ့ MNDAA မှ လူမရှိသည့် နေအိမ်များကို ဝင်ရောက်တပ်စွဲနေထိုင်သဖြင့် စစ်ကောင်စီမှ လေကြောင်းဖြင့် ဗုံးကြဲတိုက်ခိုက်လာရာ အရပ်သားအပေါ် ထိခိုက်လာကြောင်း ၎င်းကဆက်ပြောသည်။
ယင်းကဲ့သို့ စစ်ကောင်စီမှ အဆင်မခြင် လေယာဉ်ဖြင့် ဗုံးကြဲတိုက်ခိုက်မှုများကြောင့် ဒေသခံများ စိုးရိမ်မှု မြင့်တက်နေလျက်ရှိသည်။
“အခုတစ်အိမ်လုံး မိသားစုလိုက်ပြေးရင် နေအိမ်သိမ်းခံရမှာ ကြောက်တယ်။ ကိုးကန့်စစ်သားတွေက သူတို့ကို မကြောက်ဖို့ ပြောတယ်။ ဒါပေမယ့် သူတို့ကလည်း ရွာထဲမှာရှိတဲ့ လူငယ်၊ မူးယစ်ဆေးဝါး သုံးစွဲတဲ့ လူကိုလိုက်ဖမ်းနေတာတွေ့တော့ မကြောက်လို့လည်း မရဘူး။ ကြောက်တယ်လေ။ ပြီးတော့ လေယာဉ်သံကြားရင်လည်း အိမ်ကနေအပြင်ကို မထွက်ရဲတော့ဘူး”ဟု ကွန်ကောက်ကျေးရွာ ဒေသခံတစ်ဦးက ထပ်လောင်းပြောသည်။
အလားတူ ယနေ့ (ဒီဇင်ဘာလ ၂၃) ရက်တွင်လည်း သိန္နီမြို့နယ် ကွန်ကောက်ကျေးရွာအုပ်စုအနီး သေနတ်ပစ်ခတ်သံများ တစ်ရက်နီးပါး ကြားနေရကြောင်း ဒေသခံများထံမှ သိရသည်။
ထို့အပြင် ကိုးကန့်တပ်ဖွဲ့ MNDAA က သိန္နီမြို့နယ်အတွင်း အုပ်ချုပ်ရေး ယန္တရား စတင်လည်ပတ်နိုင်ရန် ညွှန်ကြားချက် ၆ ချက်အကြောင်းကို ကျေးရွာသူကြီးများခေါ်ယူပြီး အစည်းအဝေးပြလုပ်နေလျက် နေကြောင်း သိရသည်။
Leave a Comments