သျှမ်းပြည် မူဆယ်မြို့တွင် ယနေ့ (ဒီဇင်ဘာ ၂၃)ရက် နေ့လည် ၁နာရီဝန်းကျင်တွင် အမျိုးသားတစ်ဦး မြေမြုပ်မိုင်းနင်းမိ၍ ခြေထောက်ပြတ်သွားကြောင်း စုံစမ်းသိရသည်။
သျှမ်းပြည် မူဆယ်မြို့ ဟိုမွန်ရပ်ကွက် ရွှေလီမြစ်(နမ့်မောဝ်) ကမ်းဘေး နွားခြံတစ်ခုအနီးတွင် ယနေ့ (ဒီဇင်ဘာလ ၂၃) ရက် နေ့လည် ၁ နာရီဝန်းကျင်၌ အမျိုးသားတစ်ဦး နွားခြံသွားရာမှ မြေမြုပ်မိုင်းနင်းမိ၍ ခြေထောက်တွင် ပြတ်သွားကြောင်း မူဆယ်ဒေသခံ အမျိုးသားတစ်ဦးက သျှမ်းသံတောင်ဆင့်ကို ပြောသည်။
“ဟုတ်တယ်ခြေထောက်တော့ ပြတ်သွားတာပေါ့၊ထိသွားတာတော့ သူတစ်ယောက်ထဲပါပဲ။မြေမြုပ်မိုင်း အသေးစားနင်းပေါ့”ဟု မူဆယ်ဒေသခံ အမျိုးသားတစ်ဦးက ပြောသည်။
ပြီးခဲ့သည့် (ဒီဇင်ဘာလ ၁၇ ရက်)တွင် မူဆယ်မြို့ ဟိုမွန်ရပ်ကွက်၊ လေယာဉ်ကွင်းဟောင်းအနီးမှ လူနေ အိမ်များ အတွင်း အင်အား ၁၅၀ နီးပါးရှိ စစ်ကောင်စီ တပ်သားများက နှစ်နေရာခွဲ၍ လာရောက် တပ်စွဲနေထိုင်သဖြင့် ဒေသခံများ ရွှေ့ပြောင်းနေထိုင်ရကြောင်း သိရသည်။
လက်ရှိမြေမြုပ်မိုင်းသည် စစ်ကောင်စီဘက်မှ လာရောက်မြုပ်နှံခဲ့သည့် မိုင်းဖြစ်နိုင်ကြောင်းလည်း ဒေသခံများက သုံးသပ်ပြောသည်။
ယင်းကဲ့သို့ စစ်ကောင်စီတပ်ဖွဲ့မှ ရွှေလီမြစ် (နမ့်မောဝ်း)ကမ်းဘေး ကပ်လျက်ရှိ ဟိုမွန်ရပ်ကွက်ရှိ လူနေအိမ် အတွင်း ဝင်ရောင်တပ်စွဲနေထိုင်မှု ပြုလုပ်ရခြင်းသည် မြစ်ကမ်းတလျှောက် ညီနောင်မဟာမိတ်မဟာမိတ် တပ်ဖွဲ့များ စစ်ကြောင်းထိုးစစ်ဆင်လာသည့် သတင်းကြောင့် ဖြစ်နိုင်ကြောင်း ဒေသခံအမျိုးသားတစ်ဦးက သုံးသပ်ပြောဆိုခဲ့သည်။
မူဆယ်မြို့နယ် နှင့် နမ့်ခမ်းမြို့နယ်ရှိ ဘာသာရေး ကျောင်းများ နှင့်ဇရပ်တို့တွင် စစ်ဘေးရှောင် စုစုပေါင်း (၈ထောင်ကျော်)ရှိထားကြောင်း စစ်ရှောင်များကို ကူညီပေးနေသည့် အဖွဲ့ထံမှ သိရသည်။
Leave a Comments