သျှမ်းပြည် ကျောက်မဲခရိုင်၊ နမ္မတူမြို့နယ်အတွင်း အာဏာသိမ်း စစ်ကောင်စီတပ်မှ လက်နက်ကြီးဖြင့် တစ်ဖက်သတ် ရမ်းသမ်းပစ်ခတ်ရာ ကလေးတစ်ဦးနှင့် အရပ်သားတစ်ဦး ထိခိုက်ဒဏ်ရာရသွား ကြောင်း စုံစမ်းသိရသည်။
ယနေ့( ဒီဇင်ဘာလ ၂၃) ရက် နံနက်ပိုင်း ၅ နာရီကျော်မှ ၁၀ နာရီဝန်းကျင်အထိ နမ္မတူမြို့ အခြေစိုက် စစ်ကောင်စီ၏ ခမရ တပ်အမှတ် (၃၂၄) မှ လက်နက်ကြီး ရမ်းသမ်းပစ်ခတ်မှုကြောင့် နေအိမ် ၂ လုံး နှင့် အရပ်သား ၂ ဦး ထိခိုက် ဒဏ်ရာရသွားကြောင်း အသက် (၄၀) ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။
“လက်နက်ကြီးအချက်ပေါင်း ၂၀ ကျော်ပစ်ခဲ့တာ။ တစ်ဖက်သတ်ကြီး ရမ်းပစ်နေတာမျိုးပေါ့။ ရပ်ကွက် (၆) ထဲက အိမ်တစ်လုံး၊ ရပ်ကွက် (၉) ထဲက အိမ်တစ်လုံးထိမှန်ပျက်စီးတယ်၊ အိမ်ထဲမှာ ရှိနေတဲ့ အသက် (၆) နှစ်အရွယ် ကလေးနဲ့ အသက် (၂၀) ကျော် အမျိုးသား တစ်ဦးလည်း သေနတ်ကျည်ဆံ ထိခိုက်ဒဏ်ရာရသွားတယ်” ဟု လုံခြုံရေး အရ အမည် မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီ လက်နက်ကြီးကြောင့် ထိခိုက်ဒဏ်ရာရသည့် အသက် (၆) နှစ်အရွယ် ကလေးငယ် (၁) ဦး နှင့် အသက် (၂၀) ကျော် အရွယ်အမျိုးသားသည် နေအိမ်အတွင်း ရှိနေစဉ် ခမရ (၃၂၄) မှ ပစ်လိုက်သည့် စက်သေနတ် ကျည်ဆန်မှ အိမ်နံရံဖောက်ထွင်းကာ လူကို ထိမှန်ခြင်း ဖြစ်ကြောင်း အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။
“လူကိုထိတာကတော့ လက်နက်ကြီး မဟုတ်ပါဘူး၊ သေနတ်ကျည်ဆံထိတာပါ။ လက်နက်ကြီး နဲ့ အတူ စက်သေနတ်တွေလည်း ပစ်ကြတာလေ၊ အဲ့ဒါ ကျည်ဆံက အိမ်ကိုဖောက်ပြီး လူကို လာထိတာ၊ ဒဏ်ရာပြင်းတယ်၊ ဆေးရုံတက်ရမယ်တဲ့” ဟု အထက်ပါ အမျိုးသားက သျှမ်းသံတော်ဆင့်ကို ပြောသည်။
နမ္မတူမြို့ အခြေစိုက် စစ်ကောင်စီ ခမရတပ် (၃၂၄) တပ်သည် လက်နက်ကြီး / လက်နက်ငယ်များဖြင့် နေ့/ည အချိန်မရွေ ရမ်းသမ်းပစ်ခတ်လေ့ရှိပြီး တစ်ဖက်သတ် ရမ်းသမ်းပစ်ခတ်မှု ဖြစ်နေကြောင်းလည်း ဒေသခံများ ထံမှ သတင်း သိရသည်။
ပြီးခဲ့သည့် ဒီဇင်ဘာလ ၂၀ ရက်နေ့ နမ္မတူမြို့အတွင်း တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) နှင့် အာဏာသိမ်းစစ်ကောင်စီတပ်တို့က လက်နက်ကြီးဖြင့် အချင်းချင်း ပစ်ခတ်မှု ရှိခဲ့ပြီးသည့်နောက် စစ်ကောင်စီတပ်မှ လက်နက်ကြီးဖြင့် နေ့စဥ်နီးပါး တစ်ဖက်သတ် ရမ်းသမ်းပစ်ခတ်မှု ပြုလုပ်နေကြောင်းသိရသည်။
လက်ရှိအချိန်မှာလည်း တအာင်း (ပလောင်) TNLA ၏ ညွှန်ကြားမှုကြောင့် နမ္မတူမြို့နယ်မှ ကျေးရွာပေါင်း (၂၀) နီးပါးရှိ ဒေသခံ (၅၀၀) ကျော်တို့သည် စစ်ရှောင်ထွက်ပြေးနေရပြီး လားရှိုးဘက် စစ်ရှောင်လာသည့် ဒေသခံများကို စစ်ကောင်စီတပ်မှ တားမြစ်ပိတ်ပင်ထားကြောင်းလည်း စစ်ရှောင် အမျိုးသား တစ်ဦးက သျှမ်းသံတော်ဆင့်ကို ပြောသည်။
“လားရှိုးဘက် စစ်ရှောင်သွားကြမယ့်သူတွေက လားရှိုးအဝင် စစ်ဆေးရေးဂိတ်မှာ တားမြစ်စစ်ဆေးခံရပြီး စစ်ရှောင်လာတာဆိုရင် မြို့ထဲ ပေးမဝင်ဘူးလို့ ပြောကြတယ်။ ကျနော်တို့ကတော့ တောင်ယာ စိုက်ခင်း တဲမှာပဲ စစ်ရှောင်ခိုလှုံနေတာပေါ့၊ ဒါပေမဲ့ လုံခြုံဘေးကင်းတဲ့နေရာတော့ မဟုတ်သေးဘူး။ တိုက်ပွဲထပ်ဆိုးလာရင်တော့ ထပ်ရှောင်ရမယ်” ဟု နမ္မတူမြို့ခံ အသက် (၃၀) ကျော် စစ်ရှောင်အမျိုးသား တစ်ဦးက ပြောသည်။
ထို့အပြင် စစ်ကောင်စီတပ်သည် နမ္မတူမြို့နယ်မှ ၎င်းတို့၏ တပ်စခန်းနေရာ အချို့တွင် တိုက်ပွဲဖြစ်ပွားခြင်း မရှိဘဲ တပ်ဆုတ်ပေးနေကြောင်းလည်း သိရသည်။
Leave a Comments