သျှမ်းပြည် ကွတ်ခိုင်မြို့နယ်တွင် စစ်ကောင်စီတပ်က TNLA တံဆိပ်ပါစစ်ဝတ်စုံ ဝတ်ဆင်ပြီး အရပ်သား ၁၀ ဦးထက်မနည်းကို ဖမ်းဆီးခေါ်ဆောင်သွားကြောင်း စုံစမ်းသိရသည်။

ဒီဇင်ဘာလ ၂၀ ရက် ညနေ ၅ နာရီဝန်းကျင်တွင် ကွတ်ခိုင်အခြေစိုက် ခလရ-၄၅ မှ စစ်ကောင်စီတပ်သားများသည် TNLA တံဆိပ်ပါစစ်ဝတ်စုံ ဝတ်ဆင်ပြီး ကွတ်ခိုင်မြို့သစ် ရပ်ကွက်(၈)မှ ဟွေကုတ်ကျေးရွာအထိ လမ်းမကြီးတလျှောက်တွင် အရပ်သား ၁၀ ဦးထက်မနည်းကို ဖမ်းဆီးခေါ်ဆောင်သွားကြောင်း ကွတ်ခိုင်ဒေသခံများက ပြောသည်။

“ရပ်ကွက် ၈ ကနေ ဟွေကုတ်အထိ လမ်းမကြီးတလျောက်ပေါ့၊ အဲ့မှာ ဝင်ဖမ်းတာ။ အကုန်လုံးက စစ်ကောင်စီက TNLA တံဆိပ်ဝတ်ပြီး ဝင်ဖမ်းတာ။ လမ်းတွေမှာ သစ်စက်ကအပြန် ညနေ ၅ နာရီ မှာ တွေ့တဲ့လူ ၁၀ ယောက်လောက်ကို ဖမ်းသွားတယ်။ သူတို့က TNLA ဝတ်စုံတွေ ဝတ်ထားတာ၊ စစ်ကောင်စီတပ်က TNLA ဝတ်စုံနဲ့ ဖမ်းသွားပြီး စခန်းရောက်မှ သိရတာ”ဟု ကွတ်ခိုင်မြို့မှ ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

ကွတ်ခိုင်မြို့တွင် TNLA တံဆိပ်ပါစစ်ဝတ်စုံ ဝတ်ဆင်ထားသည့် စစ်ကောင်စီတပ်သားများ၏ ဖမ်းဆီးခြင်းခံရသူများတွင် ဟိုကျန့်ကျေးရွာမှ ဦးအိုက်အောင် (၄၀ နှစ်) ၊ ‌ဦးကျော်ထွန်း (၃၀ နှစ်) ၊ ဦးအိုက်ဆမ် (၃၀ နှစ်) ၊ ဦးအိုက်ဆွမ် (၃၅ နှစ်)တို့အပါအဝင် အရပ်သား ၁၀ ဦးထက်မနည်းကို ခလရ-၄၅ တပ်ကုန်းဘက်သို့ ဖမ်းဆီးသွားခဲ့ကြောင်း ကွတ်ခိုင်မြို့မှ ဖြစ်စဉ်သိရှိသူများက ပြောသည်။

“နာမည်သိတဲ့ သူတို့ ၄ ယောက်ကို လူလိုသူလို ဖမ်းသွားတာမဟုတ်ဘဲနဲ့ ဦးအိုက်အောင် ဆိုရင် စုတ်စုတ်ပြတ်ပြတ်နဲ့ အဝတ်အစားတွေ ချွတ်ပြီးတော့ ကြိုးနဲ့ လေးဘက်တုတ်ပြီးတော့ကိုပဲ ရက်ရက်စက်စက် ဖမ်းသွားတယ်။ စုစုပေါင်း အဖမ်းခံရတာ ၁၀ ယောက်။ မန်ထန်က ၂ ယောက်ကတော့ မသိဘူး။ တုန်ဆိမ်က ကောင်မလေးတစ်ယောက်နဲ့ ဗမာလူမျိုးတွေတော့ လွှတ်လိုက်တယ်။ တခြားလူတော့ မလွတ်လာသေးဘူး”ဟု ကွတ်ခိုင်မြို့မှ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

ပြီးခဲ့သည့် နိုဝင်ဘာလအတွင်းက လားရှိုးမြို့ရှိ စစ်ကောင်စီတပ်သည် အရပ်သားများကို MNDAA ၊ TNLA နှင့် SSPP တပ်ဖွဲ့တို့၏ စစ်ဝတ်စုံများကို ချူပ်ခိုင်းထားကာ စစ်ကောင်စီတပ်မှ ပြည်သူလူထုများအပေါ် စစ်ရာဇဝတ်မှုများ ကျူးလွန်ပြီး MNDAA နှင့် TNLA တပ်ဖွဲ့များကို စွပ်စွဲရန် ကြံစည်နေသည်ဟု ကိုးကန့်မီဒီယာမှ နိုဝင်ဘာလ ၁၃ ရက်တွင် သတင်းထုတ်ပြန်ထားသည်