သျှမ်းပြည် မန်တုံမြို့နယ်တွင် တအာင်း(ပလောင်)တပ်ဖွဲ့ TNLA နှင့် စစ်ကောင်စီတပ်တို့ တိုက်ပွဲပြင်းထန်နေစဉ်အတွင်း အရပ်သားဒဏ်ရာရရှိခြင်းနှင့် နေအိမ်ထိခိုက်ပျက်စီးခြင်းများ ရှိကြောင်း စုံစမ်းသိရသည်။

ဒီဇင်ဘာလ ၁၉ ရက်တွင် မန်တုံမြို့တွင် စစ်ကောင်စီတပ်က လက်နက်ကြီးနှင့် လေကြောင်းဗုံးကြဲမှုကြောင့် အမျိုးသမီး ၁ ဦး ထိခိုက်ဒဏ်ရာရပြီး လူနေအိမ် ၁၀ လုံးထက်မနည်း ထိခိုက်ပျက်စီးခဲ့ကြောင်း တအာင်းအမျိုးသမီးအဖွဲ့က ယမန်နေ့ (ဒီဇင်ဘာလ ၂၀ ရက်)တွင် သတင်းထုတ်ပြန်ထားသည်။

မန်တုံမြို့နယ်အခြေစိုက် စစ်ကောင်စီတပ် ခလရ-၁၃၀ ကို တအာင်း(ပလောင်)တပ် TNLA က ဒီဇင်ဘာလ ၁၉ ရက် နံနက် ၅ နာရီဝန်းကျင်မှ စတင်ထိုးစစ်ဆင် တိုက်ခိုက်ခဲ့ပြီး မန်တုံမြို့အနီးတစ်ဝိုက်ရှိ လွယ်ကန်၊ မန်ဖန်၊ တာလတ်နှင့် ပန်နင်ကျေးရွာများသို့ စစ်ကောင်စီတပ်မှ လက်နက်ကြီးနှင့် လေကြောင်းပစ်ကူတို့ဖြင့် အကြိမ်ရေများစွာ ရမ်းသမ်းပစ်ခတ်ခဲ့ကြောင်း မန်တုံဒေသခံများက ပြောသည်။

“တိုက်ပွဲမဖြစ်ခင် သုံးလေးရက်ကတည်းက ဖုန်းလိုင်းကော၊ အင်တာနက်ကော ပျောက်သွားတာ။ အခု တော်တော်များများလည်း ရှောင်နေကြပြီ။ လားရှိုးဘက် ရှောင်တဲ့လူကော၊ ရွာဘက်ကို ရှောင်တဲ့လူကော။ ဒီဇင်ဘာ လလယ်ကစပြီး နေ့တိုင်း တိုက်ပွဲဖြစ်နေတယ်။ လေယာဉ်နဲ့လည်း ဗုံးလာကြဲတော့ မန်ကန်ရွာဘက်မှာလဲ အိမ်နဲ့ ဘုန်းကြီးကျောင်းကောပဲ ဗုံးထိတယ်လို့ ပြောတယ်”ဟု မန်တုံမြို့မှ စစ်ဘေးရှောင်လာသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထို့အပြင် မန်တုံမြို့နယ်မှ လားရှိုးမြို့သို့ စစ်ဘေးရှောင်မည့်သူများကို စစ်ကောင်စီတပ်က နမ့်ဆန်မြို့လမ်းခွဲတွင် တားဆီးစစ်ဆေးနေကြောင်းလည်း မန်တုံမြို့မှ ၎င်းစစ်‌ဘေးရှောင် အမျိုးသမီးက ဆက်ပြောသည်။

မန်တုံမြို့ပေါ်ရှိ စစ်ကောင်စီလက်အောက်ခံ ရဲစခန်းနှင့် ရုံးဌာနအချို့တို့ကို TNLA တပ်ဖွဲ့က သိမ်းပိုက်ထားသည်ဟု မန်တုံဒေသခံများထံမှ သိရသည်။

လက်ရှိတွင် နမ့်ဆန်နှင့် နမ့်ခမ်းမြို့တို့ကို TNLA တပ်ဖွဲ့က အလုံးစုံ ထိန်းချုပ်ထားနိုင်ပြီး မန်တုံနှင့် နမ္မတူမြို့နယ်တို့တွင် စစ်ကောင်စီတပ်နှင့် နှစ်ဘက်ထိတွေ့တိုက်ပွဲ ပြင်းထန်နေသည်။