သျှမ်းပြည် လောက်ကိုင်မြို့အတွင်းတွင် စစ်ကောင်စီ လက်အောက်ခံ ပြည်သူ့စစ်အချင်းချင်း ပစ်ခတ်မှု ဖြစ်ပွားပြီးနောက် စစ်ကောင်စီ တပ်ဖွဲ့ နှင့် ကိုးကန့်တပ်ဖွဲ့ MNDAA တို့အကြား တိုက်ပွဲဆက်လက် ဖြစ်ပွားခဲ့ကြောင်း စုံစမ်းသိရသည်။
ထို့တိုက်ပွဲများဖြစ်ပွားပြီးနောက် စစ်ကောင်စီဘက်မှ လေကြောင်းလိုင်းဖြင့် ဗုံးကြဲတိုက်ခိုက်သည်အထိ တိုက်ပွဲပြင်းထန်ကြောင်း သိရသည်။
ယမန်နေ့ ဒီဇင်ဘာလ ၂၀ ရက်တွင် အာဏာသိမ်း စစ်ကောင်စီ တပ်နှင့် ကိုးကန့်တပ်ဖွဲ့ MNDAA တပ်တို့သည် လောက်ကိုင်မြို့၊တာရွေထန် နှင့် ဆီအောနယ်တို့ဘက်၌ တိုက်ပွဲ ပြင်းထန်ခဲ့ပြီး စစ်ကောင်စီမှ လေယာဥ်ဖြင့် ဗုံးကြဲတိုက်ခိုက်မှု ပြုခဲ့ကြောင်းလည်း သိရသည်။
“သူတို့တိုက်ပွဲက ဒီဇင်ဘာလ ၁၉ ကတည်းက စခဲ့တာပါ။ ပြည်သူ့စစ်အချင်းချင်း အရင်ပစ် ကြတာ။ ပြီးမှ စစ်ကောင်စီ နဲ့ ကိုးကန့်တိုက်ပွဲ စဖြစ်ပြီး လေယာဥ်စစ်ကူနဲ့ ဗုံးတွေကြဲချတာ။ အဆောက် အအုံတွေ ထိတယ်၊ လူတွေလည်းထိလောက်တယ်။ အတိအကျတော့ မသိဘူး။ ပြည်သူ့စစ်တွေ ရှိတဲ့ နေရာလည်း စစ်ကောင်စီက ဗုံးကြဲချတယ်” ဟု လောက်ကိုင်မြို့ခံ အသက် (၃၀) အမျိုးသား တစ်ဦးက သျှမ်းသံတော်ဆင့်ကို ပြောသည်။
အလားတူပင် ပြီးခဲ့သည့် ဒီဇင်ဘာလ ၁၉ ရက်တွင်လည်း လောက်ကိုင်မြို့တွင်း သွားလာလှုပ်ရှားသည့် စစ်ကောင်စီ လက်အောက်ခံ ပြည်သူ့စစ် တပ်ဖွဲ့ ဖြစ်ကြသည့် ပယ်ရှောက်ချိန် တပ်ဖွဲ့ နှင့် ကောဝူး ဆိုသူ ခေါင်းဆောင်သည့် ပြည်သူ့စစ်တပ်ဖွဲ့တို့ အချင်းချင်း ပစ်ခတ်မှု ဖြစ်ခဲ့ကြောင်းသိရသည်။
ယင်းကဲ့သို့ ပြည်သူ့စစ် တပ်ဖွဲ့ အချင်းချင်း ပစ်ခတ်မှု ရှိနေသည့်အချိန် ကိုးကန့်တပ်ဖွဲ့မှလည်း စစ်ကောင်စီ တပ်ကို ထိုးစစ်ဆင်မှု ပြုလုပ်လာရာ စစ်ကောင်စီမှ လေယာဥ်စစ်ကူဖြင့် ဗုံးကြဲ တိုက်ခိုက်ခဲ့ကြောင်း အသက် (၃၀) ဝန်းကျင် အမျိုးသားက သျှမ်းသံတော်ဆင့်ကို ဆက်ပြောသည်။
“မြေပြင် အင်အား အခြေအနေအရ ကိုးကန့်ကို စစ်ကောင်စီက မယှဥ်နိုင်လို့ လေယာဥ် စစ်ကူနဲ့ ဗုံးကြဲချတာ ထင်တယ်။ ဒါပေမဲ့ ထူးဆန်းတာက ကိုးကန့်တပ်တွေ ရှိတဲ့နေရာရော၊ ပြည်သူ့စစ်တွေ ရှိတဲ့နေရာရော အကုန်ရော ကြဲချသွားတာ” ဟု အထက်ပါ အမျိုးသားက သျှမ်းသံတော်ဆင့်ကို ဆက်ဆိုသည်။
လောက်ကိုင်မြို့တွင်း တိုက်ပွဲဖြစ်စဥ်ကြောင့် ထိခိုက်သေဆုံးမှု အရေအတွက်များကို သျှမ်းသံတော်ဆင့်မှ ဆက်လက်စုံစမ်းနေဆဲ ဖြစ်သည်။
ပြီးခဲ့သည့် ဒီဇင်ဘာ ၁၇ ရက်တွင် ရန်လုံကျိုင်းနယ်စပ်ဂိတ်ကို ကိုးကန့်တပ်ဖွဲ့မှ သိမ်းပိုက်နိုင်ခဲ့ပြီးနောက် လောက်ကိုင်မြို့ဘက် တိုက်ပွဲ ဆက်လက်ပြင်းထန်လာခြင်း ဖြစ်သည်။
ပြီးခဲ့သည့် နိုဝင်ဘာ ၂၂ ရက်ကလည်း လောက်ကိုင်မြို့အထွက် တုန်ချိန်နှင့် ဆယ်တန်ဂိတ်တို့တွင် လက်နက်ကြီး ကျရောက်ပေါက်ကွဲခြင်းကြောင့် ပြည်သူ ၈ ဦး သေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိခဲ့ကြောင်း သိရသည်။
Leave a Comments