သျှမ်းပြည် သိန္နီမြို့နယ်တွင် ကိုးကန့်တပ်ဖွဲ့ MNDAA ၏ အုပ်ချုပ်ရေး ယန္တရားစတင်လည်ပတ်နိုင်ရန် ကျေးရွာသူကြီးများကို အစည်းအဝေး ခေါ်ယူတွေ့ဆုံပြီး ညွှန်ကြားချက် ၆ ချက်ထုတ်ပြန်ပြီးနောက် စာသင်ကျောင်းများ၌ တရုတ်စာမှလွှဲ၍ အခြားဘာသာစကား သင်ကြားခွင့်မရ သတင်းမှား ဖြန့်ဝေနေသည်။

စစ်ကောင်စီ ဝါဒဖြန့်တယ်ရီဂရမ်ဖြစ်သည့် (မှိုင်းဝေ) အကောင်းတစ်ခုမှ “သိန္နီမှာ MNDAAက ယနေ့ဝန်ထမ်းတွေကို အစည်းအဝေးခေါ်တယ်။ အုပ်ချုပ်ရေးစတင်ဖို့ ညွှန်ကြားချက် ခြောက်ချက် ထုတ်ပြန်တယ်။ စာသင်ကျောင်းတွေမှာ တရုတ်စာကလွဲလို့ အခြားဘာသာ စာမသင်ရ၊ မြန်မာငွေ မသုံးစွဲရလည်းပါတယ်”ဟု ဆိုကာ ပြည်သူလူထု စိုးရိမ်မှုမြင့်တက်အောင် ရည်ရွယ်ချက်ဖြင့် လှည့်ဖြားမှားယွင်းစွာ ရေးသား ဖြန့်ဝေနေသည်။

Archive Link- https://archive.ph/KnN5o
သျှမ်းသံတော်ဆင့် အချက်အလက် စစ်ဆေးသူများက အဆိုပါအကြောင်းအရာကို စစ်ဆေးမှုပြု လုပ်ခဲ့သည်။ ယင်းမှာ အချက်အလက် မှားယွင်းနေကြောင်း တွေ့ရသည်။
ကိုးကန့်တပ်ဖွဲ့မှ ကြေညာထားသည့် အချက် ၆ ချက်ထဲမှာ ဒေသအတွင်းရှိ ဆရာဝန်နှင့် ဆရာ/ဆရာမ စာရင်းပေးပို့ရန်၊ ကိုးကန့်စစ်သားများ ပြည်သူများကို အနိုင်ကျင့်လျှင် တိုင်ကြားရန် နှင့် မူးယစ်ဆေးဝါး၊ ရာမဆေးပြား သုံးစွဲသူများကို ဖမ်းမိလျှင် စစ်သားအဖြစ် စုဆောင်းခံရမည် စသဖြင့် ညွှန်ကြားချက်များ သာပါရှိပြီး စာသင်ကျောင်းများ၌ တရုတ်စာလွှဲ၍ အခြားဘာသာ သင်ကြားခွင့်မရှိဆိုသည့် အချက်မပါရှိကြောင်း ဒေသခံများပြောချက်အရ သျှမ်းသံတော်ဆင့်မှ ရေးသားဖော်ပြထားသည်။

မူရင်လင့် – https://burmese.shannews.org/archives/38828

လွတ်လပ်ပြီး ယုံကြည်ရသည့် အခြားမီဒီယာများတွင်လည်း အဆိုပါအကြောင်းအရင်းကိစ္စနှင့် ပတ်သက်၍ ရေးသားဖော်ပြခြင်း မရှိပေ။

ယင်းကိစ္စနှင့် ပတ်သက်၍ သိန္နီမြို့ဒေသခံတစ်ဦးက “အစည်းအဝေးလုပ်တာတော့ သိတယ်။ စာသင်ကျောင်းမှာ တရုတ်စာကလွဲလို့ အခြားဘာသာ စကားတွေ သင်လို့မရဘူးဆိုတာ မကြားသေးဘူး။ ကျောင်းလည်း မဖွင့်ဘူး။ ကျပ်ငွေ သုံးစွဲလို့မရဘူးဆိုတဲ့သတင်းလည်း မဟုတ်ဘူး။ သိန္နီမြို့က မနက်ဈေးနေ့တွေမှာ ကျပ်ငွေနဲ့ သုံးလို့ရတယ်” ဟု အတည်ပြု ပြောဆိုထားသည်။

ထို့ကြောင့် သိန္နီမြို့နယ်တွင် ကိုးကန့်တပ်ဖွဲ့မှ ညွှန်ကြားချက် ၆ ချက်ထုတ်ပြန်ပြီးနောက်ပိုင်း စာသင်ကျောင်းများ၌ တရုတ်စာမှလွှဲ၍ အခြားသာဘာစကား သင်ကြားခွင့်မရကြောင်း သတင်းမှာ အမှားဖြစ်ပြီး လူအများ စိုးရိမ်မှု မြင့်တက်အောင် ရေးသားဖြန့်ဝေနေခြင်း ဖြစ်သည်။

သျှမ်းသံတော်ဆင့် စာဖတ်ပရိတ်သတ်များအနေဖြင့် လူမှုကွန်ရက်စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲ စိတ်ချရသော သတင်းမီဒီများတွင် သွားရောက်ဖတ်ရှု့ကြရန် တိုက်တွန်းပါသည်။

ထို့အပြင် သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့်ရဲ့ Chat Box မှ တစ်ဆင့် သတင်း၏ လင့်ခ် (သို့မဟုတ်) Screen Short ပုံပေးပို့လာခြင်းဖြင့် စစ်ဆေးနိုင်သည်။