သျှမ်းပြည် ဖယ်ခုံမြို့နယ်ဆောင်နန်းခဲကျေးရွာ အထက်ပိုင်း၊တောင်ပေါ်စခန်းကုန်း ပွိုင့်ကုန်းကို ဒီဇင်ဘာလ (၁၁) ရက် ညနေတွင် မိုးဗြဲ-ဖယ်ခုံ ၁၁၁၁ မဟာမိတ်တော်လှန်ရေးအင်အားစုများက အောင်မြင်စွာ တိုက်ခိုက်သိမ်းပိုက်နိုင်ခဲ့ကြောင်း ထုတ်ပြန်ခဲ့သည်။
ဒီဇင်ဘာလ ၁၁ ရက် နံနက် ၈နာရီကျော်မှစပြီး ညနေ ၃ နာရီကျော်ထိ ၇နာရီဝန်းကျင်ကြာ တိုက်ပွဲ ဖြစ်ပွားခဲ့ပြီးနောက်တွင် သိမ်းပိုက်ရရှိခဲ့ကြောင်း သိရသည်။
တိုက်ပွဲစစ်ဆင်ရေးအတွင်း လက်နက်ကြီး ပစ်ခတ်မှု ၉၂ ကြိမ် နှင့် လေကြောင်းတိုက်ခိုက်မှု ၁၂ ကြိမ် ပြုလုပ်ခဲ့ကြောင်း မိုးဗြဲ-ဖယ်ခုံ ၁၁၁၁ မဟာမိတ် တော်လှန်ရေး အင်အားစုများက ဒီဇင်ဘာ ၁၉ ရက်နေ့တွင် ထုတ်ပြန်ထားသည်။
နိုဝင်ဘာလ ၁၁ ရက်မှ စတင်လိုက်သည့် (၁၁.၁၁) စစ်ဆင်ရေးကို မိုးဗြဲ – ဖယ်ခုံ မြို့နယ်အတွင်းတွင် ဆင်နွှဲလျက်ရှိပြီး စစ်ကောင်စီခြေကုပ်ယူထားသည့် ကင်းစခန်း၊ ထောက်ပို့စခန်းတွေကို မဟာမိတ် တော်လှန်ရေး အင်အားစုတွေက စုပေါင်း တိုက်ခိုက်နေကြောင်း သိရသည်။
မဟာမိတ်တော်လှန်ရေးအင်အားစုတွင် အလယ်ပိုင်းတိုင်း စစ်ဌာန၊ ရှမ်းတောင်စစ်ဒေသ (ခွဲ) ဗျူဟာ (၁)၏ ၁၀၀၁ (မိုးဗြဲ PDF- တပ်ရင်း ၁ )၊ ၁၀၀၂ (ဖယ်ခုံ PDF-တပ်ရင်း ၁)၊ ၁၀၀၄ (PKS PDF)၊ ၁၀၀၆ (ဖယ်ခုံ PDF-တပ်ရင်း ၂ )၊ ၁၀၀၇ (မိုးဗြဲ PDF-တပ်ရင်း ၂ )၊ KNDF ဗျူဟာ (၁)၏ တပ်ရင်း ၃၊ တပ်ရင်း ၁၁ နဲ့ တပ်ရင်း ၂၂၊ မြို့ပြတော်လှန်ရေးတပ်ဦး(Urban Revolutionary Front U.R.F)၊ ဗျူဟာ (၂)ရဲ့ ၁၀၀၃ တပ်ရင်း၊ ၁၀၀၈ SSRY တပ်ရင်းနှင့် ၁၀၀၉ IPDF တပ်ရင်း တို့ စုပေါင်းတိုက်ခိုက်ခဲ့ကြောင်းထုတ်ပြန်ထားသည်။
