သျှမ်းပြည် ကျောက်မဲခရိုင်၊ နမ္မတူမြို့နယ်အတွင်း၌ တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) က ဝင်ရောက်နေရာယူပြီး ကတုတ်ကျင်းများပါ တူးထားနေကြောင်း ဒေသခံများထံ မှ စုံစမ်းသိရသည်။
ယမန်နေ့ (ဒီဇင်ဘာလ ၂၀) ရက် နံနက်ပိုင်း ၇ နာရီ ဝန်းကျင်တွင် TNLA စစ်ကြောင်း တစ်ခုသည် နမ္မတူမြို့ ကြူဆော့ကျေးရွာမှ တစ်ဆင့် ရပ်ကွက် (၈) သို့ ဝင်ရောက် လာပြီး၊ အမှတ် (၁) (၃) (၅) ရပ်ကွက်သို့လည်း အင်အားဖြန့်ကျက်နေရာယူထားကြောင်း အသက် (၅၀) ဝန်းကျင် ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“သူတို့ အင်အားကတော့ ၁၀၀ ကျော်ရှိမယ်ထင်တယ်။ နမ္မတူမြို့ မြောက်ဘက် တစ်ခြမ်းလုံးကို သူတို့ အင်အားဖြန့်ကျက်ထားတဲ့ အနေအထားရှိနေတယ်။ တချို့က ရွာထဲ နေရာယူထားတယ်၊ သူတို့ နေရာယူ ထား တဲ့နေရာတွေမှာ ကတုတ်ကျင်းတွေပါ တူးထားကြတာ။” ဟု လုံခြုံရေး အရ အမည်မဖော်လိုသည့် အသက် (၅၀) ဝန်းကျင် အမျိုးသမီး တစ်ဦးက သျှမ်းသံတော်ဆင့်ကို ပြောသည်။
ယခင် နမ္မတူမြို့နယ်၊ နမ့်မိုင်းဆော့ကျေးရွာရှိ ဘုန်းကြီးကျောင်းဝင်းအတွင်း တပ်စွဲ နေရာယူထားသည့် TNLA တပ်သား ၅၀ ကျော်သည်လည်း ဘုန်းကြီးကျောင်း ပတ်ဝန်းကျင်နှင့် အနီးတစ်ဝိုက်ကို ကင်းလှည့် လုံခြုံရေး စစ်ဆေးမှုများ ပြုလုပ်နေကြောင်း သိရသည်။
ယင်းကဲ့သို့ TNLA တပ်မှ နမ္မတူမြို့ မြောက်ဘက်ခြမ်း အတွင်း စစ်အင်အား ဖြည့်တင်းလာခြင်း၊ ကတုတ်ကျင်းများ တူးထားခြင်းတို့ကြောင့် နမ္မတူမြို့ အတွင်းရှိ အခြေခံပညာစာသင်ကျောင်းများကို လည်း ပိတ်ထားရကြောင်း အသက် (၃၀) ကျော် အမျိုးသားက သျှမ်းသံတော်ဆင့်ကို ပြောသည်။
“စာသင်ကျောင်းပြန်ဖွင့်တာ တစ်လတောင် မရှိသေးဘူး၊ အရင်ကလည်း ဒီလိုပဲ စစ်ရေးတင်းမာလို့ ပိတ်ထားရတာ။ အခုလည်း စစ်သားတွေ ပိုများ ပြီးမလုံခြုံတော့တဲ့ အခြေအနေတွေကြောင့် မနေ့ကပဲ ကျောင်းကို ပြန်ပိတ်လိုက်တယ်။ ဘယ်တော့ ပြန်ဖွင့်မလဲ ဆိုတာ မသိဘူး” ဟု အသက် (၃၀) ကျော် ဒေသခံ အမျိုးသားက သျှမ်းသံတော်ဆင့်ကို ပြောသည်။
ပိတ်ထားရသည့် စာသင်ကျောင်းများသည် နမ္မတူမြို့နယ် အမက ဆိုက်ခေါင်ကျောင်း၊ အမှတ် (၃) မူလွန် ကျောင်း၊ ရပ်ကွက် (၃) ရှိ အထက (၂) နှင့် သတလ(၃) ဝန်ထမ်း ရပ်ကွက်ရှိ အမှတ် (၁) အထက ကျောင်း ၊ အမှတ်(၂) အလက ကျောင်းတို့ ဖြစ်ကြပြီး ကျောင်း သား/သူ စုစုပေါင်း (၂၀၀၀) ဝန်းကျင်ရှိ ကြောင်းလည်း သိရသည်။
လက်ရှိတွင် စစ်ကောင်စီ တပ်ဖွဲ့သည် နမ္မတူမြို့ရှိ ခမရ ၃၂၄ မှ တပ်သားများသည် ဆိုက်ခေါင်ကျေးရွာ အုပ်စုရှိ မန်ဖွေးကျေးရွာအနီး ၊ တုန့်ဟုန်းခမ်းကျောင်းတိုက်၊ ရန်အောင်ကျောင်းတိုက် နှင့် ဝန်ထမ်းရပ်ကွက် ဖြစ်သည့် သတလ(၃) ရပ်ကွက် မြို့နယ်တရားရုံး အနီး လမ်းလေးခွတို့တွင် နေရာယူထားပြီး နှစ်ဖက်တပ်ဖွဲ့ စစ်ရေးပြင်ဆင်မှုများ ပြုလုပ်နေကြကြောင်း လည်းဒေသခံများထံမှ သိရသည်။
အာဏာသိမ်း စစ်ကောင်စီ နှင့် TNLA တပ်ဖွဲ့ ပါဝင်သည့် မဟာမိတ်တပ်ဖွဲ့တို့၏ ၁၀၂၇ စစ်ဆင်ရေးသည် လက်ရှိအချိန်ထိ သျှမ်းမြောက်ဒေသအတွင်း တိုက်ပွဲပြင်းထန်နေလျက်ရှိပြီး၊ လက်နက်ကြီး / ငယ် အပြင် လေကြောင်းလိုင်းဖြင့်ပါ ပစ်ခတ်တိုက်ခိုက်မှု ပြုလုပ်နေကြသည့်အတွက် နမ္မတူမြို့ဒေသခံများ ကလည်း စစ်ရေးပိုမိုပြင်းထန်မည်ကို စိုးရိမ်နေ ကြကြောင်း ပြောဆိုနေကြသည်။
