သျှမ်းပြည် ကျောက်မဲမြို့နယ်တွင် စစ်ကောင်စီတပ်မှ လေကြောင်းဗုံးကြဲမှုကြောင့် အသက် ၁၄ နှစ်အရွယ်ရှိ မိန်းကလေး ၂ ဦး အပါအဝင် စုစုပေါင်း ၃ ဦး သေဆုံးပြီး၊ ၂ ဦး ထိခိုက်ဒဏ်ရာရရှိကြောင်း စုံစမ်းသိရသည်။
ယမန်နေ့ (ဒီဇင်ဘာလ ၁၈ ရက်) ညနေ ၅ နာရီခန့်က ကျောက်မဲမြို့နယ် ဟူးကွက်ကျေးရွာတွင် တိုက်ပွဲတစုံတရာ ဖြစ်ပွားခြင်းမရှိဘဲ စစ်ကောင်စီတပ်မှ လေကြောင်းဗုံးကြဲ တိုက်ခိုက်မှုကြောင့် အသက် ၁၄ နှစ်အရွယ် လွေးမေသဇင်မွန်နှင့် လွေးမေမြတ်မွန် အမည်ရှိ ကျောင်းသူနှစ်ဦးနှင့် အသက် ၆၀ နှစ်အရွယ်ရှိ ဦးကျော်ဝင်း တို့သည် ပွဲချင်းပြီး သေဆုံးသွားခဲ့ကြောင်း တအာင်းအမျိုးသမီးအဖွဲ့အစည်း၏ ပြောရေးဆိုခွင့်ရှိသူတစ်ဦးက ပြောသည်။
“ကျောက်မဲမှာ တိုက်ပွဲဖြစ်ပွားတာ မဟုတ်ဘဲနဲ့ လေယာဉ်က လာရောက်ဗုံးကြဲ တိုက်ခိုက်လို့ သေဆုံးသွားတာက ကျောင်းသူလေး နှစ်ယောက်ရှိမယ်။ အဖိုးတစ်ယောက် ရှိမယ်။ ညနေ မိုးချုပ်ခါနီး ၅ နာရီလောက်မှာ ဗုံးလာကြဲသွားတာ။ သုံးယောက်စလုံးက တစ်ခါတည်း ပွဲချင်းပြီး သေဆုံးသွားတယ်။ ထိခိုက်ဒဏ်ရာရတာတော့ ဖြစ်စဉ်အသေးစိတ် မသိရဘူး”ဟု တအာင်းအမျိုးသမီးအဖွဲ့၏ ပြောရေးဆိုခွင့်ရှိသူတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့နယ် ဟူးကွက်ကျေးရွာတွင် လေကြောင်းဗုံးကြဲမှုကြောင့် ထိခိုက်ဒဏ်ရာရသူနှစ်ဦးမှာ အသက် ၅၀ ကျော်အရွယ်ရှိ ဦးအိုက်ပွင့်နှင့် ဒေါ်လှခင်တို့ဖြစ်ပြီး ဘုန်းကြီးကျောင်းအပါအဝင် ပြည်သူနေအိမ် ၁၀ လုံးထက်မနည်း ထိခိုက်ပျက်စီးခဲ့ကြောင်း သိရသည်။
ထို့အပြင် ဒီဇင်ဘာလဆန်းပိုင်းမှစ၍ ကျောက်မဲမြို့အခြေစိုက် စစ်ကောင်စီတပ် ခမရ-၅၀၁/၅၀၂ နှင့် မိုင်းငေါ့မြို့ရှိ စစ်ကောင်စီတပ်တို့မှလည်း ငြိမ်းချမ်းရေးကုန်း၊ လွယ်ခေါ်၊ အေးရှားဝေါလ်တိုးဂိတ်၊ ကြူရှော၊ မန်ခါ၊ တော့ဆန်နှင့် ဟူးစွန်ကျေးရွာများဘက်သို့ လက်နက်ကြီးများဖြင့် နေ့စဉ်နီးပါး ရမ်းသမ်းပစ်ခတ်လာကြောင်း ကျောက်မဲဒေသခံများက ပြောသည်။
“၁၀၂၇ စစ်ဆင်ရေး” တစ်လခွဲကျော်ကာလအတွင်း ကျောက်မဲမြို့နယ်တွင် စစ်ကောင်စီ၏ လက်နက်ကြီးနှင့် လေကြောင်းဗုံးကြဲမှုကြောင့် အမျိုးသမီး ၂ ဦးနှင့် ကလေး ၂ ဦး အပါအဝင် စုစုပေါင်း ၁၁ ဦး သေဆုံးပြီး ၁၅ ဦးထက်မနည်း ထိခိုက်ဒဏ်ရာရရှိကာ ပြည်သူနေအိမ် ၁၀၀ နီးပါးခန့် ထိခိုက်ပျက်စီးခဲ့ရကြောင်း ကျောက်မဲဒေသခံများထံမှ သိရသည်။
Leave a Comments