စစ်ကောင်စီ ဦးဆောင်ကျင်းပသည့် ” ဓနုအမျိုးသားနေ့” ကို ဓနုတိုင်းရင်းသား လူမျိုးတို့၏ ဂုဏ်သိက္ခာ ညှိုးနွမ်းရတယ်လို့ ဓနုပြည် သူ့လွတ်မြောက်ရေးတပ်ဦး DPLF က သတိပေးထုတ် ပြန်ထားသည်။

ယနေ့ (ဒီဇင်ဘာလ ၂၀) ရက်တွင် ဆဌမကြိမ်မြောက် ကျရောက်သည့် “ဓနုအမျိုးသားနေ့” ကို ဓနုအမျိုးသား အဖွဲ့ချုပ်နှင့် စစ်ကောင်စီတို့ပူးပေါင်းပြီး ပင်းတယမြို့တွင် စည်ကားသိုက်မြိုက်စွာ ပြုလုပ်နေ ကြောင်း သိရသည်။

“တိုင်းပြည်အရပ်ရပ်မှာ ဖက်ဒရယ်အရေး ကြိုးပမ်းနေကြတဲ့အချိန်မှာ စစ်ကောင်စီ အလိုကျ အမျိုးသားနေ့ကို ခမ်းခမ်းနားနားကျင်းပနေတာက ကိုယ်ချင်းစာတရား ခေါင်းပါးရာရောက်တော့ ဓနုတိုင်းရင်းသား တစ်ယောက် အနေနဲ့ အရမ်းရှက်မိတယ်ဗျ”ဓနုပြည်သူ့လွတ်မြောက်ရေး တပ်ဦး တာဝန်ရှိသူတစ်ဦးက ပြောသည်။

လက်ရှိအချိန်နိုင်ငံတစ်ဝှမ်းလုံးတွင် ဓနုတိုင်းရင်းသားအပါအဝင် တိုင်းရင်းသားလူမျိုးအသီးသီးက သောကအမျိုးမျိုးကြုံတွေ့နေရသည်ကို စာနာသည့်အနေဖြင့် ဓနုတိုင်းရင်းသားများ အမျိုးသားနေ့တွင် ပျော်ပွဲရွှင်ပွဲများ အားတက်သရော ပြုလုပ်ရန် လုံးဝမသင့်လျော်သည့်အချိန်ဖြစ်နေကြောင်း DPLF က ထုတ်ပြန်ထားသည်။

“ဓနုလူမျိုးတွေရဲ့ပြီးပြီးရော့ ဆိုတဲ့ လက်ခံမှုတွေဟာကောင်းတဲ့စရိုက်လက္ခဏာတော့မဟုတ်ဘူး၊ဓနုလူမျိုးတွေဟာရိုးသားဖြူစင်ကြတယ်ဆိုတဲ့ဂျင်းထည့်ခံဘဝနှင့်တင်းတိမ်ရောင့်ရဲနေကြရတယ်။ယဉ်ကျေးမှု(စာ/ယဉ်)ဆိုတာလည်းအဖွဲ့အမျိုးမျိုးကွဲပြီး‌အသွင်အမျိုးမျိုးဖော်ဆောင်နေကြတာ၊အခြားရေးစရာတွေလည်းအများကြီးပေါ့၊ဒီလိုအပေါ်ယံရွှေမှုန်ကြဲအနှစ်မရှိတဲ့ ဓနုအမျိုးသားနေ့ကိုတော့ ကျမအနေနဲ့ ရွှံရှာမိပါတယ်” ဟု ဓနုအမျိုးသားအဖွဲ့ချုပ် အဖွဲ့၀င်တစ်ဦး ကပြောသည်။

ထို့ကြောင့် ဓနုအမျိုးသားနေ့ကို ဝမ်းမြောက်ဝမ်းသာကြိုဆိုသော်လည်း စစ်ကောင်စီနဲ့ ပူးပေါင်းပြီး အမျိုးသားနေ့ အခမ်းအနားကို ပျော်ပွဲရွှင်ပွဲများ ကျင်းပနေသည့် ဓနုအမျိုးသားအဖွဲ့ချုပ်နဲ့တကွ ပူးပေါင်းပါဝင်သူအားလုံးကို DPLF အနေဖြင့် ဆန့်ကျင်ရှုတ်ချကြောင်း အသိပေးထုတ်ပြန်ထားသည်။

သျှမ်းပြည်မြောက်ပိုင်းတွင် ညီနောင်မဟာမိတ် ၃ ဖွဲ့တို့ ဆင်နွှဲသော “၁၀၂၇ စစ်ဆင်ရေး” တွင် ဓနုပြည်သူ့ လွတ်မြောက်ရေးတပ်ဦး (DPLF)တို့လည်းမြို့ သိမ်းတိုက်ပွဲများ တွင် ပါဝင်တိုက်ခိုက်နေကြောင်းသိရသည်။

“၁၀၂၇စစ်ဆင်ရေး”ကို MNDAA၊ TNLA၊ AAစသည့် ညီနောင်မဟာမိတ် (၃)ဖွဲ့ ဦးဆောင်ဆင်နွှဲ နေပြီး မန္တလေးPDF၊ KNDF၊ BPLA၊ DPLFနှင့် အခြားတော်လှန်ရေးအင်အားစုများက ပါဝင် တိုက်ခိုက်နေ ကြကြောင်းသိရသည်။