သျှမ်းပြည် နမ့်ဆန်မြို့ကို တအာင်းအမျိုးသား လွတ်မြောက်ရေးတပ်မတော် (TNLA) က ထိန်းချုပ်လိုက်ပြီး စစ်ကောင်စီ တပ်စခန်းအားလုံးကို တိုက်ခိုက်သိမ်းပိုက်နိုင်ခဲ့ကြောင်း သတင်းသိရသည်။
နမ့်ဆန်မြို့နယ်ရှိ စစ်ကောင်စီတပ်စခန်းအားလုံးကို ဒီဇင်ဘာလ ၁၅ ရက် ညနေ ၃ နာရီခွဲအချိန်ခန့်တွင် တအာင်း(ပလောင်)တပ် TNLA က အလုံးစုံသိမ်းပိုက်နိုင်ခဲ့ပြီး စစ်ကောင်စီပိုင် လက်ဖက်ခြောက်စက်ရုံ၊ ရဲစခန်း အပါအဝင် ဌာနဆိုင်ရာ ရုံးများကို သိမ်းပိုက်ရရှိခဲ့ကြောင်း TNLA တပ်ဖွဲ့၏ သတင်းနှင့်ပြန်ကြားရေးဌာနက ဒီဇင်ဘာလ ၁၇ ရက်တွင် သတင်းထုတ်ပြန်သည်။
“နမ့်ဆန်မြို့ကို လုံးဝ ထိန်းချုပ်နိုင်ပြီလို့ ပြောလို့ရပါပြီ။ စစ်ကောင်စီတပ်စခန်းရယ်၊ လက်ဖက်ခြောက်စက်ရုံရယ်၊ ရဲစခန်း၊ အစိုးရဌာနပေါင်း ၆ ခုရှိမယ်။ လက်နက်ကြီးတွေက ဟောင်ဝစ်ဇာ လက်နက်ကြီး ၄ လက်၊ ပြီးရင် အခြားလက်နက်မျိုးစုံ အမြောက်အများ သိမ်းပိုက်ရရှိထားပါတယ်”ဟု TNLA တပ်ဖွဲ့၏ သတင်းပြန်ကြားရေး တာဝန်ခံတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဒီဇင်ဘာလ ၁၀ ရက်မှ စတင်ခဲ့သည့် နမ့်ဆန်မြို့သိမ်းတိုက်ပွဲ တစ်ပတ်ကြာကာလအတွင်း စစ်သုံ့ပန်း ၃၀ ဦး၊ မိသားစုဝင် ၃ ဦးနှင့် ရဲ ၆ ဦး၊ ရဲမိသားစုဝင် ၂၅ ဦး၊ စုစုပေါင်း ၆၄ ဦးတို့ကို ဖမ်းဆီးရမိခဲ့ပြီး စစ်ကောင်စီတပ်၏ ဟောင်ဝစ်ဇာ အမြောက် (၄)လက်၊ လက်နက်ခဲယမ်းမျိုးစုံ အမြောက်အများနှင့် စစ်အသုံးအဆောင်ပစ္စည်းများကို သိမ်းဆည်းရရှိကြောင်း သတင်းထုတ်ပြန်ချက်တွင် ရေးသားထားသည်။
စစ်ကောင်စီတပ်၏ နမ့်ဆန်တပ်စခန်းကုန်းကို တိုက်ခိုက်နေစဉ်အတွင်း မန်တုံမြို့ရှိ ခလရ-၁၃၀ မှ လက်နက်ကြီးဖြင့် နမ့်ဆန်မြို့သို့ ပစ်ခတ်လာပြီး လေကြောင်းပစ်ကူတို့ဖြင့် ပြန်လည်တိုက်ခိုက်ခဲ့ခြင်းကြောင့် အရပ်သား ၃ ဦးထက်မနည်း သေဆုံးခဲ့ပြီး လူနေအိမ် ၄၀ လုံးကျော် ထိခိုက်ပျက်စီးခဲ့ကြောင်း သိရသည်။
“သေဆုံးသွားတာက အမျိုးသား ၃ ယောက်အထက်ပေါ့။ နေအိမ်ကလည်း ၁၅ လုံးအထက် ပျက်စီးသွားတယ်။ အခြားအဆောက်အဦးတွေလည်း ပျက်စီးသွားတာ ရှိပါတယ်”ဟု TNLA တပ်ဖွဲ့မှ ၎င်းသတင်းပြန်ကြားရေး တာဝန်ခံက သျှမ်းသံတော်ဆင့်ကို ဆက်ပြောသည်။
ထို့အပြင် ဒီဇင်ဘာလ ၁၅ ရက်ကလည်း နမ့်ဆန်မြို့နှင့် ငွန်ဆိုင်းကျေးရွာတို့အား စစ်ကောင်စီတပ်မှ လေကြောင်းဖြင့် အပြင်းအထန် ဗုံးကြဲတိုက်ခိုက်ခဲ့ခြင်းကြောင့် စာသင်ကျောင်းနှင့် လူနေအိမ် အများအပြား မီးလောင်ပျက်စီးခဲ့ပြီး အသက် (၇၀)ကျော် အဘိုးအိုတစ်ဦး မီးလောင်သေဆုံးခဲ့သည်။
“၁၀၂၇ စစ်ဆင်ရေး” တစ်လခွဲကျော်ကာလအတွင်း နမ့်ဆန်မြို့နယ်တွင် စစ်ကောင်စီ၏ လက်နက်ကြီးနှင့် လေကြောင်းဗုံးကြဲမှုကြောင့် ကလေး ၃ ဦး အပါအဝင် စုစုပေါင်း ၈ ဦး သေဆုံးပြီး ၂၀ ဦးထက်မနည်း ထိခိုက်ဒဏ်ရာရရှိခဲ့ကြောင်း နမ့်ဆန်မြို့ ဒေသခံများထံမှ သိရသည်။
