သျှမ်းပြည်မြောက်ပိုင်း နမ့်ခမ်းမြို့နယ်အတွင်း စစ်ကောင်စီ မှ လေကြောင်းဖြင့် ဗုံးကြဲတိုက်ခိုက်မှု ၁ လ နီးပါး ရှိလာပြီဖြစ်သည့်အတွက် စစ်ရှောင် ၈၀၀၀ ကျော် စားနပ်ရိက္ခာ အခက်အခဲ ဖြစ်နေကြောင်း စုံစမ်းသိရှိရသည်။
နမ့်ခမ်းမြို့နယ်တွင်းရှိ စစ်ရှောင်များသည် ကျောင်းခမ်းဘုန်းကြီးကျောင်း (၅၀၀) ကျော်၊ ကွန်ဟိုင်းဘုန်းကြီးကျောင်း မြောက်ဘက် (၈၈၀) ၊ တောင်ဘက် (၉၂၂)၊ ဒီဇင်ဘာ (၁၃) ရက်က စစ်ကောင်စီသည် လေကြောင်း နှင့် ဗုံးကြဲတိုက်ခိုက်ခဲ့သည့် ဇေယျသုခဘုန်းကြီးကျောင်းမှာ စစ်ရှောင် (၃၀၀) ကျော် ၊ မန့်နား (၁၁၄) ၊ ဟတ်ဟင်ကျေးရွာ (၂၅၀) ကျော်၊ ဟိုဆိုင်းကျေးရွာ (၂၇၀) ကျော်၊ နောင်ခင်ကျေးရွာ ၼွင်ၶိင် (၇၀) ကျော်၊ ခေးခွန်ကျေးရွာ (ဝၢၼ်ႈၶေးၶုၼ်ႇ) (၇၀) နှင့် မန့်ကွန်ကျေးရွာ မၢၼ်ႈၵုၼ် (၂၃၆) ဦး စုစုပေါင်း (၃၆၄၆) ဦး ရှိထားကြောင်း စုံစမ်းသိရှိရသည်။
အလားတူ မူဆယ်မြို့နယ်အတွင်း တင်းဟိန်း ၊ နောင်လောင်း၊ မန့်ဟျှိုး၊ မန့်ဟောင်တုံ ၊ မူဆယ် ကန်ဝိန်းကျောင်း (မြို့လယ်ဘုရားကျောင်း) စသည့် နေရာမှာ စစ်ရှောင်များ ၁၀၀၀ ကျော်ရှိကြပြီး ကောင်းနောင်ရပ်ကွက်ရှိ ဇရပ်မှာ သံဃာ (၁၁၅) ပါး ၊ ကမ္မဌာန်းကျောင်း နှင့် နမ့်ခုမ်ဘုန်းကြီးကျောင်းတွင် သံဃာ (၈၀) ပါး၊ ပေါက်နေမှာရှိသည့် ဗလီတွင် စစ်ရှောင် (၇၀) ကျော်၊ ခရစ်ယာန်ဇရပ် (၃၀) ကျော်၊ ဂေါ်ရခါးတိုင်းရင်းသား (၁၆၀) ကျော်၊ ပန်ဆိုင်း (၉၀) ကျော် စုစုပေါင်း (၁၆၉၃) ဦးရှိပြီး၊ လွိုင်ဟိုဆေ ဒေသရှိ မန့်ဆွမ်းကျေးရွာ (၁၀၆၉) ၊ မန့်အိုင်တိုင်း (မၢၼ်ႈဢၢႆႇတႂ်ႈ) (၄၀၂)၊ နောင်မွန်း (၃၃၆) ၊ နမ့်ဟီး (၁၃၃) ၊ နားလုံ (၅၂) ၊ နောင်ဆွမ်း (၂၀၀) ၊ မန့်စန့် (၁၁၀) ၊ ကုန်ကျိုင်း (၅၀) ၊ မန့်ဟွေ့ (၁၅)၊ မန့်မွမ်း (၆၂)၊ နောင်နုတ် (၆) ၊ မန့်ဝိန်းလုံ (၂၄၆)၊ ဆွန်ခါး (၇၇) နှင့် ဖာစန့် (၇၀) ဦး စုစုပေါင်း စစ်ရှောင် (၂၈၂၈) ရှိထားပြီး မူဆယ်မြို့နယ် နှင့် နမ့်ခမ်းမြို့နယ်ရှိ စစ်ဘေးရှောင် စုစုပေါင်း (၈၁၆၇) ဦးရှိထားကြောင်း စစ်ရှောင်များကို ကူညီပေးနေသည့် အဖွဲ့ထံမှ စုံစမ်းသိရှိရသည်။
“စစ်ရှောင်စခန်းနေရာတိုင်း လိုလို အခက်အခဲတွေ ရင်ဆိုင်နေရပြီ၊ ထင်းရှားပါး လာတယ်။ စားနပ်ရိက္ခာ၊ ဆေးဝါး အားလုံး ရှားပါးလာတယ်။ တစ်ချို့ ပစ္စည်းတွေ ပိုက်ဆံရှိတိုင်းလဲ တစ်ဖြေဖြေး နဲ့ ဝယ်လို့မရတာတွေ ဖြစ်လာတယ်။ တိုက်ပွဲ ဆက်လက်ပြင်းထန်မယ်ဆိုရင် စစ်ရှောင်သာမက စစ်ရှောင်လက်ခံထားတဲ့ ဒေသတွေမှာလည်း ရိက္ခာရှားပါးမှု ပြဿနာတွေ ကြုံလာနိုင်တယ်။ UN – UNICEF တွေဆီမှာ အကူအညီရရင် ပိုကောင်းတယ်” ဟု သျှမ်းမြောက် ဒေသခံတစ်ဦး ကပြောသည်။
လက်ရှိ စစ်ရှောင်စခန်းတွေမှာ စားနပ်ရိက္ခာ အခက်အခဲဖြစ်သည့်အပြင် တိုက်ပွဲကြောင့် လိုအပ်သည့် စားနပ်ရိက္ခာများ ပို့ဆောင်ရန် ခက်ခဲလာကြောင်း စုံစမ်းသိရှိရသည်။
စစ်ကောင်စီသည် မူဆယ်မြို့ပေါ်သို့ လေယာဥ် ပျံဝဲမှု ပြီးခဲ့သည့် ရက်ပိုင်းအတွင်း ဆက်တိုက် ပြုလုပ်လာသည့်အတွက် ဒေသခံများ လေကြောင်းဗုံးကြဲလာမည်ကို စိုးရိမ်နေလျက်ရှိသည်။
ပြီးခဲ့သည့် ဒီဇင်ဘာ ၁၃ ရက် ၁၄ ရက်တွင်လည်း တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) မှ မူဆယ် – နမ့်ခမ်း ကားလမ်း ဖြတ်သန်းသွား လာခွင့် ပိတ်ထားကြောင်း သိရှိရသည်။
နမ့်ခမ်းမြို့တွင်း ၂ ပတ်ဆက်တိုက် စစ်ကောင်စီမှ လေကြောင်း နှင့် ဗုံးကြဲတိုက်ခိုက်သည့်အတွက်ကြောင့် ပြည်သူ ၈ ဦး သေဆုံးခဲ့ရပြီး ဘုန်းကြီးကျောင်း အပါအဝင် နေအိမ် ၄၀ ခန့် ပျက်စီးသွားခဲ့ကြောင်း သိရှိရသည်။
Leave a Comments