မြန်မာနိုင်ငံတွင် ထောပတ်သီး အများဆုံး စိုက်ပျိုးရာဒေသ တစ်ခုဖြစ်သော သျှမ်းပြည်တောင်ပိုင်းတွင် ယခုနှစ် ရာသီဥတု ဖောက်ပြန်မှု နှင့် လမ်းခရီး အခြေအနေတို့ကြောင့် ထောပတ်သီးများ ရောင်းချနိုင်ခြင်းမရှိပဲ အရှုံးများနေကြောင်း ထောပတ်သီးစိုက် တောင်သူတစ်ဦးထံမှ သိရှိရသည်။

ယခုနှစ်တွင် မိုးများခြင်း နှင့် လေပြင်းတိုက်ခတ်မှုကြောင့် ထောပတ်သီး အထွက်နှုန်းမှာ ယခင်နှစ်ထက် ထက်ဝက်နီးပါး လျော့ကျသည့်အပြင် တောင်သူအများစုမှာ ဈေးကွက်အတွင်း ထောပတ်သီး တင်ပို့နိုင်ခြင်း မရှိပဲ ဝယ်သူများလည်း နည်းပါးကြောင်း သိရှိရသည်။

“ထောပတ်သီးက မိုးရွာတုန်းက မိုးသီးတွေ ထိထားတော့ အသီးက မလှဘူး။ ထောပတ်သီး ပွဲစားတွေ လာကြည့်ရင် ဓာတ်ဆီခ၊ ကားခတွေ မကိုက်ဘူး ဆိုပြီး မဝယ်ကြတော့ဘူး။ ထောပတ်ပင် အတွက် ကြက်ချေးတွေထည့်၊ ဆေးဖြန်းရတာတွေလည်း မကာမိဘူး။ အခု ဒီဇင်ဘာလဆို အဆိုးဆုံးပဲ လုံးဝ မရောင်းရဘူး၊ ထောပတ်သီးက ကုန်စိမ်းဖြစ်ပြီး အခုလို မရောင်းမရတော့ အခက်အခဲဖြစ်တယ်။ နေ့စားခတောင် မကျေသေးဘူး” ဟု အဆိုပါ ထောပတ်သီး တောင်သူမှ ပြောပြသည်။

ယခု လက်ရှိတွင် ဓာတ်ဆီများ ပြတ်လပ်သည့်အတွက် ကုန်စည် စီးဆင်းမှုမှာလည်း အဆင်မပြေပဲ တခြားနယ်များသို့ ထောပတ်သီး တင်ပို့ ရောင်းချနိုင်ခြင်း မရှိသဖြင့် ထောပတ်သီး ဈေးကွက်မှာလည်း နည်းပါးကြောင်း သိရှိရသည်။

“အရင်နှစ်က ထောပတ်သီးကို ရွာထဲမှာပဲ ဒိုင်တွေ လိုက်ဝယ်တယ်။ အလုံးကြီးပြီးလှတဲ့ ရှယ်သီးကို အမြင့်ဆုံး (၁၈၀၀) ပေးတယ်၊ အနိမ့်ဆုံးကို (၇၀၀) ပေးတယ်။ ဒီနှစ်က အနိမ့်ဆုံးကို (၂၀၀) ပဲပေးတယ်၊ အမြင့်ဆုံးကို (၁၂၀၀) ပဲ ပေးကြတယ်ပေါ့။ အရင်တုန်းက ရှယ်သီးဆို တော်ရုံတန်ရုံလောက် လှရင် ရပြီ၊ အခုဆို လုံးဝလှနေမှ ရှယ်သီးအနေနဲ့ ယူတယ်။ ရှယ်သီးကလည်း နည်းပြီး တစ်ရာ ရာခိုင်နှုန်းမှ သုံးဆယ်ရာခိုင်နှုန်းပဲ ရှိပါတယ်။ အခုတော့ စောင့်ကြည့်နေပြီး အခြေအနေ ငြိမ်လို့ ရောင်းလို့ရတာနဲ့ အရင်းရမယ်ဆိုရင် အကုန်ထုတ်ရောင်းလိုက်တော့မယ် ” ဟု ၎င်းမှ ထပ်လောင်း ပြောပြသည်။

ယခင်နှစ်များတွင် ထောပတ်သီးများကို ပြည်တွင်း၌ သာမက ထိုင်း၊ တရုတ် စသည့် ပြည်ပနိုင်ငံများသို့ တင်သွင်းနိုင်ခဲ့သော်လည်း ယခုနှစ်တွင် လမ်းအခြေအနေ နှင့် ဓာတ်ဆီဈေးများကြောင့် ပွဲစားများ ဝင်လာခြင်း မရှိတော့ဟု ထပ်မံ သိရှိရသည်။

လက်ရှိကာလအတွင်း သျှမ်းတောင် ဒေသများတွင် ထောပတ်သီး စိုက်ပျိုးသူများ သာမက အာလူး၊ ငရုတ်၊ ခရမ်းချဉ်သီး နှင့် ပန်းဂေါ်ဖီစိုက် တောင်သူများမှာလည်း လမ်းခရီး နှင့် ရာသီဥတု အခြေအနေများကြောင့် တွက်ခြေမကိုက်ပဲ တခြားဒေသများသို ရောင်းချနိုင်ရန် ခက်ခဲနေကြောင်း သိရှိရသည်။ ထို့အပြင် တခြားမှ ပြန်ဝယ်ယူရသော ဆန်၊ ဆီ၊ ဆားများမှာလည်း ဈေးနှုန်းများ ပိုမိုတက်နေကြောင်း ထပ်မံသိရသည်။