မြန်မာ – တရုတ် နယ်စပ် သျှမ်းပြည် မူဆယ်မြို့နယ် (၁၀၅) မိုင် ကုန်သွယ်ရေးဇုန်ရှိ စစ်ကောင်စီ တပ်စခန်းကို ညီနောင် မဟာမိတ် (၃) ဖွဲ့တို့က ပူးပေါင်းတိုက်ခိုက်ခဲ့ကြောင်း စုံစမ်းသိရှိရသည်။
ယမန်နေ့ ဒီဇင်ဘာ (၁၄) ရက် မနက် ၇ နာရီခွဲဝန်းကျင်က ညီနောင်မဟာမိတ် ၃ ဖွဲ့များဖြစ်ကြသည့် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) ၊ ရက္ခိုင့်တပ်တော် (AA) နှင့် ကိုးကန့်တပ်မတော် (MNDAA) တို့ ပူးပေါင်း တိုက်ခိုက်ခဲ့သည်။
“မနေ့က (ဒီဇင်ဘာ ၁၄) ရက်မှာ စစ်ကောင်စီက လေကြောင်းသုံးပြီး ပစ်ခတ်တာတွေ လုပ်တယ်။ သူတို့ ဒီတခါပျံသန်းတာ အရမ်းနိမ့်တယ်။ ကြောက်စရာကောင်းတယ်။ ကျမတို့က စိုးရိမ်မှုနဲ့ နေနေရတာလေ။ ဘယ်နေ့ကိုယ့်အိမ်ထိမှာလဲ။ ကိုယ့်ကိုထိမှာလဲမသိဘူးလေ” ဟု မူဆယ်ဒေသခံ အမျိုးသမီး တစ်ဦးကပြောသည်။
“၁၀၂၇ စစ်ဆင်ရေး” ကာလအတွင်း မူဆယ် (၁၀၅) မိုင်မှာ စစ်ကောင်စီ နှင့် ညီနောင်မဟာမိတ် (၃) ဖွဲ့တို့ တိုက်ပွဲဖြစ်ပွားကာ ဒေသခံ ပြည်သူ (၁၀) ဦးထက်မနည်း ထိခိုက်ဒဏ်ရာ ရရှိခဲ့ပြီး သေဆုံးသူ (၅) ဦး ထက်မနည်း ရှိခဲ့ကြောင်း စုံစမ်းသိရှိရသည်။
မြန်မာ – တရုတ် သျှမ်းမြောက်၏ အကြီးဆုံး ကုန်သွယ်ရေးဇုန်ဖြစ်သည့် ကျင်စန်းကျော့ ကုန်သွယ်ရေးဇုန်ကို နိုဝင်ဘာ (၂၅) ရက်နေ့က MNDAA က သိမ်းပိုက်ထားနိုင်ပြီ ဖြစ်ပါသည်။
လက်ရှိတွင် သျှမ်းပြည် မြောက်ပိုင်းရှိ မြို့နယ် ၁၂ ခုထက်မနည်း စစ်ဘေးရှောင် ဦးရေ ၅ သောင်းကျော် ထွက်ပြေးတိမ်းရှောင်နေကြရပြီး တစ်မြို့နှင့် တစ်မြို့ ကူးသန်းသွားလာ၍မရဘဲ လမ်းပန်းဆက်သွယ်ရေး ပြတ်တောက်မှုကြောင့် စားနပ်ရိက္ခာ၊ အဝတ်အထည် နှင့် ဆေးဝါး စသည့် လူသားချင်း စာနာထောက်ထားမှုဆိုင်ရာ အကူအညီများ အလျင်အမြန် အရေးပေါ်လိုအပ်နေသည်။
