သျှမ်းပြည် ကွတ်ခိုင်မြို့နယ် နမ့်ဖတ်ကာကျေးရွာအတွင်း နှစ်ရက်ဆက်တိုက် လက်နက်ကြီး ကျရောက် ပေါက်ကွဲမှုကြောင့် ကလေးငယ်အပါအဝင် ၂ ဦးသေဆုံးပြီး ၅ ဦး ထိခိုက်ဒဏ်ရာရရှိခဲ့ကြောင်း လူမှုကူညီရေးအသင်းထံမှ သိရသည်။

(ဒီဇင်ဘာလ ၆ ရက်) ညနေပိုင်းအချိန်မှစပြီး နမ့်ဖတ်ကာ ရပ်ကွက် ၃၊ ရပ်ကွက် ၄ နှင့် ရပ်ကွက် ၆ အတွင်း လက်နက်ကြီးကျရောက် ပေါက်ကွဲမှုကြောင့် အသက် ၁၀ နှစ် ကလေးငယ်တစ်ဦး သေဆုံးပြီး အသက် (၈၀) နှစ်ဝန်းကျင် အမျိုးသမီးတစ်ဦးအပါအဝင် အသက် (၃၀) ကျော် အမျိုးသား နှင့် အမျိုးသမီး (၂) ဦးတို့ ပြင်းထန်စွာဒဏ်ရာရရှိခဲ့သည်။

အလားတူ ယမန်နေ့ (ဒီဇင်ဘာလ ၇ ရက်) တွင်လည်း နမ့်ဖတ်ကာ ဇီးတဘန်ကျေးရွာအတွင်း လက်နက်ကြီး ထပ်မံကျရောက်ပေါက်ကွဲမှုကြောင့် အသက် ၃၅ နှစ် အမျိုးသားတစ်ဦး သေဆုံးကာ အသက် ၁၆ နှစ် ကလေးတစ်ဦး ဒဏ်ရာ ရရှိခဲ့ကြောင်း ဒေသအတွင်း လူမှုကူညီရေးအသင်းမှ ပြောသည်။

“ အခုလက်နက်ကြီးတွေ ကျတာကလည်း ကြာလာရင် ကျနော်တို့ပါ အိမ်ထဲမှာဝင်ပုန်းနေ ရတော့မယ်။ ဘယ်ကလာတဲ့ လက်နက်ကြီးတွေမှန်း မသိတော့ဘူး။ နှစ်ဖက်ကတော့ ပစ်နေကြတာပဲ။ အခြေအနေကြည့်ပြီးမှ သွားကောက်နေရတာ “ ဟု ဒေသအတွင်း လူမှုကူညီရေးအသင်းမှ တာဝန်ခံတစ်ဦးက သျှမ်းသံတော်ဆင့်ကို ပြောသည်။

ထိုကဲ့သို့ လက်နက်ကြီး ပစ်ခတ်မှုများ မကြာခဏ ဖြစ်ပေါ်နေသောကြောင့် ထိခိုက်ဒဏ်ရာ ရသူများကို အရေးပေါ် သွားရောက် ကယ်ဆယ်ရန် နှင့် ဆေးကုသခံယူရန် အတွက် စိန်ခေါ်မှု ရှိနေကြောင်း ၎င်းကဆိုသည်။

လက်ရှိ အခြေအနေတွင် နှစ်ဖက်တပ်ဖွဲ့က အပြန်အလှန် ရမ်းသမ်းပစ်ခတ်မှုများကြောင့် မည့်သည့် အဖွဲ့အစည်းမှ လက်နက်ကြီးဖြစ်ကြောင်း ရှင်းရှင်းလင်းလင်းမသိရှိရဘဲ လူထုနေထိုင်ရာ ကျေးရွာ၊ အိမ်ပေါ်သို့ ကျရောက် ပေါက်ကွဲနေသည်ဟု ဒေသခံများက ပြောကြသည်။

ထို့အပြင် ထိခိုက်ဒဏ်ရာရသူများကို “ ၁၀၂၇ စစ်ဆင်ရေး “ တိုက်ပွဲ ဖော်ဆောင်လာသည့် နောက်ပိုင်း အရေးပေါ် သွားရောက်ကူညီရန်၊ ဆေးရုံသို့ ပို့ဆောင်ရန်နှင့် ဖြတ်သန်းသွားလာရန် စသည့်ဖြင့် အခက်ခဲရှိနေကြောင်း လူမှုကူညီရေး အသင်းမှ တာဝန်ခံတစ်ဦးက ထပ်လောင်းပြောသည်။

“ ဒီမှာကျေးရွာဆိုတော့ တိုက်နယ်ဆေးရုံလည်းမရှိ။ လောလောဆယ် ဆရာမတွေကလည်း ဆေးရုံကထိန်းထားသလိုမျိုး ပုံစံမျိုးဖြစ်နေတော့ လူနာကို ကွတ်ခိုင်၊ မူဆယ် ပို့ပေးရတယ်။ အခုက မူဆယ် ၁၀၅ မိုင်မှာ တိုက်ပွဲဖြစ်တော့ လမ်းတွေ ပိတ်ထားတယ်။ ကွတ်ခိုင်လည်း အခုက လမ်းပြန်ပိတ် သွားပြီ ပို့ဖို့တောင်ခက်နေတယ် “ ဟု ၎င်းတာဝန်ခံတစ်ဦးက ပြောသည်။

သျှမ်းသံတော်ဆင့်မှ သီးခြားအတည်ပြုထားသည့် စာရင်းအရ “ ၁၀၂၇ စစ်ဆင်ရေး “ တစ်လအတွင်း လက်နက်ကြီး ထိမှန်မှုကြောင့် အရပ်သား ၁၀၀ ကျော် သေဆုံးခဲ့သည်