သျှမ်းပြည် တောင်ကြီးမြို့ လျှပ်စစ်မီးမရရှိသဖြင့် နေအိမ်များ၊စားသောက်ဆိုင်များမှ မီးဖိုချောင်သုံးဂတ်စ်များကို အစားထိုးအသုံးပြုလာပြီးနောက် ဂက်စ်အိုးများ ဝယ်ယူရန် ခက်ခဲလာကြောင်း ဒေသခံများ ပြောပြချက်အရသိရသည်။
သျှမ်းပြည် တောင်ပိုင်း တောင်ကြီးမြိုတွင် တန်ဆောင်ပွဲကျင်းပနေသည့် အချိန်ကာလမှ စတင်ကာ အသိပေး ကြေငြာခြင်းမရှိဘဲ ရပ်ကွက်အလိုက် လျှပ်စစ်မီးများကို အလှည့်ကျပေးနေသဖြင့် တစ်နေ့လျှင် ငါးနာရီခြား နှစ်ကြိမ်ခန့်သာ မီးရရှိပြီး နံနက်ပိုင်းနှင့် ညပိုင်းများတွင် အများဆုံး မီးဖြတ်ခံရသဖြင့် ဒေသခံများ လုပ်ငန်း လုပ်ကိုင်ရန်နှင့် ချက်ပြုတ်စားသောက်ရန် အခက်တွေ့နေကြောင်း သိရှိရသည်။
ထိုကဲ့သို လျှပ်စစ်မီးများ ဖြတ်တောက်ခံရချိန် အတွင်း လျှပ်စစ်မီး မဖြစ်မနေ လိုအပ်သော လုပ်ငန်းများ အထူးသဖြင့် စားသောက်ဆိုင်များနှင့် ချက်ပြုတ်စားသောက်ရန် အတွက် မီးဖိုချောင်သုံးဂက်စ်များကို အစားထိုးသုံးရန် လိုနေသော်လည်း တောင်ကြီးမြိုတွင် ဒီဇင်ဘာ အစောပိုင်းမှ စတင်ကာ ဂက်စ်များ စတင် ပြတ်လပ်နေပြီး ဈေးများလဲ အဆမတန် ထိုးတက်သွားကြောင်း ဒေသခံများထံမှ သိရှိရသည်။
“မီးဖြတ်ခံနေရတာ နေ့တိုင်းပဲ မနက်ဆို အစောပိုင်းကတည်းက ပျက်နေတာ။ မီးဖြတ်ခံရချိန်တွေကလည်း တစ်ရက်နဲ့တစ်ရက် မတူဘူး။ ဂက်စ်နဲ့ ချက်စားဖို့ကလည်း ဝယ်ရခက်ပြီး ဆိုင်တိုင်းမှာ အလွယ်တကူဝယ်မရတော့ဘူး။ ရတဲ့ဆိုင်တွေဆို ဈေးအရမ်းတင်ကြတယ်” ဟု ဒေသခံတစ်ဦးကပြောသည်။
ယခင်တွင် ဂက်စ်ဘူးသေး တစ်ဘူးကို ၈၀၀ကျပ်သာရှိပြီး ယခုမှာ ကျပ်ငွေ ၁၅၀၀၊၁၆၀၀ကျပ်ပေးဆောင်းရသကဲ့သို့ အချို့ဆိုင်များတွင် ကျပ် ၃၀၀၀ ထိမြင့်တက်နေကြောင်း ဒေသခံက ထပ်လောင်းပြောသည်။
တောင်ကြီးမြိုတွင်း ဂက်စ်ဆိုင် အများစုပိတ်ထားကြောင်း၊ လက်ရှိမှာ ဂက်စ်ဘူးသေးများကို ဆိုင်အချို့တွင် ခက်ခက်ခဲခဲ ရှာဝယ်နိုင်သော်လည်း ဂက်စ်အိုများ လဲလှယ်ဝယ်ယူရန် မရနိုင်တော့ကြောင်း လည်း တောင်ကြီးဒေသခံအမျိုးသမီးတစ်ဦးက သျှမ်းသံတော်ဆင့်ကိုပြောသည်။
” အခု ဟင်းချက်ဖို့မီးလည်းမလာ၊ ဝယ်စားဖို့ဆိုရင်လည်း ဂက်စ်အိုးက စျေးတက်တော့ ဟင်းတွေလည်း အော်တိုစျေးတက်တယ်လေ၊ အခု မီးသွေးနဲ့ချက်နေရတယ်။ မီးသွေးလည်း အရင်လို မရှိတော့ ဘယ်နေ့ မီးသွေးပြတ်မှာလဲမသိဘူး။ တနေ့ထက်တနေ့ ပိုကျပ်တည်းလာတယ်” ဟု ၎င်းအမျိုးသားက ဆိုပြန်သည်။
လက်ရှိအချိန်တွင် ဂက်စ်ဈေးနှုန်းမှာ တစ်ပိသာလျှင် (၇၅၀၀)ကျပ်မှ (၁၁၀၀၀)ထိ ပေါက်ဈေးမြောက်နေပြီ ဖြစ်ကြောင်းလည်း သိရှိရသည်။ ထိုကဲ့သို ဂက်စ်ဈေးနှုန်းများ အဆမတန်မြင့်မားနေသော်လည်း မီးပြတ်ချိန်ကြာမြင့်မှုကြောင့် ဂက်စ်ပြတ်လပ်မှာကို စိုးရိမ်နေရကြောင်း ဒေသခံများထံမှ သိရှိရသည်။
ဒေသခံများ အနေဖြင့် ဂက်စ်များ အလွယ်တကူ ဝယ်ယူမရရှိနိုင်တော့၍ မီးသွေး၊ထင်းများ သုံးရန်အတွက်လည်း မီးသွေးတစ်ပိသာလျှင် (၂၀၀၀)ကျပ်ဖြင့် ပေးဝယ်နေရကြောင်း ထပ်မံသိရှိရသည်။
