သျှမ်းပြည်မြောက်ပိုင်းမှာ မြောက်ပိုင်း စစ်ရေးမဟာမိတ် ညီနောင် ၃ ဖွဲ့က ၁၀၂၇ စစ်ဆင်ရေး ဖော်ဆောင်ပြီး မြို့သိမ်းတိုက်ပွဲတွေ ဆင်နွဲနေရာမှာ အာဏာသိမ်း စစ်ကောင်စီရဲ့ တပ်စခန်းကြီး၊ တပ်စခန်း ငယ်ပေါင်း ရာဂဏန်း သိမ်းပိုက်လိုက်တဲ့အပေါ် နိုင်ငံတဝှမ်းနေ လူထုတစ်ရပ်လုံးက ကျေနပ် ဝမ်းသာနေကြပါတယ်။ နောက်ကွယ်မှာ ကြိတ်မှိတ်ခံစားနေရတဲ့ သျှမ်းလူထုကတော့ ….
လက်ရှိမှာ မြောက်ပိုင်း ညီနောင်မဟာမိတ် ၃ ဖွဲ့ဟာ – ကုန်းကြမ်း၊ ကွန်းလုံ (ကွမ်းလုံ) ၊ မုံးကိုး၊ ဖောင်းဆိုင်ဒေသကို ထိမ်းချုပ်ထားနိုင်သလို ပန်ဆိုင်း(ကြူကုတ်)၊ နမ့်ခမ်းမြို့တို့ကိုလဲ စစ်ကောင်စီကို ပိတ်ဆို့ တိုက်ခိုက် နေတဲ့အနေထားမှာ စစ်ကောင်စီရဲ့ ခြေကုပ်စခန်းကြီးငယ် ၂၀၀ ကျော် သိမ်းပိုက်နိုင်တယ်။ ပြီးတော့ တပ်မမှူး တပ်ရင်းမှူး အဆင့် အပါအဝင် တိုက်ခိုက်ရေး အင်အား ၃၀၀ ခန့် ကလဲ လက်နက်ချ အညံ့ခံ လာတဲ့အပေါ် စစ်ဘေးစစ်ဒဏ်ကြောင့် ရင်နင့်ကြေကွဲနေတဲ့ မြောက်ပိုင်းလူထုကလဲ အပြုံးပန်းဝေ မိတာအမှန်ပါ။ မျက်ရည်ကြားက အပြုံးလို့ ဆိုရမှာပါပဲ။
ဒါ့ကြောင့် နေပြည်တော်မှာ အောင်မြေနင်းနိုင်တဲ့ ပန်းတိုင်ရောက်တဲ့အထိ ပါဝင်တိုက်ခိုက်ပေးဖို့ မြောက်ပိုင်း အဖွဲ့ကို လူထုတစ်ရပ်လုံးက စောင့်ကြို မျှော်လင့်နေကြပါတယ်။
လက်ရှိ ၁၀၂၇ စစ်ဆင်ရေးမှာတော့ စစ်ကောင်စီထောက်ပို့လမ်း ဖြတ်တောက်နိုင်ဖို့ မန္တလေး- လားရှိုး – မူဆယ်ပြည်ထောင်စုလမ်းပေါ်ရှိ သီပေါကျင်သီတံတား၊ သိန္နီ နမ္မတူမြစ်ကူးတံတားကြီး နှစ်စင်းနဲ့ သိန္နီ – ကွမ်းလုံ – ချင်းရွှေဟော် ပြည်ထောင်စုလမ်းပိုင်းရှိ ကွမ်းလုံမြို့နယ် တံတားကြီးငယ်တွေကို မြောက်ပိုင်း စစ်ရေးမဟာမိတ် ၃ ဖွဲ့ က မိုင်းခွဲ ဖျက်ဆီးလိုက်ပါတယ်။
ဒါ့ကြောင့် စစ်ကောင်စီရဲ့ ကြည်းကြောင်းထောက်ပို့လမ်းပိုင်းကို ဖြတ်တောက်ထားနိုင်တယ်ဆိုပေမယ့် လူထု အခက်အခဲ ကြုံစေပါတယ်။
စစ်အာဏာရှင် ခြေမှုန်းရေးကြောင့် လူထုက အဲ့ဒီ့ အခက်အခဲကို ဂရုမမူပါဘူး။ ဒါပေမယ့် လူထု အသည်းနှလုံးကို ထိခိုက်စေတာက ကချင်လွတ်လပ်ရေးတပ်မတော် KIA အပါအဝင် မြောက်ပိုင်း မဟာမိတ်တပ်တွေ ၃ ဖွဲ့က စစ်ဘေးရှောင်လူထုထံ ဆက်ကြေး ပြန်ကောက်နေမှုပါပဲ။
သိန္နီမြို့တွင်းကို မြောက်ပိုင်းမဟာမိတ် ဝင်ရောက်စီးနင်းထားချိန် စစ်ကောင်စီတပ်က ဗုံးကြဲလို့ သေဆုံးသွားတဲ့ ဒေသခံ ရုပ်အလောင်းတချို့ ပုတ်ပွတဲ့အထိ မသင်္ဂြိုလ်နိုင်၊ မသယ်ထုတ်နိုင်ကြပါဘူး။ ဒါကို လူထုလဲ မငြီးညူပါဘူး။
အခွင့်အရေးရလို့ မြို့ကနေထွက်ခွာပြီး စစ်ဘေးရှောင်ဖို့ ထွက်လာချိန် KIA – TNLA – MNDAA တပ်သားတွေက ကားကြီး ကားငယ် အမျိုးအစားလိုက် အနည်းဆုံး တစ်စီးကို ကျပ်ငွေ ၂ သိန်းခွဲ ကောက်ခံခဲ့ပါတယ်။
“စစ်ကောင်စီကို တိုက်ခိုက်တာတော့ ကျမတို့ အရမ်းဝမ်းသာဂုဏ်ယူတယ်။ ချောင်လည်တဲ့အချိန် မတောင်းလဲ ကျမတို့ ထောက်ပံ့ပါတယ်။ အခုက တစ်ပူပေါ် နှစ်ပူဆင့် ငွေညှစ်ယူတဲ့ သဘောဖြစ် နေတယ်။ ဒါ့အပြင် စစ်ကောင်စီ ဗုံးကြဲအောင် လူထုရပ်ရွာအနီးမှာ တမင်တကာလာနေသလိုဖြစ် နေတယ်” လို့ သိန္နီမြို့က သားသည်မိခင်တစ်ဉီးက ငိုယိုပြီး ပြောပါတယ်။
ပိုဆိုးတာက ကိုးကန့်တပ်က လူသစ်အင်အား စုဆောင်းတဲ့ ကိစ္စပါပဲ။ အသက်မပြည့်သေးတဲ့ ကိုရင် အပါအဝင် ဘုန်းတော်ကြီးတွေကိုပါ လူဝတ်လဲခိုင်းပြီး စစ်မှုထမ်းစေတဲ့ ကိစ္စပါ။ ဗုဒ္ဓဘာသာ မြန်မာ လူမျိုး သျှမ်းလူမျိုးတွေ အတွက် ရင်ကျိုးမတတ် ခံစားရတဲ့ ကိုးကန့်တပ်ရဲ့ ပြစ်မှုကျူးလွန်တဲ့ လုပ်ရပ်ပါဘဲ။ “ကွန်မြူနစ်တွေက အရမ်းရိုင်းတယ် ဘုရား တရားလဲမရှိဘူးဆိုတဲ့” – 1950 ပြည့်လွန် နှစ်တွေတုန်းက ဗကပ ကိုမြင်သလို အမြင်မျိုး ကိုးကန့်တပ်နဲ့ မြောက်ပိုင်းတပ်အပေါ် ထပ်မမြင် စေလိုတာအမှန်ပဲ။
စစ်ရေးကြောင့် လမ်းတံတားဖျက်တယ်ဆိုတာ လူထု နားလည်ပါတယ်။ နေအိမ် ကျွဲ နွား နဲ့ ခြံထွက် သီးနှံတွေကို ပြန်ကြည့်ဖို့ ခွင့်မပြုပဲ လူထုထွက်ပြေးချိန် လူထုအိမ်ပေါ်တက်၊ ပစ္စည်းတွေ မွှေနှောက်ပြီး တန်ဖိုးရှိ ပစ္စည်းယူဆောင်သွားတာတွေကို တအာင်း (ပလောင်) TNLA တပ်လဲ ကျူးလွန်နေတဲ့အပေါ် မိုင်းကျက်ဒေသခံလူထုက မကျေနပ်ပါဘူး။
လက်ရှိ နမ့်ခမ်းမြို့မှာလဲ တအာင်း (ပလောင်) တပ်က လူထုရပ်ရွာနေအိမ် ခြံဝန်းထဲ တက်နေ နေပါတယ်။ စစ်ကောင်စီက ရွာထဲမှာ လက်နက်ကိုင်တပ်ရှိနေရင် လူထုရပ်ရွာပါမကျန် ပစ်မှတ်ထား တိုက်ခိုက် မယ်ဆိုပြီး တရားဝင်ပြောလာတော့ TNLA က နမ့်ခမ်းမြို့ ကြေမွသွားအောင် တမင်လုပ် လာနေသလိုဖြစ်နေတယ်ဆိုတာကို နမ့်ခမ်းလူထု ဝမ်းနည်းကြေကွဲစွာနဲ့ သျှမ်းသံတော်ဆင့်ကို ရင်ဖွင့်ပါတယ်။
၁၀၂၇ စစ်ဆင်ရေးကြောင့် လူထုအသက်အိုးအိမ်ပျက်စီး ဆုံးရှုံးမှုကို ဘယ်သူ တာဝန်ယူပေးကြမလဲ။
အဲ့ကြောင့် ၁၀၅ မိုင် ကားကြီးကွင်းမှာ ကုန်တင်ကားကြီး ရာဂဏန်း မီးလောင်မြိုက်သွင်းမှုမျိုးလို ဆုံးရှုံးမှု ထပ်မဖြစ်ဖို့၊ လူထု မြို့ရွာ ပြာမကျဖို့အတွက် ရပ်ရွာထဲကို တိုက်ပွဲဖြစ်အောင် စစ်ကိုမျှား မခေါ်မိဖို့ အရေးကြီးပါတယ်။
လူထုအသက် အိုးအိမ်စည်းဇိမ်တွေကို အတတ်နိုင်ဆုံး အကာအကွယ်ပေးဖို့၊ လူထုရပ်ရွာနေအိမ်ကို အကာကွယ်မယူဘဲ စစ်သည်တော်ကျင့်ဝတ်သိက္ခာနဲ့အညီ မြင့်မြတ်စိတ်ထားရှိတဲ့ တပ်မတော်ဖြစ်ဖို့ မြောက်ပိုင်းတပ်ဖွဲ့တွေကော တော်လှန်ရေးတပ်ဖွဲ့အားလုံးကော အထူးကျင့်ကြံကြိုးစားဖို့ လိုအပ်ပါတယ်။
ဒါ့အပြင် အကြောင်းအမျိုးမျိုးကြောင့် ရခိုင်လူထုအကျိုးစီးပွားအတွက် သျှမ်းပြည်မြောက်ပိုင်း မြို့သိမ်းတိုက်ပွဲမှာ ပါဝင်နေရတဲ့ ရက္ခိုင့်တပ်တော် AA အနေနဲ့လဲ ရခိုင်ပြည်လွတ်မြောက်ရေး အတွက် ကြိုးပမ်းနေချိန် အထက်က ပြောခဲ့သလို သျှမ်းလူထုအသည်းနှလုံးကို တက်မနင်းသွားဖို့၊ သျှမ်းလူထုနစ်နာမှုရဲ့ သမိုင်းတရားခံအဖြစ်ပါဝင်မှုမှာ ရက္ခိုင့်တပ်တော် AA အနေ အထူးသတိ မူမိစေလိုပါတယ်။
သျှမ်းပြည်တိုးတက်ရေးတပ်ပါ၊ သျှမ်းပြည်ပြန်လည်ထူထောင်ရေးတပ်ပါ – လို့ ကြွေးကြော်နေတဲ့ သျှမ်းပြည်တပ်မတော် နှစ်တပ်အနေနဲ့လဲ – ယနေ့တော်လှန်ရေး၊ ၁၀၂၇ စစ်ဆင်ရေး၊ သျှမ်းပြည်မှာ ဖြစ်ပွားနေတဲ့ အရေးတကာ့အရေးတွေမှာ ဒီအတိုင်းလက်ပိုက်မကြည့်ပဲ မိမိမှာ တာဝန်ရှိတယ်၊ မိမိမှာ တာဝန်သိတယ်ဆိုတဲ့စိတ်ထားနဲ့ တတ်နိုင်တဲ့ဘက်က သျှမ်းလူထု အသက်အိုးအိမ်စည်းစိမ်ကို ပါဝင်အကာအကွယ်ပေးပြီး တာဝန်ကျေတဲ့ တပ်မတော်ဖြစ်ဖို့ အထူးသတိပေး တိုက်တွန်းလိုပါ ကြောင်း သံတော်ဉီးဆင့် အပ်ပါတယ်။
လူထုအသံ သျှမ်းသံတော်ဆင့်အသံ
အယ်ဒီတာ့အာဘော်
သျှမ်းသံတော်ဆင့်သတင်းဌာန
