သျှမ်းပြည် မြို့နယ် အများစုတွင် စက်သုံးဆီများပြတ်လပ်နေပြီး အချို့နေရာတွင် ဈေးများတက်ကာ အကန့်သတ်ဖြင့် ရောင်းချနေရကြောင်း စုံစမ်း သိရပါသည်။
သျှမ်းပြည် မိုင်းရှူး၊ ပင်လုံ၊ ခိုလမ်နှင့် မူဆယ်မြို့တို့တွင် စက်သုံးဆီ ဓာတ်ဆီ ၁ လီတာလျှင် ၃၂၀၀ မှ ၃၈၀၀ ကျပ် ထိ ဈေးတက်နေပြီ၊ စက်သုံးဆီများကို တန်းစီ၍ဝယ်ယူနေရကြောင်း၊ အချို့ဓာတ်ဆီဆိုင်များတွင် ဆီပြတ်လပ်မှု ကြုံတွေ့နေရကြောင်း သျှမ်းပြည် ဒေသခံများက သျှမ်းသံတော်ဆင့်ကိုပြောသည်။
“စက်သုံးဆီဆိုင်တွေက မူဆယ်မြို့ ပြင်တွေမှာပဲရှိတာ တိုက်ပွဲနဲ့ နီးတဲ့နေရာဆိုတော့ ဆီဆိုင်တွေ ပိတ်ထား တာလည်း ပါတာပေါ့။ ပြည်သူတွေက ဇွတ်တွေဝယ်ကြတော့ ဈေးတက်သွားတာ။ မနေ့က ဆီဆိုင်တွေမှာတော့ ၁ ယောက်ကို ကျပ် ၂ သောင်းဖိုးပဲ ရောင်းပေးတာ”ဟု မူဆယ်မြို့ ဒေသခံအမျိုးသားတစ်ဦးက ပြောသည်။
သျှမ်းပြည် တောင်ကြီး၊ နမ့်စန်၊ ကျောက်မဲ တို့တွင်လည်း ဆီးဈေးများ ၁ လီတာကို ကျပ်ငွေ ၂၆၀၀မှ ကျပ်ငွေ ၃၂၀၀ ထိ ဈေးရှိနေပြီ၊ ယမန်နေ့ (ဒီဇင်ဘာလ ၅) ရက်တွင် တောင်ကြီးမြို့ပေါ်တွင် ဆီများ ပြတ်လတ်ပြီး မြို့ပြင်ရှိ စက်သုံးဆီဆိုင်များသာ ဆီများရရှိခဲ့ကြောင်း ဒေသခံများက သျှမ်းသံတော်ဆင့်ကို ပြောသည်။
“မနေ့က တောင်ကြီးက မြို့ပြင်တွေမှာတော့ ရတယ်။မြို့ထဲပဲ မရတာ။ ဈေးမတက်တာတော့ ၄ ရက်လောက် ရှိပြီး။ စျေးက ရုတ်ရက်ခုန်တက်သွားတယ်” ဟု တောင်ကြီးမြို့ ဒေသခံအမျိုးသားတစ်ဦးက ပြောသည်။
ရန်ကုန်မြို့ပေါ်တွင်လည်း စက်သုံးဆီဆိုင်များ ဆီပြတ်လပ်မှုဖြစ်နေပြီး ဒီဇင်ဘာ ၄ ရက်နေ့မှ စပြီး ဆိုင်အချို့ ယာယီ ပိတ်ထားရကြောင်းသိရသည်။
အချို့စက်သုံးဆီဆိုင်များတွင် ကားတစီးလျှင် ကျပ် ၅ သောင်းဖိုး ခွဲခန့်သာ ရောင်းချ ပေးကြောင်းသိရသည်။
မြန်မာနိုင်ငံတွင် အောက်တိုဘာလကုန်ပိုင်းမှ စတင်ကာ ဒေသအချို့တွင် စက်သုံးဆီများ စတင်ပြတ်လပ်လာပြီး ယခုနောက်ပိုင်းတွင် တစ်နိုင်ငံလုံး အတိုင်းအတာအနေဖြင့် ဓာတ်ဆီဝယ်ယူရန် ယခင်ကထက် ပိုမိုအခက်အခဲ ရှိကြောင်း သိရသည်။
