သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) ဌာနချုပ် လွိုင်တိုင်းလျန်းတွင် စစ်ဘေးရှောင်ရန်ပုံငွေ အတွက် သျှမ်းနှစ်သစ်ကူး ကျင်းပသွားမည်ဖြစ်ကြောင်း စုံစမ်းသိရသည်။

RCSS/SSA ဌာနချုပ်ဖြစ်သည့် လွိုင်တိုင်းလျန်းတွင် ဒီဇင်ဘာ ၁၂ရက် သျှမ်းနှစ်သစ်ကူးအကြို ပြုလုပ်သွားမည်ဖြစ်ပြီး၊ စစ်ဘေးရှောင်များအတွက် ရန်ပုံငွေများရှာဖွေကာ လှူဒါန်းသွားမည်ဖြစ်ကြောင်း RCSS/SSA ပြောရေးဆိုခွင့်ရှိသူ ဗိုလ်မှူး စိုင်းခမ်းစံက သျှမ်းသံတော်ဆင့်ကို ပြောသည်။ 

“ကျနော်တို့က ပွဲကြီးကြီးမားမားလုပ်မှာ မဟုတ်ပါဘူး။ ဓလေ့ ရိုးရာ ထိန်းသိမ်းတဲ့အနေနဲ့ပဲလုပ်သွားမှာပါ။ ပြီးတော့ ပွဲမှာ လည်း စစ်ရှောင် ရန်ပုံငွေအတွက် ရှာဖွေပြီး လှူဒါန်းသွားမယ်။ စစ်ရှောင်ကူညီသွားမယ်” ဟု ဗိုလ်မှူးစိုင်းခမ်းစံ က ဆိုသည်။

RCSS ဌာနချုပ် လွိုင်တိုင်းလျန်း  သျှမ်းနှစ်သစ်ကူးလာမည့်သူများကို ဒီဇင်ဘာ ၁၁ရက်တွင် စတင် ဧည့်ခံကြိုဆိုသွားမည် ဖြစ်ပြီး၊ ဒီဇင်ဘာ ၁၂ရက် ညတွင် သျှမ်းနှစ်သစ်ကူး ကြိုကာ  ဒီဇင်ဘာ ၁၃ရက်တွင် နံနက်(၆)နာရီခွဲတွင် နှစ်သစ်မိတ်ဆုံစားပွဲ ပြုလုပ်သွာမည်ဟု Tai Freedom Shan Vision တွင် ထုတ်ပြန်ထားသည်။ 

အလားတူ ထိုင်နိုင်ငံ ချင်းမိုင်မြို့ ဝက်ဂူတောက် ဘုန်းကြီးကျောင်းတွင်လည်း သျှမ်းပြည်မြောက်ပိုင်း စစ်ဘေးရှောင်များ အတွက် ရန်ပုံငွေရှာဖွေပွဲနှင့်  သျှမ်းနှစ်သစ်ကူးပွဲတော်ကျင်းပသွားမည်ဟု သိရသည်။

အောက်တိုဘာ ၂၇ ရက် “၁၀၂၇ စစ်ဆင်ရေး”ကြောင့် သျှမ်းပြည်မြောက်ပိုင်းတွင် စစ်ဘေးရှောင် ၈သောင်းကျော်ထိ တိုးလာပြီး၊ အရပ်သားသေဆုံးမှု ၁၀၀နီးပါးထိရှိလာကြောင်း သျှမ်းသံတော်ဆင့် ကောက်ယူထားသည့် စာရင်းအရသိရသည်။